JOB 20 - Tupuri Bible

Sofar wãã re pa : Re wo debaŋ ti je ɓlagge no

¹ Sofar ma Naama kal wãã wããre day ga :

² Ɗiggi ɓi laa suuli gà day se srog wer ɓi maga ndi mo fer wããre. Sen nà wer see ɓi maga laa hayle gà mono.

³ Sug ɓi laa ruugi maga wuɗ wo ti ɓi go de sõõre mono, day koge re ma ti ɓin raw kaŋ nen ɓi ti yiŋgi jag ti ɓaara.

⁴ Ndo bay bà de koge ga le ɓaa tum, hãã le ti wur maga à ɓoʼ je táabay ti tamsir so,

⁵ Ga blum maga jar ɓlagge naan wo nà ma naw mbage noga fruygi mani je maga bay de re Baa wa joŋ wo wolaŋ gà wa yawla?

⁶ A mo gẽẽ bà ciŋ hãã wo go daʼ ngel ma ciŋ, day ti ɓe mo wo bà go duʼ swaare Baa yaw,

⁷ A sõʼ ge mbe go ma tum doo jããre nono, day jar maga hay wo de koge ɓe wãã ge wo yaŋ ga : A yee nen go nà genla?

⁸ A dwas ge go doo lwaʼge nono, day à daʼn ge gà so hase. À yõõ ge ti yaŋ go ti ɓe doo fen mbuɗgi nen ma de suŋ nono.

⁹ Nen maga hay koge ɓe, joŋ ge wo tum koge ɓe gà so. A yee ge nen go has ti ngel maga se hay de hayle de tiŋ ni mono.

¹⁰ Jar coo re ge wo jar ni ɓe wo go, day se fer ge mo maga hay diŋ nen horog ɓe yaŋ go ne jar de doo ɓe.

¹¹ See ɓe hay go see ɓe woŋ woŋ doo ma ti jõõ ɓe nono, ama se wo ge suugi nen sir de egre ɓen ɓil hmid ɓuy.

¹² Hayga ɓlagge yaŋ de yãã jag ɓe, day se yaŋ kaŋ kiŋ go ti ɓe,

¹³ Hayga á mbe swẽd joŋge ɓe bay go mege ɓe wa, day ɗawn le jag ɓe no,

¹⁴ Rege ɓen wo kol mopo ne hẽn ɓili, á kol ge wo ne hẽn ɓil diŋ nee bondro.

¹⁵ Á hay lig horog wo liggi, day se dug girage go. Baa naa ge ra le go ne hẽn ɓili.

¹⁶ A soɓ nà diŋ nee cwe yee wo, saŋ mucúmcùm ʼwarn ge go.

¹⁷ Daga á mo kaŋ nen ɓe ti noo yõõre wo de noo-pãã maga yuu wo doo bii yuuri wo, doo maarog ma de pããge wo, doo pyewre wo no mo wa!

¹⁸ Á fer ge fen maga se hay daʼn le de gaali go, day se re ge go doo ɓe gà so hase. Horog maga á hay daʼ ra de trere mono, se re ge ra go de fruygi gà has lay.

¹⁹ Werga á hay ndreɗ jar coo wo go, hay tob ra go. Á hay frum tiŋ jar go, day fer bor rage ni gà so.

²⁰ Á hay bay ɗaw see ɓe se koŋne ɓil ɓen wa. Wer slagge nen ɓe no, se men mopo go raw see ɓe gà.

²¹ Fen maga hay yãã see ɓe go jag hun ɓen bay wa. Ane twore ɓen joŋ ge wo wolaŋ gà.

²² De maga se joŋ mbeŋ we go so mono, coocoo baan ge go. Joŋre ɓe ma honla ɓuy á ge de re ne hẽn ti.

²³ De maga ɓil ɓe go de wùri mo maŋ maŋ so no, bagge põõ Baa raw leʼge ne hẽn ti so. Waa ɓen yuu wo ne hẽn ti doo bii Baa nono, saara daŋ ne hẽn nen này cõd cõde.

²⁴ Hayga á daŋ we de ɗee doo moslam no, waa boo dobn fal ge ne hẽn see.

²⁵ A mo naa bà waa le go see ɓe, mo naa bà manjaw ma ti jiiri ɓen le go, hẽẽne caan ge mbe yaŋ go.

²⁶ Suŋgu ma honla ɓuy wo le go de kaŋge taʼ ma age ɓoʼge ne hẽn ti. Wùu maga ii jag doo jobo gà roɗn ge go, day fen maga gwaʼ ge liŋ ni ɓe ni kol ge go diŋ dramgi pel ɓe.

²⁷ Ngel ma ciŋ naa ge nen debaycõõre ɓen go, day tamsir ur gi de ɓe lay.

²⁸ À tor ge daʼge ma liŋ ni ɓen wo ge go. À horge ge ra go ti wur bagge põõ mani Baa no.

²⁹ Mokay nà diŋ fen maga Baa kaŋ ne je ɓlaggen ti, diŋ fen maga Baa a de ɓe ne hẽn ti wer wããre ɓen wo mono.