JOB 31 - Tupuri Bible

Job wãã ti seele ɓe

¹ Ndi hay hãʼ go, day nen ɓi hay bay slagge ti may tigli po wa.

² Day Baa car ɓil fẽẽren wo le ciŋ nà carge la? Je ma de egre ɓuyn hã ɓin le me ciŋ nà diŋ mayse no an la?

³ Re caa nà diŋ je ma dĩɗ faage ɓen gà yawla? Gaɓ go nà diŋ je maga joŋ fẽẽre de hram mo gà yawla?

⁴ De ko ngel seele ɓin wo de ɓaale ɓi maga kaŋ wo mo nà bay diŋ Baa wa yawla?

⁵ Hayga ndi yaŋ de see seele ma bay blam, noga ɓaale ɓi hay kaŋ we ti mopo ma bay ngar no,

⁶ Baa mo oo me ti klew maga ko wo klew fẽẽre go de el mono, day se daʼ wer yaŋ go ga ndi diŋ jobo ma de deele!

⁷ Hayga ɓaale ɓi hay men wo faage ma de deelen go, hayga jiili ɓi hay maŋ blam nen ɓi wo we, day doo ɓi yaŋ de bagge ti fen ɗag po no,

⁸ Daga mo maga ndi joʼn mo ɓuy je tigriŋ mo reen go, day wer mani ɓin mo caa go!

⁹ Hayga jiili ɓi hay ɓlag we go wer wãy jobo, noga ndi beg tiŋ je leege ɓi we no,

¹⁰ Ni wãy ɓi mo kol go gebee jobo naŋ niini ne hẽne, day jar tigriŋ mo suɗ wo go de ɓe!

¹¹ Werga, sen nà diŋ yoo, diŋ debaycõõre maga jar car kiida wo nen joŋ bon jobo ti ɓe.

¹² Sen diŋ wùu maga roɗ jobo hãã wo go de ɓe ɓi tuu ma bas jar no, day re nen mo ɓin go ɓuy mo so no.

¹³ Hayga ndi hay de ma joŋ nen wejõõ ɓi noga maygebe ɓin we ti nen fen ɓaara de maga wǔy hay kaŋ po ti holaŋ wùr no,

¹⁴ Ndi joŋ ge joŋge de maga Baa ur we le ciŋ mo la? Day de maga á ur gi we le ciŋ mono, ndi yiŋ gi jag ne hẽn nà gahãyla?

¹⁵ Hay boo ra nà bay diŋ je maga hay boo ndi le ɓil man ɓi mo wa an yawla? Hay ɓod naa ne maare naa wo ɓil nà bay diŋ Baa se boŋn wa yawla?

¹⁶ Ndi hay peŋ jar gayre wo we de fen maga sãy ɓe hay ti ɓaara yawla? Ndi hay men wãy dewurn we ko decoo yawla?

¹⁷ Ndi hay we de gõʼge re hoole boŋboŋ bay hãge ne wel holgen wa yawla?

¹⁸ Werga, hãã le ti jõõ ɓi wel holgen hay gẽẽge see ɓi doo ga se see pan ɓe nono, ndi hay soɗ wãy dewurn le nà hãã le ɓil man ɓi.

¹⁹ Ndi hay we ko je maga wel go bay õõbe see noga je coon bay fen laage ti,

²⁰ Day ndi menn we rawge bay kee ndi noga bay laa hõõge sããre ɓin wo ne hara ti ma baa wùu see ɓaara gà yawla?

²¹ Hayga ndi hay maŋ doo we ciŋ see wel holgen wer maga jar car kiida joŋ ge wo yaŋ go wer ɓi no,

²² Daga doo ɓi mo brag le go see gleŋgleŋ-manboole ɓi, day maymay doo ɓi mo caa le go ti ɗoŋɗoŋ doo ɓi day mo hrag go!

²³ Werga, re maga Baa ɓoʼn le me ti go de caa hẽẽne ɓi day ndi bay de kããge pel kluu ɓen wa.

²⁴ Hayga ndi mo hay kaŋ ɗiggi ɓi we go ti boo biŋni, ndi de wii we ti boo ma de woore ga ndi de kaŋ ɗiggi ɓi go nà diŋ ti ɓe no,

²⁵ Hayga ndi mo jeʼer we de mbeŋ maga ndi joŋn go, noga de horog maga ndi daʼ ra de doo ɓi no,

²⁶ Hayga nen ɓi de kaŋ we ti sagge wur de maga se de sagge noga ti few maga á de seege go de ler ngel mo kẽgkẽg kaʼ no,

²⁷ Day hayga ndi hay men jiili ɓi we le go glubgi freŋ freŋ noga ndi hay hoo doo ɓi wo wo ciŋ tos rage no,

²⁸ Sen nà diŋ ɓlagge ma woge de ɓi jag kiida pa day doo kay nono, ni ndi hay tob mbi Baa ma ciŋn go nà tobge!

²⁹ Ndi hay joŋ fruygi we werga re hay caa je maga hay hee de ɓi noga ndi hay yor we ciŋ de fruygi wer maga gaali daʼn yawla?

³⁰ Ndi maga ndi hay men jag ɓi ti boŋ rawge de ɓlagge gà lay, wããge ga je hee ɓin de taw go gà lay mono.

³¹ Wose hay a we liŋ ni ɓi ga day wãã ga se wùu de này gà la?

³² Waaren hay bay go nage siigi wa, ndi hay go bul jag tiŋ ɓin ne je raŋge no.

³³ Ndi hay yoŋ ɓlagge ɓin wo we ma ɗaw debaycõõre ɓin wo wo ɓil ɓi doo jar téebeere ma ɓuyn wo.

³⁴ Ndi hay hay we go liŋ ni ɓi ti boŋ baʼbaʼ yeʼ doo hẽẽne maga ngaɓan day la wãɗ wo ti ɓi, noga jar ɓod wo foo ɓi ti feele ɓaara wo yawla?

³⁵ Jar ɓi ya! Wose daʼ je maga coʼ sug ɓi yaŋ le ne ndi la? Wããre ma jag ɓi boŋ diŋ ga : Daga je ma de egre ɓuyn mo yiŋ jag ne ndi! Kefder maga je hee ɓin yern ma ʼwaa war ne ndi ti mono,

³⁶ Ndi ɓoʼn ge jag bay ɓi, ndi kaŋn ge ti ɓi doo gawraŋ nono.

³⁷ Ndi wo ge yaŋ fer wããre ne hẽn ti seele ɓi no, ndi see ge wo ma woge see ɓe doo wel waŋ nono.

³⁸ Hayga ngel pay ɓi hay ʼwaa war we me ti, day ngel ma de paɗge ciŋn hay ra wo we me ti go mberbe,

³⁹ Hayga ndi hay taw egre ɓe we go bay poɗge ɓe noga ndi hay gay coo maysee jar maga á hay nen doo ɓaara we no,

⁴⁰ Daga ɗewseŋ mo tĩĩ go ti ngel coore ble no, day birglig mo kol go ti ngel coore orje no. Wããre Jobn taw wo la ni so.