JOB 26 - Tupuri Bible

Job fer ne Bildad gano : ndo ko teŋ nen jar debaŋ!

¹ Job kal ferge ga :

² Ndo ko kay je maga egre ɓe hoo go ɗala! Ndo ko maŋ doo je maga gay go, go ciŋ ɗala!

³ Ndo ko bag yaŋ ne je maga bay de ko re wa ɗala! Ndo kaŋ nen jar go ga ndo daŋ go ti ferge wããre ɗala!

⁴ Ndo fer wããre ɓon wo nà diŋ ne wose la? Wose ndar nen ɓaara ne ndo mo la?

Job ga : Ndi yaŋ mbi de ko kluu mani Baa no

⁵ Jar maga sen huɗ wo go daɗ wo wo wer bii gesiŋ de jar maga wo wo ni ɓaara mo ɓuy no.

⁶ Ngel lagge jar húulí wo go pel ɓe ndol taʼa, tuu ma kuɗum ma yee nen jar gon bay de yoŋre pel ɓe wa.

⁷ Hay mbeɗ jag ngel ma ciŋ wo nen ɓaŋ gloŋhwede nà diŋ Baa. Hay kaŋ tamsir mbe taʼ nen leege tuu nà diŋ see lay.

⁸ A bag nen swaare wo go de bii day swaaren leɗ wo le go gesiŋ doo põõre biin gà.

⁹ A yoŋ paale waŋ ɓen go, kaŋ swaare go ti ɓe degarra ɓuy.

¹⁰ Á hay gaɗ mopo delel ciŋ ti bii wo hãã wo go ti ngel maga poɗag wo de suŋgu yiŋ wo ni mono.

¹¹ Dog ngel ma ciŋn daɗ wo doo hẽẽne wer carge põõ ɓe no.

¹² Wer egre ɓe no, se horge bii maarog ciŋ giɓliŋ giɓliŋ, Wer koge ma ti ɓe no, se ham jag horge ciŋ ɓen gesiŋ.

¹³ Wer fuggi egre ma jag ɓe no, ngel ma ciŋ caa go á ʼwar cwe ma de mbeɗgen go de doo ɓe.

¹⁴ Hayga sen wo mo hãʼ diŋ jag bii joŋre ɓe maga nà laɗ sen wo laɗge no meʼ meʼ mo ɗa yaw no, wose laa ge bà wer yaŋ go ne carge põõ ɓe maga á carn de egre ma kluun mo la?