JOB 18 - Tupuri Bible

Bildad wii Job pa ga : Rew de ɓoʼge ne je ɓlagge no

¹ Bildad ma Suwa kal wãã wããre day ga :

² Nday men ge wããre ɓay se bay blamn wo nà hunla? Ɗig we de el ni naa wãã we wããre so.

³ Wer mayse ga à ko naa doo horogre wo no la? Wer mayse ga naa ko nen ɓay doo jar loɗge wo no la?

⁴ Ndo maga ndo car jiili go bred bred doo waŋ mono, à nen tob tamsir go wer ɓo so yawla? Húulì mo yaɗ wo day mo men wo ngel ɓaaran wo go wer ɓo so yawla?

⁵ Kidolgi, wùu mani je ɓlaggen huu gi jag go, yããge maga a go de yããge ciŋ kaʼn ham ge jag go gesiŋ.

⁶ Poɗag ma liŋ ni ɓen ɓoʼ ge suŋgu go nene. Lampa ma de hagge ciŋ ti tiŋ ɓen huu gi go.

⁷ Á go caw ti ɓaale ɓe day se hay ge go gesiŋ de were. Ɓoʼn ge go gesiŋ diŋ jag ɓe de see ɓe tuu.

⁸ Werga, à srogn wo go, se bagge ɓaale go ti bày, á see ge go de hee ɓaale ti nen bày.

⁹ Rew go de klew diŋriŋ ɓaale ɓe, saale ɓen wo de creɗge ne hẽn ɓaale.

¹⁰ Gedafya ma bagge ɓen le de yoŋre nen siri, giniɗ de kaŋge ne hẽn ti faage ɓe no.

¹¹ Re a wo le go ti ngel ɓuy caa hẽẽne ɓe, maŋ wo blam ɓe niigi.

¹² Egre ɓe go de hooge doo koŋne, coocoo tum de hebge ɓe.

¹³ Hõõgese ɓe ɓuy car wããge go, jag wel mani húulín go de lorge ɓe see ɓuy.

¹⁴ À caa nen ɓe go see tiŋ ɓe maga se hay de kaŋ ɗiggi ɓe ti ɓe mono. Á san go lad lad doo re ma kluu ma car jar no.

¹⁵ Tiŋ ɓen gwaʼ ge go de koɗe, je maga bay de maŋge see ɓe wa hay ge go ni, day wùu sufre cwaa ge go ne tiŋ ɓen ti.

¹⁶ Kããge ɓe hig wo le go ne hẽn were, jag doo ɓe lwaɗ wo go ne hẽn ti kaʼ kaʼ lay.

¹⁷ À yõõ ti go ti ɓe ti tamsiri, ɗúu ɓe gwaʼ go ciŋ meʼ gà ɓuy.

¹⁸ À baan le go nen poɗag no, day à srogn wo go nen suŋgu no. À niin go ti sir maga jar téebeere wo de tiŋ ni mono.

¹⁹ Á men mbarga noga moo ɓe po jẽd yoo wer mani ɓen gà. Ngel maga á hay ni, jobo gwaʼ ge go ti ɓaale ɓe ni boŋ gà hase.

²⁰ Jar maga naa ge wo wo wurpo ngris gi wo yaŋ doo ko tabul ɓe. Jar ma debalan caa ge wo hẽẽne yaŋ go lay.

²¹ Mono diŋ re maga caa tiŋ mani je maga bay keɗed wa mono. Ngel je maga hay bay de ko Baa wa gwaʼ ge go nà doo kay nono!