JOB 35 - Tupuri Bible

Elihu ga je táabay bay keɗed pel Baa wa

¹ Elihu fer wãã wããre day gana :

² Jobe, ndo ɗig nà ga re ɓon ti ngel ɓe de maga ndo wãã ga ndo de deele pel Baa mo so yawla?

³ Werga, ndo wãɗ gana : De deele bay maŋ mopo ne ndi wa. Joŋge ɓlagge gàn bay kay ndi wa.

⁴ Ndi Elihu ndi yiŋ jag ne nday de bar ɓon wo ɓuy tuu.

⁵ Maŋ nen ɓo ciŋ day ni ndo kon wo ɗala! Ko swaare wo ɗala, á wo wo go ciŋ ti ɓo hãã!

⁶ Ndo mo joŋ bà ɓlagge sen ɓlag may se Baa la? De maga ndo mo joŋ bà tingraŋ wo de pel de pel ni, ndo joŋn de may la?

⁷ Ndo mo hay bà keɗede, ndo hã mayse ne hẽn noga á daʼ may le doo ɓo la?

⁸ Debaycõõre ɓon ɓlag nà diŋ je táabay ma doo ndo no, day keɗed ɓon kay nà diŋ je táabay lay.

⁹ À ra doo jar joŋ bon jar ma ngaɓan wo, jar ngar jag ga caa war saara doo bon maga jar debaŋ de kaŋge ɓe ne saara ti mono.

¹⁰ Ama, je maga riŋ ga Baa maga hay joŋ se, Baa maga a de siŋ togoɗ wo ne jar ti de suŋ,

¹¹ Baa maga naa daʼ hadge see ɓe de daŋ nàyre ma ti tamsir wo la, day hã koge re ne naa de daŋ dweere ma ciŋ wo, Baa sen nà genla, je wãã sen bay wa.

¹² Doo kay no so ga à gay doo roo mbe se yiŋ jag gà mono. Sen nà wer farge ti ciŋ jar joŋ ɓlaggen wo.

¹³ Kidolgi, á gay wo see ɓaara de koɗ koɗe, Baa day laa jag ɓaara gà je ma de egre ɓuyn day kaŋ nen ɓe ti ɓaara gà.

¹⁴ Ndo mo riŋ bà ga ndo bay de ko sen wa layblaʼ no, re ɓon go nen doo ɓe, gor mbo doo ɓe!

¹⁵ Day wer maga patala bagge põõ ɓen bay de leʼge wa ɗa, day se joŋ doo ga nen se bay de baa ti graŋ mani Jobn wa ɗa yaw mono,

¹⁶ Job hãʼ jag go de koɗ koɗe, day cab mbe wããre ma doo bay koge po wo mbaara wo deŋ koɗe.