JOB 29 - Tupuri Bible

JOB FER MBE JAG WÃÃRE ƁEN BOŊ PA Job fer wããre ti maga se hay taŋgu mono

¹ Job fer mbe jag wããre ɓen tigriŋ pa, day ga :

² Jar ɓi, daga ndi mo fer go doo maga ndi hay le nen few ma blam wo doo ma ti wur maga Baa hay de ɗaw mege doo no ɗala!

³ Daga ndi mo fer go doo maga á hay doʼ lampa ɓen go tee ngel me ti, day ndi hay seege nen poɗag ɓen mbi hãy nen ngel suŋ no ɗala!

⁴ Go doo ma ti wur maga see ɓi hay go see ɓi de el ti ngel ɓe de maga Baa hay bar ɓi gor ti tiŋ ɓin nono.

⁵ Doo maga je ma de egre ɓuyn hay see ɓi ɗa, day weere ma jõõre hay wo go de cir ti ɓi nono.

⁶ Doo maga ndi hay go yog ɓaale ɓi de noo pãã, day noo hay le de naa jag le ciŋ ti húulì yuugi see ɓi mbaŋ nono!

⁷ De maga ndi hay le go kalge ma woge ti ngel tayge ma ɓi leege no, day à hay go ʼwũy ngel hayle ɓin ni taʼ mono,

⁸ Weere jõõre ko wo ndi no kay, ndar wo see ɓaara go. Jar ma de tããrebe hay wo go horge ciŋ, day od wo go deele.

⁹ Weere waŋre men wo wããre ɓaara no, day kuɓ wo doo go jag ɓaara,

¹⁰ Jag waŋren ham wo go gesiŋ, jag ɓaara bul go gà.

¹¹ Werga, wosela ɓuy maga hay laa wããre ɓi de sug ɓe ɓuy hay wããge ne ndi ga bosaʼ bosaʼa. Wosela ɓuy maga nen ɓe hay ko ndi mo ɓuy hay joŋ sedewa ti ɓi.

¹² Kidolgi, ndi hay caa war je gayre maga hay wii kaygen wo de wel holge maga je kayge ɓe bay wa mono.

¹³ Bosaʼ ma ti je maga huu go mo ɓuy hay le ferge nà ti ɓi, ndi hay go fruy ɓil wãy dewur no.

¹⁴ Ndi hay de hee keɗedn ti, day se hay de heege ti ɓi doo õõbe nono. Mo ma de deelen hay diŋ õõbe ɓi ma kluu no, diŋ õõbe ma de kaa ti ɓi no.

¹⁵ Ndi hay diŋ nen je rẽw no, ndi hay diŋ ɓaale je grúmn lay.

¹⁶ Ndi hay diŋ pan jar coon wo, ndi hay ooge ti je ma waare no.

¹⁷ Ndi hay go car wer mo ma bay ngar no, ndi hay go yãɗ jar jag ɓe.

¹⁸ Ndi hay wãã ɓin mbi so ga ndi huu ti twore, kiŋgi ɓi joŋ ge wo pur doo duguɗgi nono.

¹⁹ Ga kããge ɓi raw wo yaŋ wo gesiŋ hãã daʼ bii, day meebe nà yaŋ de leʼge yegeɓ ti jag doo ɓi.

²⁰ Ga togoɗge ɓin joŋ ge mbe tumtum defay ti ɓi, day toŋwaa ɓin joŋ ge mbe tum de egre doo ɓi kay.

²¹ À hay coʼ sug ɓi, day à hay gor jag ɓi. À hay go ferge baʼ baʼ ma laa bagge yaŋ ɓin wo.

²² Ndi fer wããre go mokay je ferge ni hay bay wa, day à hay go men wããre ɓin wo ɓod jage.

²³ Á hay wo gor ndi doo ga à gor rage Baa nono á hay wo go hãʼ jag kaʼkaʼ doo jar ma yãã bii ma jag tob nono.

²⁴ Ndi mo feg bà ra layblaʼ no, saara hay bay kaŋ ɗiggi ti sen wa. Nen ɓaara hay bay go farge ti ɓi wa.

²⁵ Ndi hay seege wer ɓaara, day ndi hay hayge pel ɓaara. Ndi hay de hayle doo waŋ yoo soode wo nono, doo je maga teŋ nen jar ma nen lawge wo nono.