JOB 3 - Tupuri Bible

WÃÃRE TI HOLAŊ JOB WO DE BAR ƁEN WO Job law see ɓe

¹ Blam sen mono, Job kal tĩĩ wer wãã wããre, raw faɗ wur biŋgi ɓe go.

² Job kal wãã wããre day ga :

³ Ti mo yõõ go ti wur maga ndi biŋ nen ɓe mono, ti ngel suŋ maga à wãã nen ɓe ni ga : Wel biŋ we mono!

⁴ Suŋgu mo ɓoʼ go ne naw sen nene, Baa mo ɗig ti le ti ɓe ciŋ wa, tuu ma kuɗum ma de tàabay mo yoŋn wo go.

⁵ Re ma de gaali mo leɗ wo go nen naw seno day mo koln wo go diŋ naw ma joŋ hẽẽne.

⁶ Ngel suŋ ma sen mo yee nen wo go nen suŋgu ni, fruygi po mo joŋ ni meʼ draʼ doo ma nen naw ma lan wo no wa, day à mo keen yoo naw ma nen fewn wo wa!

⁷ Cwãy, daga ngel suŋ sen mo hay tum diŋ naw maga raw go de koɗ koɗ bay maŋ ɓiili jobo, day jobo mo ʼwaa war fruygi nen ɓe wa hase!

⁸ Daga jar maga faɗ wo nawn wo go day srog wo wer barkag ma nen bii ne jar ti mo faɗ wo ngel suŋ sen go.

⁹ Gér maga laa wo le ti daymola sen mo kol wo go de suŋgu, á mo ler wo ngel go ne hẽn ti meʼ draʼ wa. A mo ko ngel le go maŋge draʼ ma tee wa.

¹⁰ Werga, a reb jag ngel weere wo go ne ndi ti ɓil wãy maga hay maŋ ɓiili ɓi ni nen maga ndi mo kal le go ko bon gà mono!

¹¹ Wer mayse ga ndi hay taw le go ɓil man ɓi ni gà la? Wer mayse ga ndi hay huu le go de maga ndi kal le go ɓil man ɓi mo tuu gà le la?

¹² Wer mayse ga ndi hay daʼ doo po ma soɗ ndi wo de jag pãã ma joge pa nà le la?

¹³ Ndi mo hay bà go patala de suuli, go bay re see. Ndi mo hay bà go de leʼ naa, day doo kay nono ndi mo hay bà go iggi.

¹⁴ Go iggi yoo waŋre wo de jar kluuri ma ti tamsir maga bor wo fẽẽre ma ra ɗúu see ɓaara kluuri day de gwaɗge diŋ tabul ɓaara mono.

¹⁵ Go iggi yoo weere waŋre maga hay tay wo boo biŋni liŋ ni ɓaara day bag wo tiŋ ɓaaran wo go de solay mono.

¹⁶ Ndi mo hay caw gà so doo mbarga maga à cwaa ɓiili ɓe go, à teen go nen sir de yoŋre nono, doo weere kleere maga ko wo nen wur go gà nono.

¹⁷ Wo go ti ngel sen ni jar hun joŋ wo hun gà so, jar maga gay wo go day egre ɓaara bay wa ig wo see ɓaara.

¹⁸ Jar maga hay wo diŋ daŋgay mo ɓuy wo wo go nen jam ni, á laa wo gẽẽge jar joŋ bon ɓaara maga hay wo gor ti ɓaara mo gà so lay.

¹⁹ Wekleen wo de je kluun wo wo go de lagge ti ngel sen ni boŋ, gebeen go de naa saale ti, bay nen doo je wããre ɓen wa so.

²⁰ Wer mayse ga á men ngel go teege ne je ma ti bon ti jam la? Wer mayse ga á men jar maga maysee ɓaara nen lawge wo tenen la?

²¹ Diŋ jar maga wo de gorge ga húulí mo a, day se a gà jar maga wo de sãy ɓe ti de daŋ horog wo mono.

²² Diŋ jar maga mo hay joŋ wo fruygi yaŋ debaŋ lay, day ɓil ɓaara de hay go feh lay de maga á de hay wo we go de terge ɓi tuu húulí mono.

²³ Wer mayse ga á men je maga faage ɓen go de yee nen ɓe, day Baa hebn go mbaŋ mbaŋ tenen nà le la?

²⁴ Werga, ndi tĩĩ rege no kay ndumgi kol go ti ngel hoole no, day mberbe ma nen ɓi kaa le go doo bii maarog nono.

²⁵ Re maga ndi joŋ hẽẽne doo ɓe, daʼ me nà diŋ sen yaw, re maga ndi daɗ doo ɓe, caa ndi diŋ sen so yaw.

²⁶ Ndi bay ɗeged wa lay, see ɓi bay see ɓi wa lay, ndi bay daʼ iggi wa lay, see ɓi diŋ re ma de caa ndin boŋ tum tuu.