JOB 10 - Tupuri Bible

Job ga : Baa biŋ me bay ma hã pũũri me wa

¹ Maysee ɓi bay de sãy tenen ti wa so! Ndi bay ma ɗaw jag ti re ma see ɓin wa so, ndi wãã mbi go ti lawge ma ti maysee ɓi no.

² Ndi wii Baa ga : Ko me doo je de ma re ti no wa! Kaŋ nen ɓi ti fen maga ndo heb ndi ti ɓe mono!

³ Ndo kon nen ɓo de el ga ndo mo joŋ bon je maga ndo joŋn de doo ɓo, ndo mo mbuɗ faale go ne hẽne, day ndo mo laa jag jar ɓlaggen wo yaw so ge?

⁴ Nen ɓo ko doo je táabay no yaw, noga ndo ko fẽẽre nà doo jobo maga ɓèere húulí ti ɓe no lay yawla?

⁵ Naw ɓo wo go de ngaɓge taʼ doo naw je maga ɓèere húulí ti ɓe no lay yaw, noga kiŋgi ɓo wo go de baa jag taʼ doo kiŋgi je táabay no lay.

⁶ Nen maga ndo kiɗ wer debaycõõre ɓi no, day ndo wiɗ jag jar ti ɓlagge ɓin wiɗgi ɗa yawla?

⁷ Ndo mbo go de koge de el ga re bay ti ɓi wa, day je yãã ndi go doo ɓo bay wa pa lay mono.

⁸ Hay ʼwũy ndi nà diŋ doo ɓo wo, hay joŋ ndi ɓuy tuu nà diŋ saara day ndo fer yaŋ mbo go ɓlag ndi diŋ ndo tuu yawla!

⁹ Fer mbo ɗig ti ga ndo hay boo ndi nà doo pãy nono, day ndo da mbo yaŋ ga ndo fer ndi nen sir yawla?

¹⁰ Ndo hay hãã ndi go doo pãã nono, day ndo raw baa ndi go doo pãã ma de bagge nono.

¹¹ Ndo hay hee hõõge wo de này see ne ndi ti, ndo hay jag hm ɓi wo de kããge ɓi wo see kããra,

¹² Ndo hay hã tenen me, ndo raw woo ndi. Ɗawge maga ndo hay ɗaw ndi doo hay suu ɗiggi ɓi go.

¹³ Ama, paga ndo hay le go de bag jag mo ma kayn la ɓil ɓo, day ndi de ko fen maga hay le nen ɗiggi ɓo mono. Fen sen diŋ ma kay no :

¹⁴ Ndi joŋ ɓlagge we meʼ no, ndo cereɗ ndi tuu, day ndo men re debaycõõre ɓin go me ti gà hase.

¹⁵ Hayga ndi yaŋ de re ti no, ni ndi hoɓ mbi go koɗ lay! Hayga ndi yaŋ keɗede, ndi bay maŋ ti ɓi go ciŋ wa so lay, ndi mbuɗ fuy go lay, coocoo go de baa mege debaŋ lay.

¹⁶ Day hayga ndi maŋ ti ɓi we go ciŋ meʼ no, ndo nii me doo mingir nono, ndo kaŋ fẽẽre mbuɗgi wo ne ndi debaŋ pa yaw.

¹⁷ Ndo lag jar kaŋ tew ɓi wo ne ndi ti tigriŋ, ndo yaʼ wer sõõ ɓil go ne ndi ti de pel de pele. Soode ɓon coo wo kããra ti ɓi cooge ma taw ndi go.

¹⁸ Wer mayse ga ndo kal ndi le go ɓil man ɓi la? Ndi mo de hay huu go day nen jobo de hay ko ndi gà nà ɗawa.

¹⁹ Ndi de hay doo je maga hay joŋ bà caw ti boŋ gà has nono, ndi de kal le go ɓil man ɓi no kay à de raw de ɓi jag tuu soge.

²⁰ Naw ɓi wo nà diŋ mopo meʼ koɗ gà yawla? Daga á mo men mbe ndi so! A mo maŋ ɓil see ɓe wo go see ɓi nen maga ndi mo fer mbi daʼ see ɓi meʼ ɗa lay la!

²¹ Go taŋgu maga ndi raw, day ndi fer le gà so mono, go taŋgu maga ndi raw ɓil sir ma de suŋgu no, wo nencee húulí mono.

²² Wo ɓil sir ma de suŋgu ɗilig doo ngel suŋ no mono, wo nencee húulí ti ngel maga jobo bay wo wii wer ne kẽẽ ni wa, day poɗag wo ni diŋ suŋgu mono.