JOB 37 - Tupuri Bible

¹ Diŋ wersen so ga jag jiili ɓi mbar me debaŋ, day ndar me jiɗid jiɗid mono.

² Laa we, laa we sug carge põõ ɓen wo de duugi ma jag ɓe no!

³ Á caa põõ wo go ti ngel ɓuy day sagge ɓen sag wo go ti jag sir tawge ɓuy lay.

⁴ Á raw duugi, caa põõ de egre day maga à laa caage põõ ɓen go mokay se dig sagge ɓen gà so.

⁵ De maga Baa caa põõ mokay se ngil jare. A joŋ fẽẽre ma kluuri maga daʼ wo wer ne naa gà wo.

⁶ A wii gedembarn gana : Leʼ ti tamsiri! Wãã ne baabis wo de baa ma raage bodbod doosen no lay.

⁷ A woo doo jar téebeere wo go ti joŋre ɓaaran wo nen maga á mo ko wo ga joŋ ra diŋ se.

⁸ Này ma yoowayn fer go ti ngel suuli ɓe, day suu go ti ngel naw ɓe.

⁹ Leege ma debaŋ a le nen ɓaŋ wãybane, ceere naa le nà nen ɓaŋ gloŋhwede lay.

¹⁰ Ɓodge egre Baa kol bii wo go graŋ, ɗee boo bii go se kẽẽ.

¹¹ A bag nen swaare wo go de bii day se dus ɓil swaare wo go de sagge ɓe no.

¹² Ɓaŋ maga á fer wo ni mono, saara kii nà ti faage maga á ngaɓ ne hara mono nen maga á mo joŋ wo diŋ fen maga se hay riŋ ga á mo joŋn wo mo ɓuy ti tamsir lam no.

¹³ Á wo nà doo graw nono, maapo ma ɗob jare, maapo ma taŋ tamsiri noga ma kaŋ nen jar ti ɓil de el ɓe no. Se a de ɓaara nà ma seno.

¹⁴ Jobe, coʼ sug fẽẽre sen wo! Baa see ɓo kay ma laa wer fẽẽre mani Baa ma ngil jarn wo!

¹⁵ Ndo yaŋ mbo de ko maga á ɓoʼ faage fẽẽre ma ngil jar sen wo, day sag poɗag ɓen yoo swaare mo yawla?

¹⁶ Ndo yaŋ de ko maga swaare kaŋ wo ciŋ mo taʼ taʼ yawla? Ndo yaŋ de ko fẽẽre ngil jar mani je maga koge ɓen go de bag jag ti ngel ɓe keɗed ɓuy wo yawla?

¹⁷ Ndo maga õõbe bà de baa wùu mo ti, ni paga te jar ma ti tamsir ma ɓuyn da wo go goŋge doo ceere maga a le nen ɓaŋ wãyban mono.

¹⁸ Ndo kãã yaŋ doo Baa nono ma caa swaare go ciŋ taʼ taʼ nen ngel ma ciŋ go kiŋ kiŋ doo fen ko nen no lay yawla?

¹⁹ Kaŋ nen wùr ti fen maga wùr nen wããge ne hẽn mono, ni wùr wãã ge fen maga wùr wãɗ doo de bay koge maga de hoo wùr doo mo gà so hase.

²⁰ À wo ge siigi ne hẽn siigi ga ndi wãã ge wããre yaŋ ɗa so yawla? Je táabay kãã mbe yaŋ ma ɓoʼ sug ɓe de re po ɓoʼge ɗa yawla?

²¹ À ko mbe la no kay ceg bay mbe wa koɗe, diŋ ga wur kal go nen swaare. Leege po raw yaŋ le naage, raw go de swaare no, ngel raw caage go.

²² Ngel ma de lerge de woore doo boo biŋni nono raw age le nen ɓaŋ gloŋhwede. Kluu mani Baan bay jag foo wa!

²³ Naa kãã ma day je ma de egre ɓuyn gà á kluu doo egre ɓe no, doo cagge re ti faage ɓen wo de keɗed ɓe no. A bay ga á yiŋ jag go ɓegdeʼ ɗa wa.

²⁴ Diŋ wersen so ga jar téebeere wo nen hẽẽge ɓe mbe. Ane se bay de kaŋ nen ti jar maga ɗig wo ga saara de ko re mo wa hase.