JOB 13 - Tupuri Bible

Job ga : Ndi de sãy wãã re de Baa

¹ Kidolgi, nen ɓi hay ko mbe mo sen we ɓuy. Sug ɓi yaŋ mbe de laage ɓe, day ndi yaŋ mbi de daʼ wer go ne hẽne.

² Fen maga nday de koge ɓe mono, ndi yaŋ mbi de koge ɓe lay ndi bay go blam ɓay wa.

³ Ane, ndi da wãã re nà ne je ma de egre ɓuy no. Ndi da naa wer re ɓin ma kay ti see ɓi nà pel Baa.

⁴ Werga, nday ɓayn nday raw cab geteʼn ti kẽẽ debaŋ, day nday diŋ dogdor ma ɓer nen wããge ɓin de koɗ koɗe.

⁵ Nday de lag we jag baʼbaʼ nà ẽla? Sen mo hay kaŋ nen bà yaŋ ga nday diŋ jar ma de ɗeŋ wããre ɓil yaw.

⁶ Ndi kam nday kamge, laa we mbay fen maga ndi wããn go ti see ɓi mono. Coʼ we mbay sug re ma jag ɓi ga ndi de naa wer ɓe ti see ɓi mono.

⁷ Nday wãã mo maga bay ti ngel ɓe wa yaŋ ma kay ti Baa, noga nday car geteʼ yaŋ ga nday wãã wer ɓe yawla?

⁸ Nday joŋ nà ga nday wer Baa so yawla? Nday da nà kay ti ɓe so yawla?

⁹ A lam bà ɗiggi ɓay la no, ɓil ɓe joŋ mbe yaŋ go ne nday ti feh yawla? Nday ko nen ɓay ga nday jãɗn mbay hãy doo ga à jãɗ je táabay no yawla?

¹⁰ Kidolgi cwãy mono, á ruu gi nday yaŋ hayga nday joŋ fẽẽren de yoŋre freŋ ga ni wii ga nday wer ɓe mono.

¹¹ Kluu ɓen bay joŋ hẽẽne ne nday wa yawla? Hẽẽne ɓe bay bà de caa nday wa yawla?

¹² Wããre maga nday fer ɗig ti ɓaara mo deŋ ɓuy wo diŋ sããge de koɗ koɗe. Ferge wããre maga nday fern mo ɓuy diŋ mo ma de booge de pãy.

¹³ Fer we go baʼa, men we ndi go eŋ! Da wãã wããre nà diŋ ndi! Fen maga nen age me ti mo a mbe.

¹⁴ Wer mayse ga ndi lor này jag ɓi day ndi hã mbi maysee ɓi go la?

¹⁵ A mo riŋ bà ga se ʼwar ndi go layblaʼ no, ndi gor ge mbi nà diŋ doo ɓe kidolgi, ndi dur gi ti see ɓi wo nà pel ɓe.

¹⁶ Ndi daʼ ge bà see ɓi nà diŋ de sen so yaw, werga je maga bay de re Baa wa has kãã ma naa nen see ɓe meʼ draʼ pel ɓe gà.

¹⁷ Coʼ we sug wããre ɓi no, coʼ we sugi! Sug ɓay mo laa mbaara mo maga ndi de naa wer ɓe mono.

¹⁸ Ko we ga ndi da nà ga ndi mo naa nen de el ɓin go. Ndi de koge ga wããre ɓin ti cwãy ɓe.

¹⁹ Wose da ʼwaa war me ti layblaʼ no, ndi go de ʼwũygi ma ferge baʼ lay, ma huugi lay.

²⁰ Ane, fẽẽre yaŋ wo ɓoge, joŋ sen wo ne ndi day ni ndi yoŋ ge see ɓi go doo ɓo gà so. Á wo diŋ ga :

²¹ Doo ɓo mo men cwẽd mege go, day hẽẽne ɓo mo daŋ nenterse ɓi go wa so.

²² Blam sen ni ndo ɗe ɗúu, ndi wãã wããre yaŋ, noga ndi, ndi wãã wããre, ni ndo yiŋ jag ne ndi.

²³ Debaycõõre ɓin wo de ɓlagge ɓin wo nà gãy no la? Kaŋ nen ɓi ti debaycõõre ɓin wo de ɓlagge ɓi no.

²⁴ Wer mayse ga ndo yoŋ nen ɓo go ne ndi, day ndo kol me go diŋ je hee ɓo la?

²⁵ Ndo de sãy fĩd sug koo maga go de daɗge ni ga kaʼ mbe ɗa pa yawla? Ndo de sãy ɗeege wer fíi ma de hegn yawla?

²⁶ Werga, ndo yer ti ɓi tum diŋ wããre ma hã lawge wo ne ndi. Ndo fer kaŋ põõre ɓlagge ma ti jõõ ɓin wo ne ndi ti.

²⁷ Sãy ɓoʼ dala ɓi, sãy maga ndi mo fũy meʼ wa ɓuy, sãy maŋ ɓaale ɓi ti ɓo.

²⁸ Hõõgese ɓi kuyuɓ go doo õõbe maga laa põõre go nono.