JOB 33 - Tupuri Bible

Elihu ga Baa wãɗ wããre ne jar de bone

¹ Patalam so no Jobe, laa wããre ɓin wo. Coʼ sug fen maga kal le go jag ɓi mo ɓuy no!

² Ko ga ndi day go bul jag ɓi, ndi day nà wãã wããre de jag ɓi!

³ Wããre ɓin kaŋ ge wo nen ɓo yaŋ ti cwãy wããre maga le ɓil ɓi mono, jag ɓi wãã ge nà diŋ koge ma ti ngel ɓe no.

⁴ Hay boo ndi nà diŋ Nenterse Baa, day joŋ ga ndi mo hay tenen diŋ ɓodge egre je ma de egre ɓuy no.

⁵ Hayga ndo yaŋ de kããge no, ni ndo fer wããre ne ndi. ʼWũy see ɓo go, ni ndo a le pel ɓi!

⁶ Pel Baa mono, ndi doo ndo no lay, ndi de see ɓi à boo me de pãy lay.

⁷ Doo kay no so mono, daga ndo mo caa hẽẽne go doo ɓi wa, egre wããre ɓi mo hã lawge ne ndo wa lay.

⁸ Ane, ndi hay laa we jag ɓo de sug ɓi, day ndi hay laa wããre ɓon wo we gana :

⁹ Ndi bay cerge see, ndi bay de ɓlagge wa, ndi go keɗede, debaycõõre po bay ɓil ɓi wa.

¹⁰ Day Baa caa hee de ɓi, ko me doo je hee ɓe nono,

¹¹ A mbar geyam me ɓaale, ndi fũy doo ɓe meʼ gà ɓuy.

¹² Ndi yiŋ jag ne ndo ti sen mo taʼ ga ma ɓo coo gà. Werga, Baa kluu de daŋ je táabay.

¹³ Wer mayse ga ndo da faare de ɓe day ndo mbo ceɓ wiigi ɓe ga á mo yiŋ jag go ne ndo ti wããre ɓon wo ɓuy la?

¹⁴ Ane, Baa wãɗ wããre wer sar sare, day à bay kaŋ ɗiggi ti ɓaara wa.

¹⁵ A wãã wããre de fẽẽre mbuɗgi nen wo, nen lwaʼge ma de suŋ wo de maga naa go de baa jar téebeere wo ɓuy, day saara go de laa naa ti fen suuli ɓaaran wo mono.

¹⁶ De sen mono, se raw naa nen re wo ne jar téebeere wo, day se ɓoʼ ti wããre ɓen go ne hara ɓuy tuu.

¹⁷ Ma blaw ɓil je tabayn wo go de joŋre ɓe ma de ɓlaggen wo, ma maŋ jag je ma de egren go ga á mo far ti see ɓe ciŋ wa lay,

¹⁸ Maysee ɓe mo kal ɓi tuu wa lay, day manjaw mo bas tenen ɓen go wa lay.

¹⁹ Je táabay ko see ɓen ni de maga se de cege day see ɓe bay da ngel wa doo nen hm ɓe maga cen wo go ɓuy mo lay.

²⁰ Mo so no, hoole maŋ mopo nen ɓe gà hayba diŋ rege maga à da ra debaŋ wo draʼa.

²¹ Hõõgese ɓe kuyuɓ go, day à ko ge ga yeʼ diŋ se gà so. Hm ɓe maga hay wo de yoŋre kol wo go tinoo.

²² Maysee ɓe kol go maŋ see tuu húulí, tenen ɓe go sam de jar húulí wo.

²³ Ane hayga je peele Baa ma fer jag ɓe yaŋ no, boŋ yoo ma ndarn wo diŋ je kaŋ nen je táabay ti joŋre ma de el maga á nen joŋge ɓe mono.

²⁴ Doo kay no so no, se ko decoo ɓe, day wãã ge yaŋ gana : Menn go, nen maga á mo cwaa wo ɓil tuu ma de suŋgun wa, ndi daʼ fen ma coo ti ɓe we!

²⁵ Mo so no, hõõgese ɓe fer go doo ma ti jõõ ɓen nono, fer go doo ma ti wur maga se de naa jõõ nono.

²⁶ Á tos Baa, day se sii ti ɓe. Á wo mbe pel ɓe de war fruygi jag so lay werga Baa ʼwũy gi re jar téebeere ge go ne hẽne.

²⁷ Je sen ʼwaa ge siŋ yaŋ pel jar téebeere wo ga : Ndi hay joŋ ɓlagge, ndi fãy fen ma ti faage ɓen go, day à kaŋ põõre ɓe ne ndi ti doo maga à hay nen kaŋge ɓe ne ndi ti no gà yaw.

²⁸ Baa hay yãã maysee ɓi go maga á mo wo ɓil tuu ma de suŋgun wa, á men mbe ndi tenen caw jo leege ɗa pa.

²⁹ Mokay nà diŋ fen maga Baa joŋn ɓaale ɓoge, ɓaale swaʼ see je táabay mo so no.

³⁰ Sen nà ma haw maysee ɓe le go jag tuu ma de suŋgu no, ma ler poɗag go ne jar téebeere wo ti.

³¹ Jobe, hay eŋ, coʼ sug ɓi! Hay baʼa, men ndi wãã wããre ɗa!

³² Hayga wããre po yaŋ jag ɓo ma wããge ni ndo fer mbo wããre ne ndi. Wãã mbo, werga ndi da cag re ɓon go ne ndo.

³³ Day hayga bay we wa no, ni ndo coʼ sug ɓi! Hay baʼa, ni ndi had ge ndo yaŋ de koge re no.