JOB 30 - Tupuri Bible

Job wãã ti bon ma see ɓe no

¹ Day patala mo so no!... Jar maga wo diŋ weere kleere ɓi feg wo ti ɓi, jar se maga ndi hay bay hoo sug ti pããre ɓaara wo wa has tuu ga ndi hay go de tay rage de wayre ma ɓil kaw ɓin wo mono!

² Bà mbe mo ɓuy layblaʼ no, egre ɓaara de maŋ doo ɓi ciŋ nà ti mayse mo la? A kãã ge wo ma cẽẽ ti boo go de doo ɓaara gà.

³ Á hay wo go de gayre doo coocoo wo de koŋne, day saara hay go kii ti tiʼ ter gùr fẽẽre wo ɓil ful maga leʼ ɓil le go ɓaaɓaa, day go de heeg kaŋkraŋ lay mono.

⁴ Á hay wo sroɓ ti fíi ma wer sugway wo, ter wo kaŋge cìi wo ma rege.

⁵ À hay niɗ rage wo go yoo jare, day à hay ʼwad war ne ra wer doo je freŋ nono.

⁶ Nen maga á mo raw wo wo go lagge de tiŋ ɓil log ma de tuu wo, ɓi tuu wo de rum húulì wo.

⁷ Á hay wo le ragge yoo lir wo doo gerhẽẽ nono, hay wo hulgi yoofíi wo.

⁸ Á hay wo diŋ jar ma bay ngar wo, hay wo bay riŋ. À hay bay de sãy ɓaara ti ɓil sirn wa.

⁹ Day patala ndi kol go jag ɓaara ti siŋ, ndi kol go diŋ fen maga saara ndal nà de ɓi jage.

¹⁰ Ndi joŋ yeɗe ne hara, saara maŋ ɓil go see ɓi. A bay wo hẽẽ ndi wa so, ceɗ wo sããre go ti ɓi.

¹¹ Wer maga Baa ɗir saale toŋwaa ɓin go, day mbuɗ fuy ɓi go mono, saara bay hẽẽ ndi wa, seɗ wo mbaara le me ti hãy koɗe.

¹² Jar see de gayren hoo wo ti ɓi gimgim, day keɗeg wo ɓaale ɓi wo. A ɓod wo blam re wo le ne ndi ti.

¹³ Faage mani ɓin draʼ saara ter tuu go me pel ni, day joŋ wo nen maga ndi mo bas go, diŋ jar se maga je caa war hay bay draʼ wa mono.

¹⁴ A nduu wo le doo ga saara laa le ti ywaale ma hwiŋ nono, ɓred wo le ti holaŋ tiŋ ma de mbuggin wo ɓredge.

¹⁵ Wer hẽẽne ma honla ɓuy go de caa ndi, twore ɓin raw we wer leege, fruygi ɓin raw go doo swaare nono.

¹⁶ Patala tenen ɓin go de dwasge, wur bon wo de age ne maysee ɓi ti.

¹⁷ De suŋ mono, nen hm ɓi cee wo ndi, cege ma see ɓin bay men ngel ne ndi wa.

¹⁸ Baa hoo mbe jag õõbe ɓin paw tuu creɗ kiŋ ɓi go doo soole õõbe ɓi ma kleen nono.

¹⁹ A ɓoʼ me go gesiŋ nen pããge, ndi kol go de maŋ ɓurgi wo de sããge.

²⁰ Ndi ɗe ndo ga ndo mo caa war ɓi, ndo day yiŋ jag ne ndi gà lay. Ndi ur go ciŋ deele nen maga nen ɓo mo ko ndi le.

²¹ Ndo kol go de hun see ɓi, ndo tob egre ɓo go ɓuy ma kaŋ re me ti.

²² Ndo kaŋ gùr leege ne ndi ti ma kog ndi, ndo naa swìl me ti ma rawge de ɓi were.

²³ Ndi yaŋ mbi de koge ga ndo wo de ɓi nà jag húulí, ti ngel maga jar téebeere wo ɓuy yiŋ wo wo go ni mono.

²⁴ Day je maga go de tawge so mono, sen hoo doo ɓe wo ciŋ wii ndo gà so yawla? Je maga re de caage ɓe, sen ɗe ndo maga ndo mo caa war se gà so yawla?

²⁵ Nen ɓi hay bay lag mberbe ti je maga tenen ɓen hay de gaali mo wa yawla? Maysee ɓi hay bay lawge ti je coon wa yawla?

²⁶ Ndi hay de kaŋ ɗiggi ɓi ti fruygi no, day re raw caa ndi. Ndi hay gorge diŋ poɗag no, suŋgu raw leʼge ne ndi ti.

²⁷ Weere ɓiiri ɓi prẽd wo ndi ceɓ tuu, wur bon yiŋ wo pel de ɓi.

²⁸ Ndi kol go de corge, ama bay doo ceg wa. Ndi ur go ciŋ yoo jar ngaɓa day ndi ngar jage.

²⁹ Ndi kol go diŋ kaw wé wo, go diŋ kan gii wo.

³⁰ Hõõgese ɓi lĩd go, hm ɓi leɗ wo wùu go doo cege no.

³¹ Dilna ɓin kol go diŋ ma ra húulí tawa, dãã ɓin ra nà de gẽẽge jar maga wo de rage mo tawa no.