JOB 22 - Tupuri Bible

Elifas wii Job ma de swaʼa : Jobe, ndo de re ti cwãy

¹ Elifas ma Teman raw wãã wããre day ga :

² Je táabay joŋ mbe yaŋ de el ma kay Baa yawla? Bay wa. Je maga de ko reen draʼ de el ɓen kay nà diŋ se mbe tuu.

³ Ndo mo hay bà keɗed layblaʼ no, sen maŋ mayse baa ne je ma de egren ɓuy mo la? Ndo mo hay bà de deele ti joŋre ɓon wo layblaʼ no, á daʼ mayse ni so la?

⁴ Á hay kaŋ re ne ndo ti, day se wo de ɓo pel kiida nà werga ndo hẽẽ ne mo so yawla?

⁵ Ɓlagge ɓo maga ndo joŋn bay kluu wa yawla? Debaycõõre ɓon bay wo ma keege wa gà yawla?

⁶ Ndo hay mbo horge fẽẽre hẽẽre ɓon wo tuu tuu ga ti ɓèere, ndo hay hog õõbe go ne jar ti, men ra go see koɗe.

⁷ Ndo hay bay hã bii ne je maga jwaale mo wa, ndo hay peŋ je ma koŋnen de rege.

⁸ Sir hay go nen doo bloo ma de horog no, hay go de hayle dlah ti jar diŋ je far ti see ɓe ciŋ no.

⁹ Ndo hay fer naare dewur wo doo koɗe, ndo hay hã pũũri ne weere holge wo.

¹⁰ Diŋ wersen so ga rew wo go de cir ti ɓo ɓuy, day hẽẽne mbe go de caa ndo tuu mono.

¹¹ Nen ɓo bay ko suŋgun wo de bii maŋge maga day wo go ɓoʼge ne ndo ti mo wa yawla?

¹² Baa bay le go ciŋ wa yawla? Ko gér wo wo ciŋ ɗala, á wo wo go ciŋ hãã hãã!

¹³ Day ndo gana : Baa bà de ko mayse so la? A bay cag re ma nen suŋgun wo wa.

¹⁴ Sware wo go de yoŋ nen ɓe, nen ɓe ko le go nen ɓaara gà. Á taw le kiigi nà ciŋ ni tawa tuu.

¹⁵ Mayse so la! Ndo nà de sãy seege ti faage ma ɓaaɓaa maga jar maga bay wo keɗed wa hay maŋn wo mo yawla?

¹⁶ Taŋgu maga wurn bay age ɗa, à bag ra go doo á wo de ɓod wer nà ti pyew maga raw go fud de yuuri mono.

¹⁷ Á hay wo wãɗge ne Baa gana : Maŋ ɓil see ɓo wo go see wùri. A mbe diŋ je ma de egren ɓuy ane, day se kãã ma joŋ mayse see wùr la?

¹⁸ Bà mbe de sen ɓuy hay bag tiŋ ɓaaran wo go de horog nà diŋ se. Ndi day laa bagge yaŋ mani jar ɓlaggen wo gà.

¹⁹ Jar ma keɗedn kon ge wo yaŋ de nen ɓaara, day fruy gi wo yaŋ. Je ma bay re tin feg ge yaŋ ti ɓaara ga :

²⁰ Je maga hay ur le de wùr bay go de yee nen wa yawla? Wùu bay go de roɗ daʼge ɓaaran wa yawla?

²¹ Baa barge go de Baa ni ndo daʼ jam yaŋ. De faage se kay no, nen fen ɓon joŋ ge yaŋ diŋ fen ma de el no.

²² Yãã hadge maga kal le go jag ɓe mono, ɗaw wããre ɓen wo ɓil ɓo.

²³ Hayga ndo fer we le see je ma de egre ɓuyn no, ndo fer yaŋ daʼ see ɓo, ndo maŋ ge ɓil debaycõõren yaŋ wo go see tiŋ mani ɓo no.

²⁴ Ɓoʼ boo biŋnin go nen siri, ɓoʼ boo biŋni ma Ofirn wo go yoo húulì ma ɓil pyewn wo.

²⁵ Ni je ma de egre ɓuyn joŋ ge yaŋ diŋ boo biŋni ɓo, á joŋ ge yaŋ diŋ boo solay ɓo ma de corge kaʼ kaʼ no.

²⁶ Doo kay no so no, je ma de egre ɓuyn joŋ ge yaŋ diŋ fen ma de cõõre jag ɓo, ndo mbuɗ gi nen yaŋ wo ne Baa ti.

²⁷ Ndo kamn ge yaŋ, se laa ge jag ɓo yaŋ. Ndo bag ge jag haʼge jag ɓon wo yaŋ go.

²⁸ Ndo ɗig gi we ga ndo joŋ mopo no, se bag ge jag yaŋ go, day ngel ler ge yaŋ go ne ndo pel ti faage ɓon wo.

²⁹ Hayga á fer ti ɓo we go gesiŋ day ndo wãã we ga sen diŋ maŋge ti ciŋ no, Baa yãã ge je maga jel nen go gesiŋ yaŋ go.

³⁰ Á yãã ge je ma de re tin ge go lay, day wosela ɓuy yãã ge see ɓe go diŋ wer doo ɓe ma bay ɗag no.