JOB 21 - Tupuri Bible

Job fer ne Sofar ga : Je ɓlagge ma nen twore yaŋ mbe lay

¹ Job kal ferge ga :

² Coʼ we sugi, coʼ we sug wããre ɓi no. Teŋ we mbay nen ɓi de sen mokay tawa ɗala!

³ Men we mbay ndi wãã wããre ɗa, day de maga ndi wãã wããre we go no, ni ndo feg ge mbo ti ɓe so.

⁴ Ɓa ndi de riŋgi ga ndi ʼwaa war diŋ ne je táabay ti yawla? Day wer mayse ga see ɓi bay ɗawge doo ɓi wa mo la?

⁵ Mbuɗ we nen me ti ko ndi, ngris wedày ni nday kaŋ we doo go ti dum.

⁶ De maga ndi ɗig ti we ti reen no, see ɓi daŋ me go, nen này ɓi daɗ me go ɓuy.

⁷ Wer mayse ga jar ɓlagge wo mbaara tenen tiʼ mo la? Wer mayse ga á wo wo go hãã ti tããbe ɓaara day mbaara tum de egre ɓil mo la?

⁸ Jar ni ɓaara lag wo tiŋ go ti de nen ɓaara, day saara ko moore ɓaara wo go de nen ɓaara pa.

⁹ Wo liŋ ni ɓaara diŋ jam, re po bay caa hẽẽne ɓaara wa. Jag graw mani Baan bay bag rage wa.

¹⁰ Bloodày ɓaaran mbe tum far ɓiili kããra, mandày ɓaaran mbe ceɓ biŋgi bay go cwaa ɓiili wa lay.

¹¹ Á men wo kamliiri ɓaara wo go ti ɗee tiʼ doo fǐiri wo nono, jar ni ɓaara yor wo mbaara ciŋ hãy.

¹² A mbar wo tembale wo de dilna day joŋ wo fruygi de ʼwadge dãã.

¹³ A bag wo jag naw ɓaaran wo go de fruygi, ane, kola no kay tuu húulí caa hẽẽne ɓaara go.

¹⁴ Bà mo pa yaw á hay wo wiɗ Baa ga : Maŋ ɓil wo go see wùri, wùr bay de sãy daʼ wer go ne faage ɓon wo ti wa has ɓuy.

¹⁵ Á hay wo wãɗge ne hẽn ga : Je ma de egre ɓuyn bà diŋ wose maga wùr joŋ peele ne hẽn la? Wùr daʼ bà mayse ti maga wùr joŋ kamkam ne hẽn mo la?

¹⁶ Cwãy, fruygi ɓaaran nà nen doo ɓaara mbe, ane ndi day laa bagge yaŋ mani jar ɓlaggen wo gà hase.

¹⁷ À yaŋ mbe ko lampa mani jar joŋ ɓlaggen wo go huɗgi ceɓe noga Baa cwaa ne hara ti day kaŋ põõre ne hara ti de bagge põõ ɓen yawla?

¹⁸ Á yaŋ mbe trom rage wer doo fíi maga leege hoon wer nono noga doo hoole maga degurleege pudn ciŋ no yawla?

¹⁹ Baa go de kaŋ re taʼ nà ma gor weere mani je ɓlaggen wo tawa yawla? Baa hay nen hã pũũri nà diŋ ne hẽn nen maga á mo ko se.

²⁰ Je ɓlagge hay nen maga se ko coocoo ɓen de nen ɓe, hay nen maga sõõge ɓil mani je ma de egre ɓuyn hã pũũri go ne hẽn twore hã mbe.

²¹ Kidolgi, de maga á huu go, day naw ɓen bag wo jag go mono, re jar ni ɓe maŋ ge wo see ɓe gà so.

²² À had de koge re nà diŋ Baa maga cag re jar maga wo go ciŋ kluuri ti kããran mbe mo yawla?

²³ Jobo yaŋ mbe huugi nen de deele ɓen de maga se jam yeʼ go de yõõ ti day bay ɗig mopo meʼ wa has mono,

²⁴ Yaŋ mbe huugi de naa bay ti ciŋ ɗir doo goɓre, day hm ɓe wo de noo ɓil de el ɗa mo lay.

²⁵ Je ma lan huu ɓen nen lawge, bay ko fruygi no.

²⁶ Day saara ɓog ɓuy wo wo nà nen siri, day cogcõõre laa ra go ɓog ɓuy.

²⁷ Ndi yaŋ mbi go de ko ɗiggi ɓayn wo de ele, go de kiɗ wer re maga nday da wããge ɓe ma riŋgi ga ma ɓin coo gà mono.

²⁸ De maga nday wãɗ ga : Tiŋ mani je toren bà genla? Tiŋ maga jar ɓlaggen hay wo ɓil ɓe bà gen kaʼ la mono,

²⁹ Day mayse so la! Nday bay wiɗ jag jar maga her wo mo wa yawla? Day nday riŋ nà ga nday hoo sug ti fen maga á naa wo wer ɓe go de el mo gà so yawla?

³⁰ Ti wur maga re caa jare, day bagge põõ Baa joŋ jar mono, mopo joŋ je maga joŋ ɓlaggen mo gà yaw.

³¹ Wose day ruun yaŋ ti seele ɓe go pel ɓe deŋ la? Wose day joŋn yaŋ de te fen maga á hay joŋ jar de ɓe mo la?

³² À wo go de je sen ti ngel ter jar lay, day à ʼwũy mbe tipaale ɓe go ti ngel ɓe lay.

³³ Sir ma ɓil logn laa mbe ne hẽn ti de woore lay. Jar debaŋ see wo wer húulí ɓe, jar ma tigriŋ ngaɓa ngaɓa see wo pel húulí ɓe lay.

³⁴ Wer mayse ga nday a ɓayn teŋ nen ɓi de wããre ma car jiili ɓi go la? Fen maga gwaʼ le jag ɓay ma ferge ne ndi pa diŋ jãɗge de koɗ koɗe.