JOB 36 - Tupuri Bible

Elihu ga egre mani Baan kluu debaŋ

¹ Elihu see de wããre ɓen pele day gana :

² Gor meʼ ɗa, ndi naa wer ɓe ne ndo, werga wããre yaŋ jag ɓi mbag ma kay ti Baa ɗa.

³ Ndi daʼ ge koge ɓin le nà hãã, day ndi blaw ge re go ne je maga hay boo ndi ti.

⁴ Werga, ti cwãy ɓe tuu wããre ɓin bay wo diŋ jag hila wa. De wãã wããre ne ndo nà diŋ je maga koge ɓe go de bag jag ti ngel ɓe.

⁵ Baa de egre, day se tob jobo go gà. Á de egre wer koge ma debaŋ ma ti ɓe no.

⁶ Á men je joŋ ɓlagge caw tenen gà á cag re jar gayren wo go ne hara.

⁷ A bay mbuɗ faale go ne je ma keɗedn wa. A lag waŋre wo ti pale, á lag ra go ti ɓe ma tum nen maga á mo hay wo diŋ jar maga wo go ciŋ ti kããra.

⁸ Day hayga á kol wo we go ti geyam, noga re po caa ra layblaʼ no,

⁹ Sen nà diŋ ga Baa da naa nen joŋre ɓaaran wo go ne hara de ti ngel graŋ ɓaara maga á hay wo far ti see ɓaara ciŋ wer ɓe mono.

¹⁰ A ɓoʼ nà sug ɓaara ma liŋ rage, day da riŋ rage ga á mo men wo joŋre ɓaara ma bay blamn go.

¹¹ Day hayga á laan wo we, day yãã wo jag we no, saara bag ge jag naw ɓaaran wo yaŋ go nen fruygi, bag ge wo jag kiŋgi ɓaaran wo yaŋ go nen twore lay.

¹² Hayga á laan wo we gà no, manjaw taw ge ra go á huɗ gi wo go nen de bay koge ɓaara no.

¹³ Jar ma de hig jiili men wo see ɓaara ne ti graŋ no, day wo ɗe Baa maga á mo caa war saara le de maga á mbar geyam ne hara mo gà.

¹⁴ Maysee ɓaara taw go ti jõõ ɓaara, tenen ɓaara bas go de jar figliw wo.

¹⁵ Ama Baa yãã je coon go diŋ de coocoo ɓe no, riŋn go pel bol diŋ de bone.

¹⁶ Á yãã ge ndo yaŋ go jag re maga de caa ndo mono, hay ge ndo yaŋ go flãy bay re see day laa ge rege ma de cõõre wo yaŋ ne ndo pele.

¹⁷ Hayga ndo oo we see reen doo ga jar ɓlagge lag wo no lay no, re wo de kiida baa ge wo ndo.

¹⁸ Daga sõõge ɓil mo kaŋ wer ɓo go ɓoʼ foo reen wa, kaŋ ɗiggi ɓo taʼ ga fẽẽre ma coo see ɓo yaŋ debaŋ, day ndo maʼ ɓaale ti sen nà wa!

¹⁹ Roo ɓon wo de egre ɓo maga ndo tobn go ɓuy kãã wo yaŋ ma yãã ndo go jag reen yawla?

²⁰ Kaŋ ɗiggi ɓo ti ngel ma de suŋ maga yeɗ nen jar go mo wa.

²¹ Ko see ɓo, maŋ wer ɓlagge wa werga ndo nii da sen de daŋ soɗ re ma see ɓo no.

Kluu mani Baa no

²² Baa go ciŋ ti fẽẽren ɓuy nà diŋ wer egre ɓe no. Wose yaŋ de kããge ma kaŋ nen jar ti re doo se no la?

²³ Wose hay kaŋ nen ɓe we ti ɓen la? Wose kãã yaŋ ma riŋgi ɓe ga : Ndo yaŋ de ma joŋ fen ma bay blam la?

²⁴ Fer ɗig ti ma maŋ ti ɓe ciŋ wer joŋre ɓe maga á joŋ ne, day jar téebeere ʼwad wo siŋ togoɗge de ɓe mono.

²⁵ Nen je táabay ɓuy de kaŋge ti joŋre ɓe no, nen wosela ɓuy mo hay bà genla, de koge ɓe.

²⁶ Baa kluu, day naa bay dayge koge ɓe no wa keege kiŋgi ɓe de raw ti naa.

²⁷ A jo bii wo wo ciŋ day saara fer le go ra baa pa.

²⁸ Sware menn wo le go yuugi, day se ra go ne ngaɓa jar téebeere wo ti ɓuy.

²⁹ Wose laa wer yaŋ ne seele swaare wo de carge põõ Baa la?

³⁰ A cir ti see ɓe go de poɗag ɓe no, bag ɓil tuu maarog ma kuɗum wo go de bii nà diŋ se lay.

³¹ Á car kiida wer jar wo nà de fẽẽre sen wo, hã rege ne jar jag debaŋ debaŋ nà diŋ de ɓaara.

³² Á ɗaw sagge baa doo ɓe, day wii nen ɓe wo ne fen maga á geɗern wo ti.

³³ A naa nen go diŋ de carge põõ ɓe no, Horogre wo draʼ ko wo ga á caa põõ we.