JOB 28 - Tupuri Bible

Koge re daʼ wer doo jobo gà

¹ Ngel maga à horge boo solay le go gesiŋ ni yaŋ, ngel ma ray sir ma nen boo biŋni go yaŋ lay.

² À daʼ boo le nà nen siri, à yor kudi go mono se kol go boo.

³ À cwaa wo gesiŋ ti ngel ma de suŋgu no, à raw wo gesiŋ hãã wo nen sir kiɗ húulì ma de yoŋre wo nen suŋgu wo ɓi tuu kuɗum.

⁴ À tee tuu wo gesiŋ kuɗum go nen maga ɓaale jar day gesiŋ gà saara kol mbe go fliwgi ɓil ɓe ga tiʼ go hãã see jar téebeere wo.

⁵ À glum nen sir maga naa daʼ hoole le ni le go gesiŋ tem tem doo ga wùu raw le ni nono.

⁶ À daʼ húulì safir nà nen húulì ɓen wo, day à daʼ boo biŋni nà nen beɗef ɓen lay.

⁷ Wedwee ma bag nàyn bay de ko faage ɓen meʼ wa hase, nen krub bay de bagge ɓe wa lay.

⁸ Waŋ nàyre bay wo de heege ni wa, ɓaale mingir bay de woge ni wa lay.

⁹ Je táabay mbug húulì, ndar húulì wo le go hãã le ti gùr ɓaara gesiŋ.

¹⁰ A ɓod blam bii wo yoo húulì wo, day nen ko fen maga ni de el go ɓuy.

¹¹ A mbar dam go ne bii wo pele, ndar nen fẽẽre maga wo de yoŋre wo go.

¹² Day koge re mono, á de tiŋ la genla? Ngel maga à daʼ joŋge de ti le de tiŋ ni nà la genla?

¹³ Je táabay bay de ko yoo ɓe wa, á bay de tiŋ yoo jar téebeere wo wa.

¹⁴ Tuu ma kuɗum wãã ga : A bay ɓil ɓi la wa. Maarog ga : A bay nen ɓi la wa.

¹⁵ À coon de boo biŋni ma bay sir nen gà. Á hoo boo solay ma yeege ɓe gà lay.

¹⁶ À kãã ma ngaɓ põõre ɓe ti klew de boo biŋni ma Ofirn gà bay de húulì Onigs ma de wooren wo de húulì Safir wa lay.

¹⁷ À ngaɓn de boo biŋni gà lay, de doŋdoloŋ gà lay. À coon de kob boo biŋni ma bay sir nen gà.

¹⁸ Húulì Koray wo de húulì Kristal tĩĩ wo see ɓe gà. Joŋge de ko re de daŋ redew wo.

¹⁹ Koge re ngaɓ de húulì Topas ma Etiyopin gà à kãã ma ngaɓ klew ɓaara de boo biŋni ma bay sir nen gà.

²⁰ Koge re a le cwãy nà gen mo so la? Ngel maga joŋge de ti ngel le de tiŋ ni ne gen la?

²¹ Á go de yoŋge, nen fen ma tenen caw ɓuy kon gà. A daʼ wer go doo weere dweere wo gà lay.

²² Tuu ma kuɗum ma yeɗ nen jarn wo de húulí wãɗ wo ga : Sug wùr hay laa wo wããre ti ɓe laage tawa.

²³ Go de daʼ wer ne faage ɓen diŋ Baa, de ko ngel maga a le de tiŋ ni diŋ se.

²⁴ Werga, je maga ko wo go jag sir tawge ɓuy nà diŋ se, nen ɓe ko go ti tamsir la ɓuy.

²⁵ De maga a ngaɓ põõre leege go, ɓod haagu go ne bii wo,

²⁶ De maga á hã jag liŋgi go ne harage baa, ɓoʼ faage go ne sagge baa wo de carge põõ baa mono,

²⁷ Se kon le nà de se no, se raw naa nen ɓe go. Se raw ɓoʼ wer ɓe le, day daʼ wer le go ne hẽn de ele.

²⁸ Blam ɓe se kal riŋ je tabayn ga : Joŋge hẽẽne doo Waŋkluu diŋ koge re no. Maŋge ɓil go see ɓlagge diŋ joŋge de ti ngel no.