JOB 15 - Tupuri Bible

Wããre Elifas ma de ɓoge : Je debaycõõre daŋ re gà

¹ Elifas ma Teman kal wãã wããre day ga :

² Je ko reen yiŋ mbe jag yaŋ ti mopo de wããre ma bay ngar yawla? A maʼ mbe jag jiili ɓe yaŋ ti leege maga a le nen wur botoŋ mo yawla?

³ A dur yaŋ mbe ti see ɓe de wããre maga kay wo jar gà noga de wããre po maga maŋ wo mopo gà wo yawla?

⁴ Ndo de see ɓo tuu ndo joŋ ga jobo mo joŋ hẽẽne doo Baa wa lay, ndo kaŋ wer jar ga jobo mo ɗig mopo ti see ɓe meʼ draʼ pel Baa wa so lay.

⁵ Werga, wãã wããre de ɓo nà diŋ debaycõõre ɓo no, day ndo wãã wããre patala doo jar ma de hila jag wo nono.

⁶ Bay baw ndo de wããre diŋ ndi wa, diŋ jag ɓo. Kaŋ re ne ndo ti nà diŋ trum ɓo.

⁷ Biŋ go taŋgu yoo jar téebeere wo nà diŋ ndo yawla? À hay biŋ ndo go ti tamsir la taŋgu húulì wo yawla?

⁸ Ndo hay laa re ma de yoŋre ma jag Baan wo we yawla? Koge reen ɓuy nà doo ɓo yawla?

⁹ Ndo de ko mayse ga wùr kon gà an la? Ndo de laa wer mayse ga wùr bay de laa wer ɓe wa an la?

¹⁰ Jar ma ti de boo ga wo go de tããrebe yaŋ wo yoo wùr la, kiŋgi ɓaara pur debaŋ de daŋ pan ɓo.

¹¹ Teŋge nen maga Baa teŋ nen ɓo mo deŋ ndo ko ga sen nà diŋ mopo ma meʼ gà pa ge! Hayba mbe de wããre ma desãy maga à wãã ne ndo mo ɓuy no!

¹² Jiili ɓo wo de ɓo nà genla? Wer mayse ga ndo ndar nen ne wùr la?

¹³ Ndo fer ɓon sõõ ɓil ne Baa ti, day jag ɓo wãɗ wããre ma doo kayn wo bla!

¹⁴ Je táabay bà diŋ mayse so ga se joŋ go de fããge so la? Je maga biŋ le go ɓil wãy bà diŋ mayse so ga se joŋ go keɗed so la?

¹⁵ Baa bay de kaŋ ɗiggi ɓe ti jar peele ɓe ma bay ɗagn wo wa yaw, day ngel ma ciŋ wo draʼ bay wo go pel ɓe de fããge wa yaw.

¹⁶ Yoʼ no maʼ ne jobo ma horge se ma de ɓlagge no, ne je táabay maga jo ɓlagge doo bii no mo yawla!

¹⁷ Coʼ sug ɓo, ndi naa wer ɓe ne ndo! Ndi sii fen maga ndi hay kon ne ndo.

¹⁸ Diŋ fen maga jar ma de ko ɗeŋ wããre hay wããn wo le, diŋ fen maga á hay ɗaw wo jag ti ɓe gà day saara hay laan le jag pããre ɓaara wo mono.

¹⁹ À hay hã tamsir nà ne hara doo tawa, day nen wããre ma waare bay de kalge yoo ɓaaran ni wa ɗa.

²⁰ Je debaycõõren ɓen mbe tum tum nen bone, hãã nen tenen ɓen ɓuy. Mono diŋ fen maga je hun taw kiŋgi ma ɓen wo go nen ɓe mono.

²¹ Sug ɓe laɗ re ma joŋ hẽẽne wo. A mbe go jam yeʼe, kola je frum jarn a mbe ne hẽn ti rus koɗe.

²² A ɗig po ga se yãã yaŋ go jag suŋgun lay gà. Á leʼ mbe go tum jag moslam.

²³ Á wo ɓaŋla, wo ɓaŋla ma kiɗ hoole ma jag ɓe no, go de koge ga wur ma de suŋgun de gor se.

²⁴ Re wo de lawge car wo hẽẽne ɓe go, hebn wo go doo waŋ po maga go de gragge ma durgi nono.

²⁵ Werga, á maŋ doo ɓe ciŋ see Baa, á ngaf pel de je ma de egre ɓuy no.

²⁶ A ur ɗee wo ne hẽn ti de gidigli doo, day ɓod bum pel ɓe.

²⁷ Á hay ãd haw go doo goɓre, maŋ jag jiili go ciŋ doo này.

²⁸ Ama se hay ge go ti tabul ɓi leege maga à ɓlag ra go, go ɓil tiŋ maga à bay nage ni wa ga go maŋ ma leʼge nono.

²⁹ A joŋ ge de horog gà so, horog ɓen fer ge le doo ɓe gà so lay, wer mani ɓen joŋ ge wo tiʼ ti tamsir gà so lay.

³⁰ Á caa ge ɓil go de suŋgun gà wùu roɗ ge jag doo ɓe wo go, ɓodge egre ma jag Baa maŋ ge ɓil ɓe yaŋ wo go.

³¹ Daga je ɓlaggen mo kaŋ ɗiggi ɓe ti ngel de koɗn wa, á jãɗ see ɓe nà jãɗge. Werga, à poɗn ge nà diŋ de ngel de koɗn lay.

³² Sen bag ge jag go bay day wur húulí ɓe maga hay de ngaɓge ne hẽn mono, day jag doo ɓe fer ge goɗge gà so.

³³ A sulul gi mbe ge go tuu doo leʼge tlalum maga wo gwagu ɗa nono, á laa ge fuɗgi go doo koo Olifiye nono.

³⁴ Jar ma ɓi feele mani je maga bay da re Baa wa geɗ ge wo go, wùu roɗ ge tiŋ mani je ma da mandekoɗn ge go.

³⁵ Maŋge ɓiili ɓlagge wo biŋgi diŋ re, sen diŋ doo maga jobo hã ɓil ɓe go sagsag maga hila mo maŋ ɓiili ɓil se nono.