WÃÃRE MA DE CÕÕRE MAGA JAŊ YER NE MONO 9 - Tupuri Bible

Jobo biŋ le go rẽw, Yeso raw caa nen ɓe go ko ge

¹ Yeso wo ti ngel po, raw ko jobo maga biŋ le go rẽw ɓil man ɓe ɓaa de hayle yeʼe.

² Jar ma wer ɓen raw wo ɗege ɓe ga : Waŋ, bloo se yeʼ biŋ le go rẽw doo may ɓa? Wer ɓlagge ma ɓe de see ɓe yaw, noga wer ɓlagge ma pããre ɓen wo?

³ Yeso raw riŋ rage ga : Bay wer ɓlagge ɓe wa lay, bay wer ma pããre ɓen wo wa lay. Á biŋ go rẽw ma naa nen joŋre Baa go ga jar mo ko ga Baa de kããge.

⁴ Ngel yaŋ de cege ɗa, naa mo joŋ joŋre mani je maga ɓoʼ me len go, suŋgu le de yaɗge, maga jobo joŋ joŋre ge gà so.

⁵ Ndi ti tamsir lam caw ɗa, ndi diŋ je ler ngel go ne jar ma ti tamsir la wo ti.

⁶ Blam maga Yeso wãã doosen no wãã mo, á raw tuf sããre gesiŋ, raw cãã sir de sããre ɓe meʼ ẽ, raw kad nen je rẽw de pããge no,

⁷ raw riŋgi ɓe ga : See wo yog nen ɓo go nen tuu bii Silowe. (Wer Silowe ga Ɓoʼ ge wo.) Je rẽwn kal rawge, yog nen ɓe go, á wo le ferge mokay, nen ɓe raw go caage koge.

⁸ Jar leege ɓe wo de jar maga hay wo koge ɓe seɓaa wiɗ fẽẽre mokay, raw wo wããge ga : Ɓa mo deŋ bay diŋ bloo maga seɓaa de hayle wiɗ fẽẽre lam wa ge?

⁹ Jar la wãã wo ga : Á diŋ se mbe, jar ma la wo ga : Á bay se wa, ama á maŋ ne maŋ ge. Bloon raw riŋ rage ga : Á diŋ ndi mbi cwãy.

¹⁰ Á raw wo wiigi ɓe ga : Day nen ɓo caa go mo hãʼ caa ge ne?

¹¹ Á raw wããge ga : Bloo maga à ɗen ga Yeso cãã siri, raw kad nen ɓi de ɓe, kal riŋ mege ga : See wo yog nen ɓo go nen tuu Silowe. Ndi kal rawge. Blam maga ndi wo le go yog nen ɓi yog mono, nen ɓi raw koge.

¹² Á raw wo wiigi ɓe ga : Bloo sen gen ne? Bloon raw ga : Ndi ko gà.

Farisiyẽẽ wiɗ jag je rẽw maga nen ɓe caa go ko ge mono

¹³ À raw woge de bloo maga hay go rẽw ne Farisiyẽẽ wo.

¹⁴ Paga Yeso cãã pããge kad nen ɓe, caa nen ɓe go, diŋ wur Saba.

¹⁵ Farisiyẽẽ wo ti see ɓaara raw wo wiɗ jag bloon ga nen ɓe leʼ koge leʼ koge mo hãʼ diŋ de faage mayla. Bloon raw riŋ rage ga : A joŋ pããge me nen meʼ ẽ, ndi kal rawge yog nen ɓi go, day patala nen ɓi leʼ ko ge.

¹⁶ Jar po wo yoo Farisiyẽẽ raw wo wãã ge ga : Bloo maga joŋ fen sen mokay bay le de age se Baa wa, werga á hoo sug ti wããre Baa maga wãã ti wur Saban mo gà. Ama jar maapo raw wo wããge ga : Day je ma de ɓlagge kãã ma joŋ fen mbuɗgi doo kay nono joŋ ge la? Á raw wo caa ɓil ti yoo ɓaara ɓog de faare.

¹⁷ Farisiyẽẽ raw wo wii je maga nen ɓe caa go tigriŋ pa ga : Day ndo de see ɓo ndo wãã ti je maga caa nen ɓo go gahãy lay? Á raw fer wããre ga : Á diŋ je ndar nen wããre ma jag Baa go.

¹⁸ De sen ni jar Jwif laa wo yããge ga á hay go rẽw, day nen ɓe leʼ koge patala gà kal wo ga say saara ɗe pããre ɓe wo le wii jag ɗa.

¹⁹ Á raw wo wii jag ɓaara ga : Mo deŋ diŋ wel ɓayn mbe? Nday ga á hay biŋ le go rẽw mbe? Day may joŋ maga nen ɓe leʼ koge patalam ne?

²⁰ Pããre ɓen raw wo wãã ge ga : Wùr de koge ga á diŋ wel wùr mbe, day á biŋ mbe we le go rẽw.

²¹ Ama wùr bay de ko re maga joŋ ne ga nen ɓe mo leʼ koge patalam wa, wùr ko je ma caa nen ɓen go gà lay. Wiin we mbay. Á go kluu ma fer wããre de see ɓe lay so mo pa.

²² Pããre ɓen wãã wo doosen diŋ doo hẽẽne jar Jwif wo, werga jar Jwif wo go de ɓoʼ faare ti yoo ɓaara ga nii je maga wãã we ga Yeso diŋ Mesi mo ɓuy, nii wo go á mo kal ɓi tiŋ tosgen wa.

²³ Diŋ wersen ga pããre ɓe kal wo wããge ga : Á go kluu ma fer wããre de see ɓe lay mo pa la, á mo wiin wo mbaara jag ɓe mono diŋ ti ngel se no.

²⁴ Farisiyẽẽ raw wo ɗe bloo maga hay go rẽw le tigriŋ pa, kal wo riŋ gi ɓe ga : Wãã kidolgi go pel Baa. Ma wùr, wùr de koge ga bloo sen diŋ je ɓlagge.

²⁵ Bloon raw ga : Ma ɓin, á diŋ je ɓlagge, noga bay wa, ndi ko gà ane mopo boŋ maga ndi ko se no, diŋ ga ndi hay go rẽw, day patala nen ɓi leʼ koge.

²⁶ Á raw wo wii gi ɓe ga : Á joŋ mo joŋ ge ne? Á caa nen ɓo go caa ge ne?

²⁷ Bloon raw ga : Ndi riŋ we we go la, day nday laa yãã wããre ɓi gà day wer may ga nday da ga ndi mo fer dogge ɓe ne nday pala? Noga nday daga nday kol go jar ma wer ɓe lay?

²⁸ Á raw wo ɗarge ɓe, raw wo riŋ gi ɓe ga : Ma ɓo ndo diŋ je ma wer bloo se no, ama ma wùr, wùr diŋ jar ma wer Moyisi.

²⁹ Wùr de koge ga Baa wãã wããre ne Moyis. Ama ma ɓe wùr bay de ko ngel maga á a le ni mo draʼ wa.

³⁰ Bloon raw riŋ rage so ga : Mokay diŋ re maga ngel wosela go mo so no. Nday bay de ko ngel maga á a le ni mo draʼ wa, de sen ɓuy á bul nen ɓi mbe go an so lay.

³¹ Naa de koge ga Baa yãã jag jar ma de ɓlagge wo gà ama coʼ sug wããre je maga hoo sug ti ɓe, yãã re maga á da ne lay mono.

³² Nday bay de laage ti boŋ ga jobo caa nen je maga biŋ le rẽw go wa has ɓuy pa.

³³ Hayga bloo sen mo hay we le de age se Baa gà no, á de hay kãã ma joŋ mopo gà hase.

³⁴ Á raw wo riŋgi ɓe ga : Ndo go de see ɓo ɓuy diŋ je ɓlagge le ti klee ɓo ɓaa yaw, ndo da bà ga ndo had wùr yaw? Á raw wo niigi ɓe go ɓi tiŋ tosge no.

Rẽw ma ti nenterse

³⁵ Yeso raw laage ga à nii bloon we go ɓi tiŋ tosge. Blam sen á raw yiŋgi de ɓe, kal riŋ gi ɓe ga : Ndo yaŋ mbo de yãã wããre Wel je táabay yawla?

³⁶ Bloon raw fer wããre ne hẽn ga : Sii ne ndi ɗa, á diŋ wose maga ndi mo yãã wããre ɓen la Waŋkluu.

³⁷ Yeso raw riŋgi ɓe ga : Ndi je maga ndo de ko mege mo deŋ no, ndi je maga ndi ti wããre de ɓo mo deŋ no.

³⁸ Bloon raw ga : Waŋkluu, ndi yãã we. Á raw laa kõyõgre gesiŋ pel Yeso.

³⁹ Blam sen Yeso raw wãã ge ga : Ndi nduu ti tamsir sen la ma cag re jare, maga nen jar rẽwre mo car wo go koge, jar maga nen ɓaara de koge mo rãɗ wo go.

⁴⁰ Farisiyẽẽ po hay wo ɓiŋ ɓe ni, raw wo laa wããre se no, kal wo wiigi ɓe ga : Day wùr lay, wùr go rẽwre lay so yaw?

⁴¹ Yeso raw riŋ rage ga : Nday mo hay we go rẽwre no, nday de hay de ɓlagge gà so, day nday raw wãɗge ga nen ɓay yaŋ koge mono, nday tum diŋ jar ɓlagge so.