WÃÃRE MA DE CÕÕRE MAGA JAŊ YER NE MONO 2 - Tupuri Bible

A ɓoʼ wãy le ti bii Kana

¹ Naw wo nà ge blam sen ɓog, à raw ɓoʼ wãy ti bii ɓi leege Kana ɓi sir Galile, man Yeso hay le go ni lay.

² À raw ɗe Yeso wo de jar ma wer ɓen wo re doo ɓoʼ ge wãy ti biin lay.

³ Yiin wo go taw ge pel ɓaara mokay, man Yeso raw riŋgi ɓe ga : Yii bay pel jar wa so hase.

⁴ Yeso raw ɗe ge ɓe ga : Wãy, ndo riŋ me ti joŋre ɓin diŋ ndo gà. Wùr ɓi bay de age wa ɗa kway.

⁵ Man Yeso raw riŋ jar joŋren wo ga : joŋ we fen maga á riŋ we ge ti ɓe mo ɓuy no.

⁶ Paga loone húulì yaŋ wo ni hiiraʼa, maga jar Jwif hay cloʼn wo ma yog doo ɓaara doo tosge ɓaara wo no mono. Maapo wo yoo ɓaara nen lidir doo nenmaʼa, maapo wo nen lidir kis ti ɓe ɓog lay.

⁷ Yeso raw riŋ jar joŋren wo ga : Bag we loone sen wo go de bii. Á raw wo bag loonen wo go de bii fẽẽfẽẽ.

⁸ Blam sen Yeso raw riŋ rage ga : Patala ɗaa we le see bii sen meʼ ẽ, wo we de ɓe ne waŋ few no. Á raw wo woge de ɓe ne hẽn so.

⁹ Waŋ raw gus bii maga kol go yii mokay, bay de ko ngel maga yiin a le ni mo wa (jar joŋre maga ɗad wo biin mbaara de koge ɓe ane). Á raw ɗe war wãyn le,

¹⁰ kal riŋgi ɓe ga : Jar ɓuy joŋ wo mono, à hã yii ma de cõõren go ne jar taŋgu ɗa, blam sen jar maga à ɗe ra le wùu wo we go so no, à raw hã maga sen co gà ne jar lay so, day ma ɓon ndo raw ɗaw ma de cõõren le kay hãã patala le?

¹¹ Mokay diŋ fen mbuɗgi maga Yeso joŋ taŋgu Kana ɓi sir Galile mono. Á raw naa nen woore ɓen go pel kããran ɓuy, jar ma wer ɓen raw wo yãã wããre ɓen lay.

¹² Blam sen á kal wo rawge ɓi leege Kapernam de man ɓe wo de hẽẽre ɓen wo de jar ma wer ɓen wo, raw wo iggi le ni smagga koɗe.

Yeso ɓi tiŋ Baa

¹³ Few Pag ma jar Jwif wo kosge go mbaŋ mokay, Yeso kal rawge Jerusalem,

¹⁴ wo daʼ jar yeɗ deere, de jar yeɗ sããre wo, de ma yeɗ kurgudu wo, jar cor solayn wo de lagge ti table ɓaaran ɓi tiŋ Baa ni deŋ lay.

¹⁵ Á raw lab saale, raw niɗ rage le go ɓi tiŋ Baa no, de sããre ɓaaran wo, deere ɓaaran wo, lag solay jar cor solay wo go gesiŋ, raw srog table ɓaaran wo go lay,

¹⁶ raw riŋ jar yeɗ kurgudun wo ga : Ndar ra we wo go, kol we tiŋ mani Pan ɓin diŋ tiŋ trere wa.

¹⁷ Á go de yerge ga : Baa ge wùu maga ndi de baa wùu da tiŋ ɓon de haɓ ɓil ne ndi doo wùu nono. Jar ma wer Yeson raw wo ɗig ti wããre se no.

¹⁸ Blam sen jar Jwif raw wo wii Yeso ga : Ndo kãã ma joŋge diŋ fen mbuɗgi may maga wùr mo ko ga ndo de daʼ egre sen ma joŋge no ɓa?

¹⁹ Yeso raw riŋ rage ga : Mbug we tiŋ Baa mo kaʼ go, ndi fer booge ɓe nen síilí hẽẽ hẽẽ swaʼ tuu.

²⁰ Jar Jwif raw wo riŋ gi ɓe ga : À joŋ kiŋgi boo tiŋ Baa mo kaʼ hwal hwal naa ti hiiraʼa, ma ɓon ndo wo booge ɓe síilí hẽẽ hẽẽ swaʼ koɗe?

²¹ Ama tiŋ Baa maga Yeso wãã ti ɓe mono diŋ ti hõõgese ɓe tuu seŋ.

²² De maga Yeso fer go kalge ciŋ tenen mokay, jar ma wer ɓen raw wo ɗig ti ga á hay wãã re sen we go, á raw wo yãã wããre Baa, yãã wo wããre maga Yeso wãɗ ra mo lay.

Yeso ko ɗiggi ma ɓil jar téebeere wo go ɓuy

²³ De maga Yeso le go Jerusalem wur few Pag mokay, jar debaŋ raw wo yãã wããre Yeso wer fẽẽre mbuɗgi maga á joŋ ra mono,

²⁴ ama Yeso laa hoo sug ti ɓaara gà has ɓuy, werga á go de ko ɗiggi ɓaara ɓuy.

²⁵ Á bay de sãy maga jobo mo kaŋ nen se ti ɗiggi jar téebeere wo kaŋ ge wa, werga á de see ɓe go de ko jiili ɓaara.