JOB 32 - Tupuri Bible

WAARE MANI ELIHU NO

¹ Jar se swaʼn kal wo men fer wããre go ne Job werga á hay ko see ɓe nen ɓe diŋ je ma keɗede.

² Mo so no ɓil Elihu je ni Barakeel ma Bus, ti moobe mani Ramn raw sõõge. Ɓil ɓe kal sõõge ne Job ti wer maga á hay ko see ɓe keɗed pel Baa mono.

³ Ɓil ɓe raw sõõge ne bar Job ma swaʼn wo ti wer maga a laa wo daʼ wããre ma ferge ne hẽn gà day saara ɓoʼ mbaara wããre ne Job ti tuu mono.

⁴ Wer maga kiŋgi ɓaara hay go pur pur de daŋge ɓe mono, Elihu hay gor ga se fer wããre ne Job gà ɗa.

⁵ Elihu raw koge ga jar se swaʼn bay wo de wããre jag ma ferge wa so, day ɓil ɓe raw sõõge.

Elihu ga se hay baʼ ga so

⁶ Elihu je ni Barakeel ma Bus kal wãã wããre day ga : Ndi diŋ weklee maga kiŋgi ɓi bay pur wa, day nday go diŋ jar ma de tããrebe. Diŋ wersen ndi hay san go, hẽẽne hay joŋ ndi ma naa wer fen maga ndi de koge ɓe ne nday.

⁷ Ndi hay ɗig le ɓil ɓi gana : Je ma de tããbe wãã reen yaŋ go, je maga kiŋgi ɓe pur naa nen koge reen yaŋ go.

⁸ Ama paga ti cwãy le ɓil je táabay nà diŋ Nenterse, Hã ti ne hẽn nà ɓodge egre mani je ma de egre ɓuy no.

⁹ Kiŋgi purn hã koge re ne jobo gà day laa wer fen ma ti ngel ɓe bay diŋ jar ma de tããreben wo tawa wa.

¹⁰ Diŋ wersen mokay ndi wãã so gana : Coʼ we sug ɓi! Ndi de see ɓi ndi naa wer fen maga ndi ko sen mo lay so no.

¹¹ Ndi hay gore, hãã nday wo go taw wããre ɓayn wo. Ndi hay coʼ sug naage wer wããre ɓayn wo, hãã nday tee wer wããre ɓen wo go pleŋ pleŋ ɓuy.

¹² Ndi hay kaŋ ɗiggi ɓi laa wããre ɓayn wo, day jobo boŋ yoo ɓay kãã ma kaŋ nen Job ti ɓen gà. Jobo yoo ɓay fer wããre ne hẽn de el ti wããre ɓen wo gà.

¹³ Ane, daga nday mo wãã ga koge reen taw ti go ɓuy nà ni ɓe, day kãã ma ɓoʼ foo ɓe go nà diŋ Baa bay diŋ je táabay wa nà wa!

¹⁴ Á hay wãã wããre ɓen wo diŋ ne ndi gà diŋ wersen ndi fer ge wããre ne hẽn diŋ de wããre ma jag ɓayn wo gà lay.

¹⁵ Ko ra ɗa á caa wo hẽẽne go, laa wo fer wããre gà so hase! Jag ɓaara ɓug go!

¹⁶ Ndi hay gor ra, day wer maga á laa wo wãã wããre gà so, wer maga á lag wo go baʼa, day bay wo fer wããre wa so mono,

¹⁷ Ndi de see ɓi, ndi fer wããre lay so, ndi da naa wer fen maga ndi de koge ɓe mo lay so.

¹⁸ Werga jag ɓi lag me see wããre, see ɓi bay da ngel wa.

¹⁹ Ɓil ɓi joŋ me le doo yii maga de jiigi ɓil daŋre ma defay wo day nii mun rage go nono.

²⁰ Ndi wãã wããre go maga see ɓi mo laa bii go. Ndi bul jag ɓi go, day ndi fer ge wããre yaŋ.

²¹ Ndi wãã wããre ɓin bay ma ooge wer doo jobo wa hase, day ndi wããn ge ma kaŋ fǐiri ne jobo nen gà lay.

²² Werga, ndi bay de hadge de kaŋ kiŋ ti wããre wa, day la je joŋ ndin taw naw ɓi go gusi.