JOB 16 - Tupuri Bible

Job fer wããre ne Elifase : Je sedewa ɓin le ciŋ

¹ Job kal ferge ga :

² Ndi yaŋ mbi de laa te fen ma doo kayn wo ngaɓa. Nday ɓuy nday diŋ jar teŋ nen ɓi maga yaɗ wo wer lawge jar ciŋ.

³ Wããre se ma bay ngarn maŋ wo jag go nà hunla? Mayse cee ɓil ɓo le doosen no ga ndo fer wããre doo kay no la?

⁴ Hayga nday hay nà ti ngel ɓi, day ndi kol go doo nday nono, ndi de wãã wããre nà doo nday mbe no yawla! Ndi de lor nday mbi de wããre wo noga ndi de ceɗ mbi sããre go ti ɓay lay so yawla!

⁵ Ma ɓin ndi mo hay coɓ nen ɓay de wããre ma jag ɓi wo, ndi mo hay bul jag go nà ma teŋ nen ɓay.

⁶ Ndi mo wãã bà wããre layblaʼ no, bon ɓin ham mbe jag gesiŋ gà pa. Ndi mo hay bà baʼ layblaʼ no, day bon men ge ndi go nà mege la?

⁷ Patala cwãy mono, Baa, ndo gay ndi we go. Ndo ɓlag tiŋ mani ɓin go ɓuy.

⁸ Ndo ɓoʼ me go gesiŋ. Ngogre ɓin diŋ fen maga cer ndi, day se joŋ sedewa ga ndi de re ti.

⁹ Baage põõ ɓen njegad nen này ɓi go, á peg go ne ndi ti. A cẽʼ saŋ me ti de waŋ. Nen je hee ɓin cor go me ti.

¹⁰ A hãɗ wo jag go ne ndi ti. A mbar wo ndi haw ma mbuɗ fuy ɓi go. A maŋ wo põõ le me ti.

¹¹ Baa hã ndi go ne kamliiri wo doo joŋ coo. Á kaŋ me go leʼge ne jar ɓlagge wo ɓi coo doo.

¹² Ndi hay go de hayle eŋ, se gejag me go. A hẽn gor ɓi go gesiŋ, day hrag me go. Á hay hay ndi go yeʼ ma ko jag nee waa see ɓi.

¹³ Jawre ɓen a wo le ti ngel ɓuy sor ndi, á sor ndi hẽẽre, bay baa doo ɓe meʼ wa ɓuy. Á yuu meyẽw ɓi go gesiŋ.

¹⁴ Á caa ywaale mbe ne ndi ti pa, mbe ne ndi ti pa. Á caa ɗee me ti doo je durgi nono.

¹⁵ Ndi kol go ma laa tãy õõbe ti ɓi, kol go ma torʼãy nen ɓurgi.

¹⁶ Nen ɓi kol go de corge doo roo, nen ɓi baɗ go ma húulí.

¹⁷ Re sen de ngil ndi, werga doo ɓi bay de ma joŋ mopo ma de ɓlagge wa lay, day tosge ɓin tum hay go ti ngel ɓe lay.

¹⁸ Siri, jo cíi ɓi go wa! Daga roo ɓin mo day wo go ti ngel ɓuy!

¹⁹ Ma patalam no, je sedewa ɓin le go nà ciŋ, je yiŋ jag ne ndin le go ti ngel ma ciŋ hããn wo.

²⁰ Bar ɓin feg wo ti ɓi, day ndi de kamge de mberbe nen nà diŋ Baa.

²¹ Daga á mo joŋ nen blaw je tabayn wo go de Baa ɗala, mo blaw wel je táabay wo go de bar ɓe no!

²² Werga, kiŋgi ɓin wo go de bag jage, day ndi maŋ ge nà diŋ faage maga ndi fer ge le gà so mono.