JOB 14 - Tupuri Bible

Job wãã pa ga : Je táabay bay diŋ mopo wa

¹ Je táabay biŋ le go nà ɓil wãy! Tenen ɓe nà nen naw mbag koɗe day se tum nen re.

² Á hay jaw le go doo fuɗgi mopo nono, day à caan go. A see deparday doo nencee nono, day se oo gà so.

³ Nen ɓo de kaŋge nà ti ɓe! Ndo joŋ ga ndi mo wo yiŋ kiida de ɓo!

⁴ Wose naa mo ma de fããge yaŋ le go nen mo ma de ɗag la? Jobo gà.

⁵ Hayga ndo yaŋ go de ngaɓ naw ɓen wo, ndo yaŋ go de kee few ɓen wo, day ndo yaŋ go de wããge ga naw no kay á cegaɗ sen go gà no,

⁶ Ni ndo maŋ nen ɓo go ne hẽn ti, day á mo daʼ iggi, nen maga jag ɓe mo caa mbe feg meʼ tõõ doo je joŋre ti solay feg de maga á taw joŋre ma nen síilín go no ɗala.

⁷ Ma koo mbe tum de daʼ see ɓe, à mo caan bà go, se fer mbe goɗge, day gùr ɓe fer mbe jor weere pa.

⁸ Kããge ɓe mo gar bà wo go nen siri, gùr ɓe mo fer bà sir go ti layblaʼ no,

⁹ Á fer ge mbe goɗge de maga jag tob a mono. Á fer go jorge doo koo ma klee nono.

¹⁰ Ama je táabay huu go mokay hoo egre go tuu. Je táabay huu go mokay à daʼn bà gen pa so la?

¹¹ Bii maarog õg wo go, maarog ma de pããregen hig wo ɓil go.

¹² Je táabay suu mokay se ur go ciŋ gà so has doosen no lay. A pũy gi go taŋgu maga ngel ma ciŋ yee nen go gà ɗa gà á men ge leʼ naa ɓe ma wolaŋlaŋ go gà lay.

¹³ Ɗawa ɓen yoŋ ndi wo go ni jar húulí wo, ɓoʼ ndi wo go de yoŋre ni, hãã ɓil ɓo mo fug go ne ndi ti ɗa. Ngaɓ naw ɓin go nen maga ndo mo fer ɗig ti ti ɓi ɗala!

¹⁴ Hayga je táabay huu la fer le go tenen pa no, ndi de hay go tum nen naw gorge jag joŋre ɓi no, hãã wo go ti wur maga à a coo ndi mono.

¹⁵ Mo so no ndo ɗe ge ɗúu yaŋ, day ndi yiŋ gi jag yaŋ sãy mo maga ndo hay joŋn de doo ɓo fer ge yaŋ baa ndo.

¹⁶ Ma patala ndo nà de beg ɓaale ɓi caw tuu, nen ɓo ti ɓlagge ɓin taʼ tuu lay.

¹⁷ Debaycõõre ɓin go de saʼ jag ɓil ndar doo ɓo kay, day ndo fer le ndar nen ɓlagge ɓin ciŋ yaw.

¹⁸ Ama húulì leʼ go gesiŋ, day wes nen go. Húulì ndor go ti ngel tigriŋ.

¹⁹ Bii yol jeʼãy wo go, day sir sol wer yuuri ɓaaran wo, ndo yee nen fen maga je táabay de gorge ɓe go nà doo kay no lay.

²⁰ Ndo mbo ceɓ kaŋ cee ne hẽn ti, gay gay se yee nen go. Ndo kaŋ cerge go ne hẽn see kaŋkaŋ, day ndo raw niigi ɓe wo go.

²¹ À de hoo sug ti weere ɓe wo pa so yawla, á ko mopo ni meʼ gà so hase. À de mbuɗ fuy ɓaara yawla? Nen ɓe baa sen gà so has lay.

²² A ɓen mbe de jo bon nen này ɓe, maysee ɓe mbe nen lawge.