JOB 23 - Tupuri Bible

Job fer ne Elifas ga : Bay yiŋ jag me wa diŋ Baa

¹ Job kal ferge gana :

² Hãã wara à ko lawge maga ndi law see ɓi doo ga ndi joŋ ti graŋ nono, ndi gay go doo kuɓ doo jag ɓi ma dig roo ɓi no.

³ Hayga ndi daʼ bà ngel maga á ni la no! Hayga ndi day bà wo go ti ngel hayle ɓen la no!

⁴ De sen mono, ndi wo ge yaŋ naa wer cwãy ma jag ɓin pel ɓe, ndi ʼwũy gi wããre ma jag ɓin wo yaŋ wo go ni.

⁵ Ndi daʼ ge wer yaŋ go ne wããre maga á fer ge ra ne ndi mono, day ni ndi laa ge wer fen maga á wããn ge ne ndi yaŋ go!

⁶ Á nen cag re ɓin layblaʼ, tob egre ɓe go ɓuy see ɓi doo kay so yawla? Ti faage ɓe, á hay maga se de bà mbe doo ɓe meʼ ɗig mopo ti ɓi ɗa lay so.

⁷ Á ko ge mbe yaŋ ga de naa wer cwãy ma jag ɓe pel ɓe mo yeʼ diŋ je maga de deele, day ndi yãã ge yaŋ mbi go tum pel je cag re ɓi no.

⁸ Ndi daw go! Ndi raw nen nen wur botoŋ se bay le ni wa lay, ndi fer nen nen wur bolaw, nen ɓi baan gà lay.

⁹ Ndi mo raw bà wo nen ɓaŋ gloŋhwede, ndi day see ɓe gà lay. Á wo de yoŋre nen ɓaŋ wãyban yawla, nen ɓi laa koge ɓe gà lay.

¹⁰ A mbe go de ko faage maga ndi ti ɓe mo ane. A mo lam bà ndi layblaʼ no, ndi kal ge mbi go tum bay ɗag see, doo boo biŋni ma bay sir nen nono.

¹¹ Ndi hay kaŋ ɓaale nà diŋ ti ɓaale ɓe, ndi hay seege nà diŋ ti faage mani ɓe no, ndi hay cel go gà.

¹² Ndi hay ɓoʼ foo wããre jag liŋgi ma jag ɓen wo go gà. Ndi hay men ɗiggi ɓi go ɓuy joŋge diŋ fen maga kal le go jag ɓe mono.

¹³ Day ma ɓen de maga á oo we go ti mopo mono, wose dign gi yaŋ ga á mo joŋn wa la? Fen maga á ɗign go mono, á joŋn go.

¹⁴ A bag ge jag fẽẽre maga se hay ɗig ra le go ti ɓi ge mbaara go, day joŋ ge ma tigriŋ wo mbaara pa.

¹⁵ Mokay so diŋ fen maga daŋ nenterse ɓi go pel ɓe mono. De maga ndi ɗig wer re sen we no, hẽẽne ɓe caa ndi go.

¹⁶ Baa caa bii go ne ndi ɓili, je ma de egre ɓuy daŋ nenterse ɓi go.

¹⁷ Ham ge jag ɓi go nà bay diŋ suŋgu ma de leʼge ne ndi tin wa, bay diŋ suŋgu maga ɓoʼge me ti mo wa lay.