JOB 17 - Tupuri Bible

Job ga : Ɗiggi ɓi po bay wa so

¹ Egre ɓi horge go, naw ɓin wo go de kosge day tuu húulí go de gor ndi kaʼa.

² Go de cir ti ɓi diŋ jar feg ti see wo. Nen ɓi laa baa naa gà doo ɗarge ɓaaran wo.

³ Hay diŋ je kay ti ɓi wo pel ɓo diŋ ndo Baa tuu ɗala, werga ndo joŋn we gà no, wose sen day oo yaŋ ti ɓi la?

⁴ Werga, ndo mbar nen ti ɓaara go maga á mo car wo ɓil fẽẽre wo go wa so, day ndo men ge ra naa blum gà lay.

⁵ Jobo maapo ɗe bar ɓe wo le ma ɓes fẽẽre ne hara, paga nen jar ni ɓe wo go de corge doo koŋne.

⁶ Á hay kaŋ wo ndi ma wãã re jar wo, day ndi kol go patala diŋ je maga à ceɗ sããre go ti ɓi.

⁷ Nen ɓi kol go ɓod suŋgu doo re no, see ɓi diŋ gofore.

⁸ Jar ma de deelen caa wo hẽẽne go doo re seno, je ma bay re tin sõõ ɓil ne je maga bay hẽẽ Baa wa ti re ɓi.

⁹ Ane je ma keɗedn mbe de oole ti faage ɓe no, je maga doo ɓe go de fããge teŋ mbe nen see ceɓ ceɓe.

¹⁰ Ma ɓay ɓuy mono, fer mbay tĩĩ wer ɓe pa so, day ndi daʼ ge mbi je ma de ɗeŋ wããre ɓiln ge yoo ɓay ni boŋ gà pa.

¹¹ Naw ɓin taw wo we go, fẽẽre maga ndi hay kaŋ ra pel ma joŋge yeɗ wo nen ɓi go, ɗiggi po bay le ɓil ɓi wa so.

¹² A da wo wããge le ɓil ɓaara ga ngel suŋ diŋ ngel cege, ga ngel go de teege de maga ngel mbe de suŋgu ɗa mono.

¹³ Fen maga ndi de gorge ɓe patala diŋ sir mani jar húulín wo. Ndi wo ge ʼwũy ngel naw ɓin wo ti ngel ma de suŋgu no.

¹⁴ Ndi ɗe tuu húulí ga pan ɓi, ɗe cogcõõre ga man ɓi, ga maygeman ɓi.

¹⁵ Mayse bà ga ndi de gorge ɓe pa la? Nen wose bà de koge ɓe pa so la?

¹⁶ Á raw ge wo go wer ɓi nen sir ni jar húulí wo. Wùr raw ge nà de kããra ɓuy iggi nen siri.