JOB 11 - Tupuri Bible

Sofar riŋ Job ga : Jobe, fer le see Baa

¹ Sofar ma Naama kal wãã wããre day ga :

² Wããre se ngaɓan wo mo deŋ à fer wããre ti ɓaara gà yawla? Day wããre je jag kraŋn coo mbe tuu gà pa yawla?

³ Ham ge jag jar go nà diŋ wããre ɓo ma pjeg pjegn wo so yawla? Ndo feg mbo ti jare, day je ma ɓoʼ foo ɓo go joŋ ge gà has yawla?

⁴ Ndo gana : Koge ɓin go ti ngel ɓe, ndi go de yogge pel ɓe.

⁵ Hayga Baa da we ga se wãã re, se bul jag go pel ɓo muyla!

⁶ Hayga á mo hay sii ɗeŋ wããre ɓe ma de yoŋre maga daŋ koge reen wo we ne ndo no, ndo de ko mbo yaŋ tuu ga Baa bay bà go de kaŋ ti ti debaycõõre ɓon wo ɓuy wa yaw.

⁷ Ndo kãã we ma daʼ wer go ne mo maga le ɓil Baa de yoŋre noga daʼ wer go ne je ma de egre ɓuyn doo ga á no yawla?

⁸ Á go de daŋ ngel ma ciŋ wo go ciŋ hãã, day ndo joŋ ge joŋge la? A kuɗum de daŋ ngel mani jar húulín wo, ndo ko ge mayse ni lay so la?

⁹ Ngaɓge pããge ɓe de daŋ tamsiri, diy ɓe de daŋ maaroge.

¹⁰ A mo hee bà la, mo ɓoʼ paglam jobo noga ɗe jobo wo jag kiida layblaʼ no, wose day dign yaŋ la?

¹¹ Werga, á de ko jar téebeere maga joŋre ɓaara diŋ húulí de koɗ koɗ mono, á bay maga se hay go yeʼ kiɗ wer debaycõõren kiɗgi wa, nen ɓe kon mbe tuu.

¹² Ama je táabay bay de ti ngel meʼ wa hase. A biŋ le nà doo wel gerhẽẽ ma yooway nono.

¹³ Ma ɓo mono, hayga ndo kaŋ ɗiggi ɓo we de ele, ndo hoo doo ɓo wo ne Baa ciŋ,

¹⁴ Ndo ndar doo see ɓo we go see joŋre hram no, day ndo men re ma bay ngar we ɓoʼ pããre liŋ ni ɓo gà no,

¹⁵ Ndo maŋ ge ti yaŋ go ciŋ bay wããre ti, ndo joŋ ge yaŋ de coɓge lay, bay hẽẽne lay.

¹⁶ Werga, ndo yõõ ge ti go ti bon ɓo no, ndo ɗig gi ti ti ɓe doo bii yuuri maga sol wo go nono.

¹⁷ Caw ɓo joŋ ge yaŋ go tinoo sagge de daŋ wur ɗegere, suŋgu ɓe joŋ ge doo ngel de jag toŋ nono.

¹⁸ Ɓil ɓo suu gi yaŋ go, werga ndo fer ge yaŋ kaŋ ɗiggi ɓo ma daʼ fẽẽre wo. Ndo ko ge fẽẽre sen wo yaŋ ɓuy day ndo suu gi yaŋ go de yõõ ti.

¹⁹ Ndo suu gi yaŋ go lemdeʼe, day je ma duɗ ndo joŋ ge gà hase jar debaŋ a ge wo yaŋ senaʼ ndo.

²⁰ Ama nen jar joŋ ɓlaggen cor ge wo, ngel yãã waŋ ɓaara bay wa hase. Fen maga á wo de gorge ɓe boŋ tuu diŋ húulí.