JOB 19 - Tupuri Bible

Job fer wããre ne Bildad : Je yãã ndi a ge mbe yaŋ

¹ Job kal ferge ga :

² Nday men ge gay maysee ɓi nà hunla? Nday men ge ndreɗ mege go de wããre ɓayn wo nà hunla?

³ Ko we ga nday dog kaŋ sõõre we go me ti ɓaale hwale, day sõõre bay joŋ weege ti maga nday de gay coo ɓi mo wa yawla?

⁴ Riŋga ndi hay yee sen so, yeege ɓin fer nà ne ndi ti mbe.

⁵ Hayga cwãy kidolgi nday hoo de ɓi, day nday ruu ndi ti maga ndi mbuɗ fuy go mono,

⁶ Ko we an ga kaŋ cerge me see diŋ Baa, a klew ndi go de bãybãy ɓe no.

⁷ Ndi mo wãã bà ga ndi sogn de girgiri, ndo bo yiŋ jag me gà. Ndi ga caa war ɓi le, je ma cag re ɓin bay wa lay.

⁸ A ɓoʼ koo go ne ndi ti faage ɓi no, ndi kãã ma seege pel gà so. A ɓoʼ suŋgu go me ti faage ɓin wo.

⁹ A hog togoɗge ɓin go me ti, maŋ gawraŋ ma ti ɓin go.

¹⁰ Á blul ndi go gesiŋ day ndi taw ge mbi go so. Á naa kããge mo maga ndi hay gorge ɓe go ciŋ doo koo nono.

¹¹ Á caa jiili go me ti, kol ndi go doo jar hee ɓe wo nono.

¹² Soode ɓen tay wo le go see kããra ɓuy, hwẽʼ wo faage le. Á a wo go daʼ ndi, day kaŋ wo me jag tiŋ go de cir ti ɓi ɓuy.

¹³ Á maŋ ɓil hẽẽre ɓin wo wo go see ɓi, day jar maga hay wo de ko ndi mo ɓuy dus wo wo go hãã hãã see ɓi.

¹⁴ Kawre ɓin tob wo ndi go, jar maga wùr hay de ko kããra yõõ wo ti go ti ɓi lay.

¹⁵ Jar maga ndi de yãã rage liŋ ni ɓi wo de mayre gebeere ɓin ko wo ndi doo waare nono. Ndi nen ɓaara doo je maga saara kon gà nono.

¹⁶ Ndi ɗe wejõõ ɓi no, se day yiŋ jag gà say ndi kamn kamge de jag ɓi ɗa.

¹⁷ See ɓi bay de cõõre jag wãy ɓi wa, ndi kol go de ɓoʼ fõõre no ne weere ma de ɓil ɓin wo lay.

¹⁸ Kamliri wo draʼ tob wo ndi go lay, ndi ur we ciŋ no, saara wãɗ wããre ti ɓi.

¹⁹ Jar maga hay wo diŋ jar ma ti nen ɓi kol wo ndi go diŋ fen horge see. Jar maga ndi hay da rage kol wo go diŋ jar hee ɓi.

²⁰ Hõõgese ɓi wo de này see ɓi ɓog wo go ne hm ɓi ti. Ndi kol go rege diŋ này jag ɓi.

²¹ Ko we decoo ɓi, ko we decoo ɓi, nday bar ɓi no! Werga, Baa baa doo ne ndi see.

²² Wer mayse ga nday nii ndi doo ga Baa de nii ndi no lay la? Maysee ɓi gay coo nen ɓay maʼ ga ɗa yawla?

²³ Jar ɓi ya, wose joŋ yaŋ nen maga wããre ma jag ɓin mo hay wo go de yerge kay la! Wose joŋ yaŋ nen maga á mo hay wo go de kriggi ɓi kefder la!

²⁴ Daga à mo krig ra go de sããne à mo klir ra go de boo de el nen maga á mo hay wo go de kriggi tum ti húulì.

²⁵ Ndi, ndi de koge an ga je kay ti ɓin yaŋ tenene. A ur gi mbe yaŋ le blam taw ti tamsir la.

²⁶ Go blam maga hõõgese ɓi sõʼ ge we go mono, ndi de see ɓi ndi ko ge Baa yaŋ de nen ɓi.

²⁷ Ndi ko ge nà diŋ se tuu, kon ge nà diŋ ndi de nen ɓi, bay diŋ je tigriŋ wa. See ɓi bay hayge eŋ wa so.

²⁸ Nday maga nday wãɗ ga : Naa niin mbe ceɓ doosen nono, ni naa daʼ wer yaŋ ne re ma see ɓen mono,

²⁹ Joŋ we ɓayn diŋ hẽẽne moslam no, werga re maga moslam a de ɓaara ne jobo ti de bon debaŋ. Nday nen koge ga kiida yaŋ gor jare.