JOB 34 - Tupuri Bible

Elihu ga Baa bay yeege wa

¹ Elihu fer wãã wããre day ga :

² Nday jar ma de ko re no, laa we wããre ɓi no! Nday jar ma de koge no, coʼ we sug ɓi!

³ Werga, sug car ɓil wããre wo go doo ga jag gus rege wo no lay no.

⁴ Naa kiɗ we wer ne fen ma ti faage ɓen de kããra ɓuy, day ni naa lag diŋ ti fen ma de el no.

⁵ Job gana : Ndi keɗede, day Baa bay ʼwũy re ɓin go ti ngel ɓe wa.

⁶ Bà de maga re ɓin ti ngel ɓe mo ɓuy, ndi kol go diŋ je car geteʼe bà de maga ndi joŋ ɓlagge gà mo ɓuy wããge ɓin kol joŋre go see ɓi.

⁷ Jobo yaŋ mbe doo Job nono ga jo debaycõõre go bii bii,

⁸ See yoo jar maga joŋ wo diŋ fẽẽre ma bay ngar wo, tab faage ɓen de jar joŋ ɓlagge wo pa yawla?

⁹ Á de see ɓe tuu gana : Daʼge bay ti maga jobo kaŋ ɗiggi ti Baa mo wa.

¹⁰ Laa we jag ɓi so, nday jar maga ti ɓay de el mono! Baa joŋ jobo de ɓlagge gà je ma de egre ɓuyn joŋ fen ma bay ngar gà!

¹¹ Á fer ne je tabayn diŋ nen joŋre ɓe no, á poɗ wosela ɓuy ti seele ɓe no.

¹² Cwãy kidolgi Baa bay joŋ jobo de ɓlagge wa, je ma de egre ɓuyn bay joŋ nen jar wa.

¹³ Wose hay hayn we wãã re tamsir la? Wose hay hã jag sir tawge ɓuy we ne hẽn doo la?

¹⁴ Hayga á mo hay ɗiggi diŋ ti see ɓe tawa, de fer Nenterse ɓen wo go see ɓe, day de naa leege ɓen we go lay mono.

¹⁵ Jar ɓuy de huu wo go jag taʼ boŋ, je tabayn de fer we go nen siri.

¹⁶ Hayga ndo yaŋ de ti ngel no, ni ndo laa mo ma kay no coʼ sug wããre ɓi maga laa wo wo go jag ɓi mono!

¹⁷ Je maga de caa hee de fen ma ti faage ɓen kãã mbe yaŋ ma joŋ waŋ ti jar yawla? Ndo yaŋ mbo de kããge ma baw je ma keɗed ga de egre de wããre yawla?

¹⁸ À wãã mbe yaŋ ne waŋ ga : Fen debaycõõre yawla? A wii mbe yaŋ ne jar kluuri sirn wo ga : Jar ɓlagge wo yawla?

¹⁹ Baa bay joŋ fẽẽre doo nen weere biŋni wo wa. A bay caa ɓil je horogn wo go de je coon wa werga á wo ɓuy diŋ jar maga se joŋ ra de doo ɓe.

²⁰ Doo no kay tuu saara huɗ go. Ti gisiɗgi suŋ no kay ko la wer jar po wo taʼ dwas wo go, day taw wo go. À nii je egre po go bay gaali tuu lay.

²¹ Werga, nen Baa de kaŋge ti seele je táabay no, á de ko ɓaale ɓe maga á kaŋ ra seege mono.

²² Ngel po bay taʼ de suŋgu noga de yoŋre ga jar maga joŋ wo fẽẽre bay ngar yoŋ wo doo ɓe ni bay wa.

²³ Baa bay yõõ ti yeʼ wolaŋ kiɗ wer wããre ti je tabayn maga se ɗen le pel ɓe ti kiida kway wa.

²⁴ A kiɗ wer joŋre jar egren wo kiɗgi gà á srog mbe ra go tuu tuu, day lag jar tigriŋ wo ti ngel ɓaara.

²⁵ Werga á go de car ɓil joŋre ɓaaran wo, á srog ra go de suŋ day á ndreɗ ra go.

²⁶ A mbar ra doo jar ɓlaggen wo nono, go nen jar poɗage.

²⁷ Sen nà werga á hay maŋ wo ɓil go see ɓe, day daʼ wo wer go ne faage ɓen wo ɓuy gà mono.

²⁸ Á hay kaŋ wo wer je gayren ɗe Baa ne see ɓaara ti, day Baa raw laa roo je ma nen coocoo no.

²⁹ Hayga á hã jam we, wose day riŋn yaŋ ga á joŋ ni gà la? Hayga á yoŋ we go no, wose day kon yaŋ la? Hayba diŋ wer jar po wo taʼa, noga jobo boŋ yaw, á nà doosen nono.

³⁰ Sen nà maga je ma bay ngar po mo hay joŋ waŋ ti jare, day kol diŋ rew see jar sir ɓen wo wa.

³¹ Jobo wii mbe Baa we ti boŋ ga : Ndi ko re maga leʼ me ti we, ndi joŋ ɓlagge gà so yawla?

³² Wiin mbe we ga : Fen maga ndi kon gà ɗa mono, kaŋ nen ɓi ti ɓe noga ga : Hayga ndi joŋ fẽẽre ma bay blam wo we, ndi fer ge joŋ rage gà so yawla?

³³ Baa nen poɗ jar nà ti jag ɓo so yawla? Ndo maga ndo de ko far fíi wããre ɓen wo so mono, ndo da nono, bay diŋ ndi wa ane. Fen maga ndo de ko sen mono, wããn mbo so!

³⁴ Jar ma de tin wo de je ma de ko re maga de coʼ sug ɓi wãã wo mbaara yaŋ lay gana :

³⁵ Job wãã doo bay koge, wããre ɓen diŋ wããre kamliiri wo.

³⁶ Daga re mo heb Job go woore heb ɗa werga á fer wããre doo jar maga joŋ wo fẽẽre ma bay blam wo nono!

³⁷ Werga, á fer joŋ ti graŋ go ciŋ jag ɓlagge ɓen ni tigriŋ, kaŋ faare ti holaŋ naa, yaʼ wer durgi de Baa de pele, day ɓoʼ jag ɓe go diŋ de kejebge nen wããre ne Baa see.