JOB 12 - Tupuri Bible

Job fer wããre ne Sofare : Re jar ɓuy doo Baa

¹ Job kal ferge ga :

² Kidolgi je táabay diŋ maysela nà diŋ nday mo lag so no, day koge reen ɓuy taw ti go nà ti ɓay tuu!

³ Ndi de see ɓi ndi mbi de ti ngel doo nday no lay, ndi bay go has wa lay. Wose sen ga wããre ma doo kay wo nono bay wo nen ɓe wa mo an so la?

⁴ Ndi kol go diŋ fen feg ti nen bar ɓin wo. De maga ndi, je ma keɗed no, je ma de deelen ndi ɗe Baa maga á mo yiŋ jag ne ndi, sen kol diŋ fen feg ti pa!

⁵ Je maga re de caage ɓe sen go ma mbuɗ foo! Mokay diŋ jag jar maga re po bay see ɓaara wa mono, day saara wãɗ ti jar maga ɓaale ɓaara ɓaʼ mono.

⁶ Ɗiggi po bay see jar frum tiŋ jarn wo wa. See go de yõõ ti nà diŋ jar maga ɗar wo Baa mono, diŋ wosela ɓuy maga ɗe egre ɓe ga baa se mono.

⁷ Ane, wiɗ jag nàyre wo, á had ge wo ndo yaŋ de mopo. Wiɗ jag weere dweere ma ciŋ wo, á naa wo nen ɓe yaŋ ne ndo.

⁸ Ɗig wer tamsiri, á kaŋ nen ɓo yaŋ ti mopo cẽẽ ma nen maarog siin wo yaŋ ne ndo.

⁹ Wose yoo ɓaara bay de koge ga joŋ fẽẽre sen wo mo ɓuy diŋ doo Manwur gà la?

¹⁰ Maysee mo ma tenen ɓuy nà nen doo ɓe, ɗaw tenen je táabay ɓuy nà diŋ se lay.

¹¹ Sug car ɓil wããre wo go doo ga jag gus rege no lay gà yawla?

¹² Ɗeŋ wããren nà jag jar tããrebe wo, je maga nà pur debaŋ joŋ de ti.

¹³ Ɗeŋ wããren wo de egren wo nà ni Baa, carge ɓil fẽẽren go wo de ti ngel no, sen wo diŋ ma ɓe.

¹⁴ A mbug mopo we go no, jobo kãã ma ferge booge ɓe gà so. A tẽg jag tiŋ we ne jobo ti no, à kãã ma bulgi ɓe go gà.

¹⁵ Hayga á dig bii ma ciŋ we go no, fẽẽren ɓuy hig wo go. A naa jag ɓe we gesiŋ no, se maŋ wo go ti tamsir ɓuy.

¹⁶ Eegren wo de cwãy wããren wo nà doo ɓe. Je maga yee see ɓe go noga kaŋ wer jar go yeɗge wo diŋ ma ɓe lay.

¹⁷ A ɓoɗ foo jar bag yaŋ ma ti sirn wo go, mbar nen ti jar car kiidan wo go.

¹⁸ A yãɗ kluu waŋre wo go day kol saale gebeere ne hara soole.

¹⁹ À horge jar siɗ jagn wo wo go ti daŋgay, À niɗ jar ma ti kluuri maga wo go de lagge dlah dlah go.

²⁰ A yãɗ wããre go ne jar maga wãɗ wo wããre go de yõõ ti jage, yãɗ koge re mani jar tããreben wo go.

²¹ A mbuɗ foo jar kluuri sirn wo go, far gobogray go ne jar egren wo ti.

²² A naa wer fẽẽre ma de yoŋre ma wer ngel ma de suŋgun wo le go, daʼ wer go ne ngel suŋgu ma ɗiliglig no.

²³ A tes wer jar wo, day se taw ra go. A dus wer jar wo wo wo go, day se fer ra le see kããra.

²⁴ A mbar nen ti waŋre ma ti jarn wo go, day kol ra go seege ɓil puuli ma bay faage wo.

²⁵ Kol ra go lam ngel lamge nen suŋgu, bay poɗage kol ra go woge ɓaŋla ɓaŋla doo jar maga wo go de taage de yii nono.