JOB 27 - Tupuri Bible

Job ɓoʼ ti wããre ɓen go : Ndi day laa re ɓayn gà

¹ Job kal ferge jag wããre ɓen pa, day ga :

² Baa maga bay go cag re ɓin wa yaŋ mbe tenene, á diŋ je ma de egre ɓuy maga hã lawge me debaŋ ti maysee ɓi mono.

³ Hayba hun layblaʼ de maga ndi yaŋ ɗiggi ɗa, day ɓodge egre mani Baan yaŋ le go ɓodge hũy ɓi ɗa mono,

⁴ Jag ɓi wãã ge mopo ma bay ngar gà ndi ngrum gi jag de ɓlagge gà lay.

⁵ Ndi riŋ gi ga wããre ɓayn ni gà hase! Ndi wãã ge mbi tum ga ndi de deele hãã ndi wo go huugi.

⁶ Ndi oo mbi tum ti keɗed ɓi no, day ndi gay ge gà hase. Jiili ɓi bay ndar ndi ti mopo ga ndi hay joŋn we de ɓlagge ti naw ɓin wo wa hase.

⁷ Daga re ma ti je hee ɓin mo hay diŋ te ma ti je debaycõõre no. Daga ma ti je maga ur de ɓi mo hay diŋ te ma ti je de ɓlagge no.

⁸ De maga à yee ge nen je ɓlaggen we go day Baa baan we go mono, á gor bà mayse blam sen pa la?

⁹ Baa laa ge mbe roo ɓe de maga re caan ge mo yawla?

¹⁰ Je ma de egre ɓuyn joŋ mbe yaŋ diŋ nen mo ɓen yawla? Á tos mbe Baa yaŋ ti naw tum yawla?

¹¹ Ndi kaŋ nen ɓay ti egre mani Baan so, day ndi yoŋ ge ɗiggi ma ɓil je ma de egre ɓuyn wo ne nday gà.

¹² Ane nday de see ɓay nday yaŋ mbay go de koge ɓe de ele. Day wer mayse ga nday men see ɓay ne fen ma de koɗkoɗn la?

Job ga : A mbe cwãy ga je ɓlaggen joŋ wo wolaŋ gà

¹³ Mokay diŋ fen maga Baa go de bag jag ɓe ti je ɓlaggen mono, diŋ daʼge maga je debaycõõren daʼn le doo je ma de egre ɓuyn mono :

¹⁴ Weere ɓe mo hay bà wo ngaɓa, saara go ma moslam. Wer mani ɓen wùu wo go de hoole gà lay.

¹⁵ Jar ni ɓe maga sen gwaʼ wo mo mbag no, bulfũŋ teʼ ge sen wo ge go lay. Naare dewur ɓaaran raage wo ra gà lay.

¹⁶ A mo tay bà solay debaŋ doo sir nono, á mo tay bà õõbe wo doo pãy nono,

¹⁷ Tay ti ɓaara diŋ se, ane her ge ra go ti diŋ je ma keɗed no je maga bay de re ti wa hoo ge solayn go.

¹⁸ Á hay boo tiŋ ɓen go de fen ma de sõʼge doo mburyug maga je gor ngel baan nono.

¹⁹ Á de suuli tiʼ se de horoge, ane à teen ge doo je horog no gà. A bul nen ɓe go no kay, kola mopo bay wa so hase.

²⁰ Hẽẽne caan ge go doo bii wo nono, degurleege raw ge go de ɓe ti gisiɗgi suŋ.

²¹ Leege ma nen wur botoŋ raw go de ɓe were, day se yee ge nen go. Baa maŋn mbe go ngwag tuu ti ngel maga á hay de hayle ni mono.

²² À jwagn go de waa bay ko decoo ɓe, day se daŋ de ɗee doo ɓe, maga á mo baa se wa.

²³ À ʼwad war go ne hẽn ti, day à niin go de war wer ti ngel maga á hay ni de war were.