JOB 24 - Tupuri Bible

Job ga : Baa bay bà joŋ jar ɓlaggen wo wa yaw

¹ Wer mayse ga je ma de egre ɓuyn bay go ngaɓ wur kiida ɓen wo go kaʼ kaʼ wa la? Day wer mayse ga jar maga wo de koge ɓe ko wo wur ɓen wo gà la?

² À yaɗ haagu ngel wo, à horge horog wo freŋ day à mbe de ɓaara tiʼ koɗge.

³ À raw mbe de gerhẽẽ wel holge no, à yãã bloodày wãy dewurn ti ɓèere.

⁴ À daw je coon go ti faage, à joŋ mbe doole jar gayre wo maga á mo yee wo nen go.

⁵ Koɗa, á laa wo go de maga waa naa le go doo gerhẽẽre ma yooway wo nono, ma woge jag joŋre ɓaaran wo nen maga saara mo daʼ rege ma jag ɓaara no, day á hã wo rege ne weere ɓaara wo jag nà diŋ de raŋge yooway seno.

⁶ Le yoofíi mono, saara saŋ hõõ ne je ɓlagge no, hãã wo leʼge tlalum ɓen go ne hẽne.

⁷ A nà wo de suŋ ti koɗ bay õõbe ti fen ma laage ti ɓaara doo ceere bay wa.

⁸ Bii Baa ma ti húulìn mbar ra go, day saara hul nen húulì yeʼ yeʼ doo coo duuli.

⁹ À baa wel holgen de waŋ, à kaŋ je coon go wer fẽẽre.

¹⁰ A seɗ wo go glog koɗ has bay õõbe see, wo koŋne de gesaŋ coore ti taʼ taʼa.

¹¹ A yuu wo noo ne jar wo ɓi feele ɓaara, Sii wo de hãw doo deŋ deŋ hãɗ wo yii ne hara, ama saara mbe tum jwaale.

¹² Le ɓi leege ma kluuri wo mo lay no, jar maga wo go de seʼalge gay wo doo roo, maysee jar maga wããge de car rage gay doo ware, ama Baa bay kaŋ ti ti fen horge see ma doo kayn wa ɓuy!

¹³ Jar maapo wo de maŋge diŋ wer jar maga caa wo hee de poɗag mono, bay wo seege ti faage ɓen wo wa, bay wo lagge ni wa lay.

¹⁴ Je id jarn ur go de ceg kãg, day ʼwar je gayren wo go de je coo no, de suŋ mokay se kol see ɓe diŋ je freŋ.

¹⁵ Nen je figliwn cegeɗ ngel de daymola, day se wãã gana : Nen jobo ko ge ndi gà hase se raw laa õõbe go nen ɓe.

¹⁶ A hrag wo jag tiŋ jar nen suŋgu no, day de ceg mokay saara mbar jag tiŋ go ti ɓaara de yoŋre ngel ceg diŋ mayse la bay nen ɓaara wa.

¹⁷ Ngel tee go mokay saara ko see ɓaara doo ga saara nencee húulí nono, werga hẽẽne caa ra go doo ga saara go de huɗgi nono.

¹⁸ Nday ko nen ɓay ga je ɓlaggen go gefeŋ, bii raw mbe de ɓe sog tuu so gà yawla? Daʼge ma ɓen ti tamsir diŋ faɗge day ɓaale ɓe kãã ma maŋ faage ma daŋge wo go ɓil pay tlalum wo gà so gà yawla?

¹⁹ Doo maga sir ma de heeg jo bii Baa de maga ceg caa go nono, tuu húulí lig je maga joŋ ɓlagge go lay gà pa ge!

²⁰ Ngel weere maga hay soɗ ne, yõõ ti ge go ti ɓe day cogcõõre slom wo jag go de ɓe, jobo ɗig gi ti ti ɓe gà has gà pa ge! Je maga see seele ma bay blam we, à haw nen ɓe go doo koo no gà pa ge!

²¹ Nday gana : Á hay yãɗ fẽẽre wãy ma de gedge ma bay weere no, á hay kay wãy dewur de el gà!

²² A bay no wa. Wer egre ɓen mono, Baa yaɗ naw jar ma hãyhãyn wo wo ciŋ ni yaw. A ɗig wo gà saara hoo go ciŋ gà so, kola saara mbaara go ciŋ yir tenen tiʼ koɗe.

²³ Baa raw joŋge ga á mo hay wo go tiʼ bay re see, nen ɓe de koɗ rage ti faage ɓaaran wo.

²⁴ A gẽẽ wo go, kola saara yee nen go has tuu. Á leɗ wo go gesiŋ, wo wo go ti wur ɓaara doo jar téebeere ma ɓuyn wo no lay no. À car ti ɓaara go doo ti coore nono.

²⁵ Hayga á bay doosen no wa no, wose faa ge ndi yaŋ day ham ge jag ɓi yaŋ go ti wããre ɓin wo so la?