JOB 2 - Tupuri Bible

Re ma de ɓog maga caa Job mono

¹ Ti wurpo weere mani Baan raw wo age lagge pel Manwuri, day Manhúulí raw age yoo ɓaara ooge pel Manwur lay.

² Manwur day riŋ Manhúulí gana : Ndo a le genla? Manhúulí raw ferge ne Manwur gana : Ndi hay le raŋ tamsir go mbeɗ ɓaale ɓi ni caw caw.

³ Manwur kal riŋ Manhúulí gana : Nen ɓo baa wejõõ ɓi Job gà yawla? Jobo bay doo se nono ti tamsir wa, á diŋ jobo ma keɗed lay de deele lay. Á joŋ hẽẽne doo Baa, bay da re ɓlagge see ɓe wa lay. Á bay deɓay see ɓe ti faage keɗed ɓe wa, day ndo srog wer ɓi go ma taw naw ɓe de koɗ koɗe.

⁴ Manhúulí kal ferge ne Manwur gana : Cog jobo nà diŋ re ma ɓe, day jobo coo hõõgese ɓe nà diŋ de hõõgese je tigriŋ!

⁵ Ama, duʼ mbo hm ɓe wo de maysee ɓe ɗa, ndi go de koge ti ɓi cwãy ga á ɗar ge ndo go poɗage.

⁶ Manwur day riŋ Manhúulí gana : Patala, ndi go de hã saale ɓe mo doo, ane baa doo ne tenen ɓe see wa.

⁷ Mo so no, Manhúulí raw naa see ɓe go pel Manwuri. Blam ɓe se raw kaŋ cege wããge ma de hãã ne Job ti, tĩĩ le ɓi coo ɓaale kaʼ leʼ go ti ɓe.

⁸ Job raw maŋ gidiŋdiŋ ma horog see ɓe day raw hayge go nen sããge.

⁹ Wãy ɓe day riŋn gana : Ndo mbo tum nà de oole ngiŋ nen keɗed ɓon bla! Ɗar Baa go ɗare ni ndo huu go jag ɓo!

¹⁰ Ama Job kal ferge ne hẽn ga : Ndo wãã wããre doo wãy maga bay de ko re wa nono! Naa yãã mo ma de eln doo Baa, day naa da re maga á kaŋ ne naa ti gà an yawla! Ti sen ɓuy Job wãã ɓlagge de jag ɓe gà hase.

Bar Job wo swaʼ a wo koge ɓe

¹¹ Bar Job wo swaʼ raw wo laa re maga car wo Job mo ɓuy no, day wosela ɓuy raw urgi le ɓi sir ɓe. Á hay wo diŋ Elifas ma Teman, Bildad ma Suwa wo de Sofar ma Naama. Saara kal tay kããra le ma age lawge ɓe, ma teŋ nen ɓe.

¹² Á raw wo hoo nen ɓaara ciŋ, kon wo wo hãã yeʼe, se maŋ jobo nen ɓaara gà so, saara kal laa roo. Á raw wo ngrag õõbe ɓaara ma kluurin wo go, lag wo sir ciŋ.

¹³ Saara raw lagge gesiŋ ti tamsir see ɓe nen síilí renam de naw renam lay, jobo yoo ɓaara bul jag go wãã mopo ne hẽn gà hase werga á hay wo de koge ga re ma see ɓen kluu debaŋ.