WÃÃRE MA DE CÕÕRE MAGA JAŊ YER NE MONO 5 - Tupuri Bible

Ceege say jobo go gesiŋ, Yeso pẽẽ ne go

¹ Blam sen jar Jwif raw wo joŋ few jag Baa, Yeso raw woge Jerusalem lay.

² Ɓi leege sen ni, jag tiŋ sããren wo mbaŋ, tuu yaŋ de bii ɓil ni de taale jag dwee, à ɗen de jag Hebre ga Betesta.

³ Wer taale sen wo ni, jar cegè wo de suuli ni debaŋ, jar rẽwre, jar leŋre, de jar maga cege go de say rage gesiŋ wo lay. [Jar grúmri maga wo de lagge ni gor fĩɗgi bii no,

⁴ werga je peele Baa ɗid le gesiŋ fĩɗ bii no, day je cege maga kal we nen biin blam fĩɗgi ɓen tuu no, cege ɓen raw mege ɓe go, haybà diŋ cege may layblaʼ.]

⁵ Jobo yaŋ ni, kiŋ de cegè doo swaʼ ti nenmaʼa.

⁶ Yeso wo koge ɓe de suuli mo tiʼ, raw koge tuu ga á de iggi de cegèn debaŋ, raw wiigi ɓe ga : Ndo da ga ndi mo pẽẽ mo go ge?

⁷ Je cegèn raw ɗege ɓe ga : Waŋ ɓi no, jobo bay ma maŋ mege ɓoʼ ge nen biin de maga á fĩɗ we mo wa. De maga ndi kiɗ ga ndi wo kalge ni mokay, je tigriŋ raw kalge go pel ɓi.

⁸ Yeso raw riŋgi ɓe ga : Ur go ciŋ, maŋ hiigi ɓo no ni ndo see.

⁹ Bloon raw pẽẽge go deparday tuu, raw maŋ hiigi ɓe no, raw tĩĩ wer seele. Ama á joŋ fen sen mokay wur Saba.

¹⁰ Jar Jwif raw wo riŋ je maga à pẽẽ go ga : Wara diŋ wur Saba, wããre Baa bay de hã faage ne ndo ma maŋ hiigi ɓon wa.

¹¹ Á raw fer wããre ne hara ga : Je maga pẽẽ ndi go, riŋ me ga ndi mo maŋ hiigi ɓin no ni ndi mo see.

¹² Blam sen á raw wo riŋgi ɓe ga : Á diŋ wose sen ga riŋ mo ga ndo mo maŋ hiigi ɓon ni ndo mo see mo la?

¹³ Ama je maga pẽẽ go la bay de koge ga je maga pẽẽ se go diŋ wo la wa pa, werga Yeso hay yee nen ɓe go doo ngaɓa maga hay wo ti ngel ni mono.

¹⁴ Blam sen ti wurpo, Yeso raw yiŋgi de ɓe ɓi tiŋ Baa, kal riŋ gi ɓe ga : Coʼ sug ɓo, ndo pẽẽ we go patala, joŋ ɓlagge wa so, daga re ma de ɓlagge daŋ sen mo a ti ɓo wa so.

¹⁵ Bloon kal rawge riŋ jar Jwif wo so ga hay pẽẽ se go diŋ Yeso.

¹⁶ Wersen jar Jwif joŋ wo bon Yeso, wer maga á joŋ fen sen wur Saba mono.

¹⁷ Yeso raw fer wããre ne hara ga : Pan ɓi de joŋ joŋre tum tum, ndi joŋ joŋre doosen no lay.

¹⁸ Wer wããre sen jar Jwif raw wo kiɗgi ɓe debaŋ ga saara mo iin go iigi so yaw, bay wer maga á joŋ joŋre, á laa hoo sug ti wur Saban gà mo tawa wa, ama diŋ wer maga á raw riŋgi ga Baa diŋ Pan se ma biŋ segen mono, saara ga á ngaɓ see ɓe doo Baa no degaʼ le la.

Egre Wel Baa no

¹⁹ Blam sen Yeso raw riŋ rage ga : Kidolgi ndi riŋ nday, Weln joŋ mopo de ti see ɓe tawa gà hase, á joŋ diŋ fen maga se ko Pan ɓe joŋge ɓe mono. Fẽẽre maga Pan ɓe joŋ ra mo ɓuy, Weln joŋ doosen no lay.

²⁰ Werga Pããben da Weln debaŋ, á kaŋ nen ɓe go ti re maga se de see ɓe joŋ ra mo ɓuy lay, á kaŋ ge nen ɓe yaŋ ti joŋre ma tigriŋ wo kluuri de daŋ ma kay la wo ɗa pa yaw, nday wo ge yaŋ ngris gi ti ɓe pa.

²¹ Doo maga Pããben hoo jar ma de húulín wo go ciŋ fer kol rage tenen nono, Weln kol wosela maga ɓil ɓe da ne go tenen doosen no lay.

²² Pããben caa kiida jobo gà hase, ama á hã egre ma caa kiidan go ne Weln ɓuy,

²³ maga jar ɓuy mo togoɗ wo Weln doo ga á togoɗ wo Pããben no lay. Wosela maga day we togoɗ Weln gà no, day togoɗ Pããbe maga ɓoʼ le mo gà lay.

²⁴ Kidolgi ndi riŋ nday ga je maga yaŋ coʼ sug wããre ɓi no, day yaŋ yãã wããre je maga ɓoʼ me le lay no, de kolge go tenen caw huu gà kiida baw ge ne ge gà so hase, ama á go de cegaɗ ge ne húulí ti, ma kolge go tenene.

²⁵ Kidolgi ndi riŋ nday ga wurpo a ge yaŋ, á go de age patala yaw, maga jar ma de húulí laa ge wo gẽẽge Wel mani Baa no, jar maga laan ge wo mono, lag ge wo yaŋ tenene.

²⁶ Doo maga Pããben de egre ma kol jar tenen nono, wersen se raw hã egre ne Weln ma kol jar tenen doosen no degaʼ lay.

²⁷ Á raw hã egre ne Weln ma caa kiida jar no, werga á diŋ Wel je táabay.

²⁸ Ngris we go ti sen wa, werga wurpo a ge yaŋ, maga jar ma de húulí ma ɓi tuun wo ɓuy laa ge wo gẽẽge ɓe,

²⁹ day laa ge wo le go ɓi tuu ɓaaran wo. Jar maga hay wo joŋ ɓaaran diŋ de el, laa ge wo le go ciŋ ma lagge tenene, ma jar maga hay wo ɓaaran joŋ ge diŋ ɓlagge mo lay no, laa wo ɓaaran le go ciŋ jag re kiida ɓaara ma de ɓlaggen sog tuu lay.

Re maga kaŋ nen jar go ti egre Yeso

³⁰ Ndi kãã ma joŋ mopo de ti ngel see ɓi gà hase, ndi caa ge kiidan diŋ doo maga Baa sii me nono, day kiida ɓin ti ngel ɓe lay, wer maga ndi bay kiɗ gi diŋ re maga ɓil ɓi dan mo wa, ndi kiɗ diŋ maga je ɓoʼ megen le dan mono.

³¹ Hayga ndi yaŋ joŋ sedewa go ti see ɓi de see ɓi no, re maga ndi wãã ne, kãã ma joŋge diŋ re ma cwãy maga jobo yãã ne gà.

³² Ama wãã ti ɓi diŋ je tigriŋ, day ndi de koge lay ga wããre maga á wããn ti ɓi á cwãy lay.

³³ Nday hay laa jar wo see Jaŋ, Jaŋ raw wããge go ti cwãy ɓe lay.

³⁴ Ndi de see ɓi, ndi bay de sãy maga je tabay mo wãã go ti ɓi wããge ɗa wa, ama ndi wãã sen mokay boŋ maga nday mo kãã ma daʼ pẽẽge.

³⁵ Jaŋ hay diŋ gér maga de doʼge ler ngel go, nday raw yãã wããre ɓe no, ngel raw lerge go ne nday ti, nday raw joŋ fruygi nen ɓe naw rab koɗe.

³⁶ Ama ma ɓi, wããre po yaŋ jag ɓi kluu de daŋ maga Jaŋ hay wããn ne mono, diŋ joŋre maga ndi joŋ ra mono, maga Pan ɓi hã ra me ga ndi mo joŋ ra mono, joŋre sen wãã wo yaŋ go ti joŋre ɓi maga ndi joŋ ra de el, kaŋ nen jar yaŋ go ga Pan ɓi ɓoʼ me le.

³⁷ Pan ɓi maga ɓoʼ me le wãã go ti joŋre ɓi ma de eln lay, nday bay de laa gẽẽge ɓe ti boŋ wa, nday bay de ko nen ɓe ti boŋ wa has lay.

³⁸ Nday bay ɗaw wããre ɓen ɓil ɓay wa, werga nday laa yãã wããre je maga ɓoʼ ne le mo gà.

³⁹ Wããre maga Baa wãɗ ra, day à raw yer rage go ɓi kefder nday yaŋ hadge ɓe de kaŋ ɗiggi ga á kol nday yaŋ tenen tum tiʼ i, day wããre sen wãã nà diŋ ti ɓi so yaw.

⁴⁰ De sen ɓuy nday bay de sãy age see ɓi ma kol ge go tenen cwãy wa.

⁴¹ Ndi bay kiɗgi diŋ ga jar téebeere mo togoɗ wo ndi wa.

⁴² Ama ma ɓi, ndi de ko we ge, ndi de koge ga nday bay da Baa de ɓil ɓay ɓuy wa.

⁴³ Ndi nduu diŋ ti jag Pan ɓi, nday laa yãã mege see gà. Ama je maga a we le diŋ de egre ɓe de ti ngel see ɓe, nday raw yãã re je sen see ɓay.

⁴⁴ Nday da togoɗge diŋ kããra, nday bay kiɗgi ga mo togoɗ we diŋ Baa ma boŋ wa, day nday kãã ma yãã wããre ɓin yãã ge la?

⁴⁵ Ɗig we ga ʼwaa ge war ne nday ti pel Pan ɓi diŋ ndi wa, je ʼwaa war ne nday tin joŋ ge diŋ Moyisi, Moyis je maga nday de kaŋ ɗiggi ɓay ti ɓe mono.

⁴⁶ Hayga nday mo hay we de yãã wããre Moyisn cwãy no, nday de yãã wããre ɓin lay, werga Moyis yern go diŋ ti ɓi.

⁴⁷ De sen ɓuy nday bay yãã wããre maga á yer ne go mo wa, day nday yãã wããre ɓin yãã ge an la?