WÃÃRE MA DE CÕÕRE MAGA JAŊ YER NE MONO 6 - Tupuri Bible

Yeso hã hoole ne jar ndar dwee

¹ Blam sen, Yeso kal rawge wo go faale maarog ma Galilen ɓaŋla (noga maarog ma Tiberiyade).

² Jar raw wo maŋ blam ɓe debaŋ, werga jarn wo de ko fẽẽre mbuɗgi maga á de joŋ rage de pẽɗge jar cegè wo go mono.

³ Yeso raw ɗiigi ciŋ ti húulì, raw hayge gesiŋ de jar ma wer ɓen wo no.

⁴ Paga few Pag ma jar Jwifn go de kosge lay.

⁵ Yeso raw maŋ nen ciŋ raw ko ngaɓa debaŋ le de maŋ blam ɓe age see ɓe, wersen á raw riŋ Filip ga : Naa daʼ hoole ma yeege la gen ma hãge ne jarn wo rege mo deŋ ɓuy ɓa?

⁶ (Ama á wãã sen mbe reʼ ma koge ga Filip fer ge wããre gahãyla koɗe, á de see ɓe go de ko fen maga se joŋn ge mono.)

⁷ Filip raw fer wããre ne hẽn ga : Hay bo de solay boo kis kis ɓog layblaʼ naa kãã ma yee hoole de ɓe ga wosela ɓuy yoo ɓaara daʼ meʼ meʼ gà.

⁸ Je ma wer ɓe ma tigriŋ pa, Aŋdre, wegeman Simoŋ Piyer, raw riŋgi ɓe ga :

⁹ Weklee po yaŋ de hoole doo de beɗge la kemrem kemrem dwee, cẽẽ ti ɓe ni ɓog lay, de sen ɓuy á mokay kãã mbe jar ma ngaɓan wo mo deŋ mbaara gà pa.

¹⁰ Blam sen Yeso raw wããge ga : Lag we jarn gesiŋ ɓuy. (Fíi ti ngel sen ni debaŋ lay.) Á raw wo lagge gesiŋ ɓuy, ngaɓa jarn ɓuy wo nen ndar dwee.

¹¹ Yeso raw maŋ hoolen doo, raw joŋ suseʼ ne Baa wo ti hoole no, raw ɓesge ɓe go ne jar maga wo de lagge gesiŋ ni mo ɓuy, raw hã cẽẽn ne hara doosen no lay, doo ga ɓil ɓaara da nono.

¹² Á wo wo go wuugi ɓuy mokay, Yeso raw riŋ jar ma wer ɓen wo ga : Tay we ti nen hoole maga gwaʼ go ni mono, maga mopo mo yee go wa hase.

¹³ Á raw wo tay ti ɓe, bag wo yããge de nen hoole maga gwaʼ go ni hwal ti ɓoge.

¹⁴ Jarn wo wo ko fen mbuɗgi maga Yeso joŋ mokay, kal wo wãã ge ga : Bloon mo deŋ diŋ Je ndar nen wããre Baa go cwãy, diŋ je maga à hay wãã ga á nduu yaŋ yoo jar ma ti tamsir la wo mono.

¹⁵ Yeso raw koge ga á wo de woge baa se hayge ti waŋ de waŋ mokay, á raw ferge hayge wo go ti húulì fentray ɓe boŋ pa.

Yeso see ciŋ ti maaroge

¹⁶ Wur wo go joŋge de law mokay, jar ma wer ɓen raw wo ɗiigi go gesiŋ ti diŋdiŋ maarog no,

¹⁷ raw wo ɗiigi ɓi daage po, raw wo ga saara mo caa maarogn wo go ti Kapernam ɗegere. Ngel hay go de suŋ lay, Yeso hay bay de dayge see ɓaara wa ɗa lay.

¹⁸ Maarogn hay mbar kaŋngaw debaŋ, werga leege hay fĩɗgi debaŋ.

¹⁹ Á hay wo go de seege go nen klewmeder dwee noga hiiraʼ taʼa, á wo wo ko Yeso le de kos daagen seege ciŋ ti biin mo caw, á raw wo joŋ hẽẽne.

²⁰ Yeso raw riŋ rage ga : Á diŋ ndi, joŋ we hẽẽne wa.

²¹ Á raw wo ga saara maŋ Yeso le ɓi daage no, day daagen raw kaŋge go gesiŋ tuu ti ngel maga saara wo de seege ni mono.

Jar ngaɓa debaŋ kiɗ wo Yeso

²² Toŋ ɓe, jar maga hay gwaʼ wo le go faale maarog ɓaŋla mono raw wo koge ga daage de gwaʼge la ni boŋ koɗe, day Yeso bay de ɗiigi ɓi daagen ɓiŋ jar ma wer ɓen wo ni wa, day jar ma wer ɓen wo de rawge de see ɓaara tawa.

²³ De sen ni, daage maapo raw wo age le ɓi leege Tiberiyade, raw wo age see ngel maga á hay re wo hoole ni mbaŋ blam maga Yeso Waŋkluu hay joŋ suseʼ ne Baa wo ti hoolen ni mono.

²⁴ Ngaɓan wo wo koge ga Yeso wo de jar ma wer ɓen bay wo la wa ɓuy mono, á raw wo ɗiigi ɓi daage sen wo, kal wo rawge Kapernam kiɗgi ɓe.

Yeso diŋ rege ma kol jar tenen

²⁵ Á raw wo daʼ Yeso wo go faale maarog ɓaŋla, raw wo ɗege ɓe ga : Waŋ, ndo a go la hun ɓa?

²⁶ Yeso raw fer wããre ne hara ga : Kidolgi ndi riŋ nday, nday kiɗ me diŋ wer maga nday hay re hoole, nday wuɗ lay mono, bay wer maga nday ko fẽẽre mbuɗgi sen mo wa.

²⁷ Joŋ we joŋre ti rege maga ɓlag ge go mo koɗ wa, ama joŋ we ti maga ig wolaŋ kol jar tenen tum tiʼ lay mono, rege sen, Wel je táabay hãn ge yaŋ ne nday, werga Baa Pããben de kaŋ lamba egre ɓen ne hẽn ti.

²⁸ Blam sen, á raw wo riŋgi ɓe ga : Wùr mo joŋ diŋ joŋre may maga Baa da sen mo so la?

²⁹ Yeso raw fer wããre ne hara ga : joŋre maga Baa de gorge ɓe doo ɓay diŋ ga nday mo yãã wããre je maga á ɓoʼ ne le mono.

³⁰ Á raw wo riŋ gi ɓe ga : Ndo kãã ma kaŋ nen wùr ti fen mbuɗgi may maga wùr mo yãã wããre ɓo mo so ne? Ndo wo ge joŋge diŋ joŋre may se so ne?

³¹ Moore wùr hay re wo Man we le ɓil puuli, doo ga à de yerge ɓe go ga : A hã hoole le ne hara ciŋ.

³² Yeso raw riŋ rage ga : Kidolgi ndi riŋ nday, hã rege maga a le ciŋ ne nday bay diŋ Moyis wa, ama hã rege maga a le ciŋ cwãy ne nday diŋ Pan ɓi.

³³ Werga rege maga Baa hã ne le, rege sen diŋ je maga ɗii le ciŋ, kol jar ma ti tamsir wo go tenen mono.

³⁴ Blam sen á raw wo ɗege ɓe ga : Waŋ, hã rege sen ne wùr tum tum ɗa la.

³⁵ Yeso raw riŋ rage ga : Ndi diŋ hoole ma kol jar tenen, je maga a we see ɓi no, koŋne cen ge gà so hase, day je maga yãã wããre ɓin we, jwaale kaŋn ge gà so has lay.

³⁶ Ama ndi riŋ we we go, nday ko mbay ndi we, de sen ɓuy nday laa yãã wããre ɓi gà.

³⁷ Jar maga Pan ɓi hã ra me mo ɓuy, a ge wo see ɓi, day ndi fer ge go ɓoʼ je maga a see ɓi mo go gà hase.

³⁸ Werga ndi cwaa le go gesiŋ joŋge bay diŋ dage ɓi wa, ama diŋ ma joŋ dage je maga ɓoʼ me le mono.

³⁹ Fen maga je ɓoʼ megen le dan diŋ ga jar maga á hã ra me mo ɓuy, ndi mo yee jobo go yoo ɓaara boŋ wa hase, ama ga ndi mo fer rage go laage ciŋ tenen wur naw ma blam taw no.

⁴⁰ Werga fen maga Pan ɓi dan mo ɓuy diŋ ga jar maga ko wo Weln we, day raw wo we yãã wããre ɓe mo ɓuy, mo kol wo go tenen tum tiʼ, ndi mo fer rage go ciŋ tenen wur naw ma blam taw no.

⁴¹ Jar Jwif raw wo ngrum jag wer maga Yeso wãã ga : Se diŋ rege maga a le ciŋ mono.

⁴² Á raw wo wãã ge ti yoo ɓaara ga : Á diŋ Yeso je ni Josefn so lay, naa ko pan ɓe wo de man ɓe lay pa so lay. Day patala á raw wããge ga se a le ciŋ naa age la?

⁴³ Yeso raw riŋ rage ga : Men we ngrumgi jag ma ti yoo ɓayn go.

⁴⁴ Hayga Pan ɓi maga ɓoʼ me le kog je sen we le gà no, jobo kãã ma a ge see ɓi maga ndi mo fer birgi ɓe go wur naw ma blam tawn gà.

⁴⁵ Jar ndar nen wããre Baa go yaŋ wo de yer wããre sen ga jar téebeere wo ɓuy, ndi had rage, day wosela maga yaŋ coʼ sug wããre Pan ɓi, yaŋ yãã hadge ɓen no, a see ɓi.

⁴⁶ Werga jobo bay de ko Pan ɓi wa, say diŋ ndi je maga a le go se Baa mo boŋ de ko Pããben ane.

⁴⁷ Kidolgi ndi riŋ nday, je maga yãã wããre ɓin we no, kol go tenen caw tum.

⁴⁸ Ndi diŋ hoole ma kol jar tenene.

⁴⁹ Moore ɓay hay re wo Man le ti puuli, day á raw wo huɗ gi go.

⁵⁰ Ama ma hoole maga a le ciŋ, je maga reen we, huu gi gà so.

⁵¹ Ndi diŋ hoole ma kol jar tenen maga a le ciŋ, je maga re hoole sen mokay we, joŋ yaŋ tenen caw tum. Hoole maga ndi hãn ge ne hẽn, hoole sen diŋ ndi de see ɓi tuu, ndi hãn ge, maga jar ma ti tamsirn mo kol wo tenene.

⁵² Jar Jwif raw wo faa kããra ti sen mokay debaŋ, kal wo ga : Bloo se deŋ hã ge hõõgese ɓe ne naa ma rege mokay hãge la?

⁵³ Yeso raw riŋ rage ga : Kidolgi ndi riŋ nday, hayga nday re hõõgese Wel je táabayn we gà nday jo cíi ɓe we gà no, ni nday kol ge tenen gà hase.

⁵⁴ Je maga re hõõgese ɓi we, jo cíi ɓi we no, kol ge go tenen caw tum, ndi fer ge birgi ɓe go wur naw ma blam taw no.

⁵⁵ Werga hõõgese ɓi diŋ fen rege cwãy, cíi ɓi diŋ fen joge cwãy lay.

⁵⁶ Wosela maga yaŋ re hõõgese ɓi, yaŋ jo cíi ɓi lay no, je sen diŋ je ɓi, ndi diŋ je ɓe lay.

⁵⁷ Pan ɓi maga ɓoʼ me le, á tenene, day á de ɗaw mege tenen lay, je maga yaŋ re mege ndi koln go tenen doosen no lay.

⁵⁸ Hoole maga a le ciŋ bay doo maga moore ɓay hay reen wo le, day saara huɗ go no wa. Wosela maga yaŋ re rege sen no, kol yaŋ tenen caw tum.

⁵⁹ Yeso wãã wããre sen mokay ti maga á hay had jar ɓi tiŋ tosge ma Kapernamn mono.

Wããre ma kol jar tenen tum tiʼ i

⁶⁰ Blam maga jarn laa wo wããre maga Yeso wããn go laa mono, jar ma wer ɓe wo debaŋ raw wo wããge ga : Hadge sen de gaali maga à yãã ne, wose kãã ma yããge ɓe yaŋ la?

⁶¹ Yeso raw koge ga jar se ma wersen wo de ngrum jag ti wããre sen mokay, á raw riŋ rage ga : Wããre sen cee nday?

⁶² Day nday joŋ ge joŋ ge ti wur maga nday wo ge ko Wel je táabayn ferge ɗiigi ti ngel maga á hay le ɓaa ni pa mo ne?

⁶³ De ɗaw wosela tenen caw diŋ Nenterse. Hõõgese ɓen mbe de koɗe, wããre maga ndi wããn ne nday diŋ wããre Nenterse, wããre sen diŋ tenene.

⁶⁴ Ama jar po yaŋ wo yoo ɓay, bay wo de yãã wããre sen wa. (Werga le ti tĩĩgi wer le hãã Yeso go de ko jar maga yãã ge wo wããre ɓe gà go de ko je maga kaŋ taw ɓe ge go mo lay.)

⁶⁵ Á raw wããge tigriŋ pa ga : Diŋ wersen ndi riŋ nday ga hayga Baa hã faage we ne wosela ma age see ɓi gà no, jobo kãã ma age see ɓi boŋ gà mono.

⁶⁶ De sen ni, jar ma wer ɓe wo debaŋ raw wo men ge ɓe go, laa wo dayge maŋ blam ɓe gà so.

⁶⁷ Blam sen Yeso raw riŋ jar ma hwal ti ɓogn wo ga : Nday da ga nday raw lay?

⁶⁸ Simoŋ Piyer raw ɗege ɓe ga : Waŋkluu, wùr yaʼ diŋ wer wose pala? Ndo de wããre maga ɗaw jar tenen tum doo so lay no.

⁶⁹ Patala wùr hã ɓil wùr we mo, day wùr ko we ga ndo diŋ Je ma Baa, ndo a le go see Baa.

⁷⁰ Yeso raw riŋ rage ga : Ndi de far we ge hwal ti ɓog ga yawla? De sen ɓuy jobo yaŋ yoo ɓay diŋ manhúulí.

⁷¹ Á wãã diŋ ti Judas je ni Simoŋ Iskariyod no. Judas mbe yoo jar ma wer ɓe ma hwal ti ɓogn wo lay, day se kaŋ ge taw ɓe go.