WÃÃRE MA DE CÕÕRE MAGA JAŊ YER NE MONO 11 - Tupuri Bible

Wããre húulí Lasar

¹ Jobo à ɗen ga Lasar, raw leʼ cegè, tiŋ ɓe Betani, diŋ ɓi leege maga mayregeman ɓe Mari wo de Marta wo ni mo lay.

² (Mari diŋ wãy maga hay kaa trusa ne Yeso ɓaale, saɗn go de riŋ ti ɓe mono, Lasar je cegèn diŋ wegeman ɓe.)

³ Mayregeman ɓe se ɓogn raw wo ɓoʼ jobo wo riŋ Yeso ga : Waŋkluu, bar ɓon leʼ cegè we.

⁴ Yeso wo laa wããre sen mokay, á raw wããge ga : Ceege Lasarn ʼwar ne gà cege sen joŋ ne ma kaŋ nen jar go ti egre Baa, ma kaŋ wer jar togoɗ Wel Baa lay.

⁵ Yeso da Marta wo de maygeman ɓe no, da Lasare.

⁶ De maga á wo laage ga Lasar de cegè mokay, á raw nage ti ngel maga se hay ni naw ɓog pa.

⁷ Blam sen á raw riŋ jar ma wer ɓen wo ga : Naa fer we Jude.

⁸ Jar ma wer ɓen raw wo ɗege ɓe ga : Waŋ, jar Jwif hay wo kiɗ mo ge ma ʼwarge go de húulì wésé la mbaŋ, day ndo fer ga ndo fer wo ni pa?

⁹ Yeso raw riŋ rage ga : Wur kal le go de jag toŋ mbuh, hãã wo go leʼ ge gesiŋ de law law, hayga jobo yaŋ seege de ceg no, ɓaale ɓe maʼ gà werga ngel go de teege.

¹⁰ Ama je maga yaŋ seege de suŋ, ɓaale ɓe maʼa, werga ngel bay go de teege ne hẽn ti wa.

¹¹ Yeso fer wããre sen go ne hara fere, blam sen á raw riŋ rage ga : Bar naa Lasar leʼ naa we, ama ndi wo go pũygi ɓe.

¹² Jar ma wer ɓen raw wo ga : Waŋkluu, hayga á leʼ we diŋ naa, ni á pũy yaŋ mbe go.

¹³ Paga Yeso riŋ ra nà ga Lasar huu we go, ama jar ma wer ɓen raw wo ɗig ɓaaran ga á wãã diŋ ti naa ma kidolgi no.

¹⁴ Yeso raw riŋ rage go poɗag ga : Lasar huu we go.

¹⁵ Ama ɓil ɓi go feh wer ɓay, ti maga ndi hay bay le go ni wa mono, wersen, nday yãã ge wããre ɓi yaŋ so. Patala naa see we ɓiŋ ɓe.

¹⁶ Blam sen Toma (maga à ɗen ga Wel gèere) raw riŋ jar ma wer Yeso ma lan wo ga : Naa see we huɗgi wo go wer Waŋ naa ni lay.

Yeso ga se diŋ je ferge lag jar go ciŋ tenen

¹⁷ Yeso wo a ge mokay, á raw daʼ ge ga naw Lasar go de ɓoʼ ge ɓi tuu naa yaw.

¹⁸ Betani see Jerusalem nen klewmeder swaʼa,

¹⁹ jar Jwif wo debaŋ de age see Marta wo de Mari coɓ nen ɓaara ti húulí hẽn ɓaaran ni.

²⁰ Marta wo laage ga Yeso a we mokay, á raw ur ɗee caa pel ɓe, Mari raw gwaʼ ge de hayle liŋ.

²¹ Marta raw ɗe Yeso ga : Waŋkluu, ndo de hay we la no, hẽn ɓin de hay huu go gà.

²² Ama ndi mbi de koge ga hay bo patala Baa hã fen maga ndo wii ne ge doo ɓe ne ndo ɓuy.

²³ Yeso raw riŋgi ɓe ga : Welgeman ɓon fer yaŋ go tenene.

²⁴ Marta raw riŋgi ɓe ga : Ndi ko mbi we ga á fer yaŋ go kalge ciŋ tenen wur naw ma blam taw, maga jar ma de húulí wo wo go laage ge ciŋ tenen mono.

²⁵ Yeso raw riŋgi ɓe ga : Ndi diŋ je ferge lag jar go ciŋ tenene. Wosela maga yãã wããre ɓi we joŋ yaŋ tenen, koh á mo huu bo go yaw.

²⁶ Day wosela maga yaŋ tenen, yãã wããre ɓi we no, huu go gà so hase. Ndo yãã wããre ɓi we ti seno?

²⁷ Marta raw ga : Waŋkluu, ndi yãã mbi we ga ndo diŋ Mesi, diŋ Wel ma Baa, je maga a ge yaŋ ti tamsir la mono.

Yeso ra

²⁸ Blam maga á wãã go doosen no kay, Marta kal rawge ɗe maygeman ɓe Mari, raw riŋgi ɓe jag freŋ ga : Waŋ yaŋ le mono, á de wii mo ge ga ndo mo wo wo.

²⁹ Mari wo laa wããre sen mokay tuu, raw urgi go ciŋ deparday, kal rawge see Yeso.

³⁰ (Yeso hay bay le de kalge ɓi leegen wa ɗa, á hay le ti ngel maga Marta yiŋ le de ɓe ni mo ɗa no.)

³¹ Jar Jwif maga hay wo liŋ ɓiŋ Mari coɓ nen ɓe, wo wo koge ga á ur ciŋ deparday kal go mokay, raw wo maŋ blam ɓe. Á hay ɗig wo ɓaaran ga á raw ti tipaalen raage.

³² Mari wo dayge ti ngel maga Yeso ni mokay, nen ɓe raw leʼ ge ne Yeso ti, se raw leʼ monɗra pel ɓe, raw ga : Waŋkluu, ndo de hay we la no, hẽn ɓin de hay huu gà.

³³ Yeso raw koge ɓe rage, jar Jwif maga wo wo wer ɓe de rage lay mono, raw hrag see go debaŋ, raw dawge go lay.

³⁴ Á raw wii rage ga : Nday teen la gen la? Á raw wo ga : Waŋkluu, see le koge ɓe lam no.

³⁵ Yeso ra.

³⁶ Jar Jwif raw wo riŋ kããra so ga : Naa kon we ɗa, á hay dage ɓe ɗa la!

³⁷ Jar po raw wo wãã ge yoo ɓaara ga : Á diŋ je maga caa nen je rẽw go mono, á hay bay de kããge ma joŋge ga Lasar mo huu go seŋ wa an ge?

Yeso bir Lasar go

³⁸ Yeso fer hrag see go tigriŋ pa, kal rawge ɓiŋ tipaale no, tipaalen diŋ rum húulì, day go de lagad húulì jage.

³⁹ Yeso raw ga : Maŋ we húulìn go. Marta maygeman je húulín raw ga : Waŋkluu, á joŋ go fõõge de ɓlagge patala yaw, werga naw ɓe go wara ɓi tuu naa.

⁴⁰ Yeso raw riŋgi ɓe ga : Ndi hay bay de riŋ mo ge ga hayga ndo yãã wããre ɓi we, ndo ko egre Baa yaŋ wa yawla?

⁴¹ Á raw maŋ húulìn go. Yeso raw maŋ nen ɓe ciŋ, raw ɗe Pan ɓe ga : Baba, ndi joŋ suseʼ mo ti maga ndo yaŋ laa wããre maga ndi de wii mo ge ti ɓe mono.

⁴² Ndi ko we ga ndo yaŋ laɗ re maga ndi wiɗ mo ti ɓaara tum, ama ndi de riŋ mo ge wer jar maga wo de yiŋ ti ɓi go mo cwẽẽ lag no, maga á mo yãã wo re ɓi ga ndo ɓoʼ me le.

⁴³ Blam maga á wãã go doosen no wãã, á raw ɗe ɗúu kloŋ ga : Lasar, kal le go.

⁴⁴ Je húulín raw kalge le go, ɓaale ɓe wo de doo ɓe hay de saɗge de mblaaga. Yeso raw riŋ rage ga : Bud we nen ɓe go, men we á mo see.

À de kiɗ faage ma baa Yeso

⁴⁵ Jar Jwif maga hay nduu wo see Mari ni, ko wo fen maga Yeso joŋ ne mono, jar po wo yoo ɓaara debaŋ raw wo yãã re ɓe no.

⁴⁶ Ama jar po wo yoo ɓaara raw wo rawge see Farisiyẽẽ wo, raw wo riŋ rage ti fen maga Yeso hay joŋ ne mono.

⁴⁷ Farisiyẽẽ wo de waŋre jar ma siɗ jagn raw wo tay ti jar ma ɓoɗ ti wããren wo, kal wo riŋgi ga : Naa joŋ joŋ ge ɓa? Werga bloo sen de joŋ fẽẽre mbuɗgi debaŋ.

⁴⁸ Hayga naa men we joŋge doo sen nono, jar yãã ge go diŋ re ɓe ɓuy, jar kluuri jar Rom a ge wo ɓlag tiŋ Baa naan go, caa wo wer naa ge go lay.

⁴⁹ Jobo yaŋ yoo ɓaara ni, à ɗen ga Kayfe, se hay diŋ je kluu ma siɗ jagn ti kal sen lay, raw riŋ rage ga : Ama nday bay de ko mopo wa hase.

⁵⁰ Nday bay de koge ga de el ɓen diŋ maga jobo boŋ mo huu go ti ngaɓan ɓuy, dedaŋ maga sirn ɓuy mo bas go wa mo yawla?

⁵¹ (Á wãã wããre sen mokay bay de ti ngel see ɓe wa, á hay diŋ je kluu ma siɗ jagn ti kal se no, á raw wããge go diŋ wããre ma jag Baa ga Yeso mo huu go ma coo ti wer jar Jwif wo,

⁵² bay ga á mo huu go ma coo rage tawa wa lay, ama maga á mo tay weere Baa maga wo go de dusgi mo deŋ go boŋ.)

⁵³ De wur sen ni, jar kluuri jar Jwif raw wo wããge ga saara mo ʼwar Yeso go.

⁵⁴ Diŋ wersen Yeso laa raŋge go tinoo nen jar Jwif wo gà so, á kal rawge wo go ɓi leege maga wo go ti puuli, diŋ ɓi leege maga à ɗen ga Efrayim, á raw hayge wo go de jar ma wer ɓen wo ni.

⁵⁵ Few Pag jar Jwif hay go de kosge mbaŋ, jar ma ɓi leege sen ni debaŋ raw wo rawge Jerusalem taŋgu few Pagn ma woge fãã see ɓaara go.

⁵⁶ Á raw wo kiɗ Yeso, á wo wo laage ɓi tiŋ Baa mokay, á raw wo wii kããra ga : Nday ɗig gahãy ɓa? Á nduu mbe yaŋ ti fewn yaw, noga á nduu ga?

⁵⁷ Waŋre jar siɗ jag wo de Farisiyẽẽ raw wo wããge ga hayga jobo yaŋ de ko ngel maga á ni no, á mo kaŋ nen jar wo ni, maga á mo wo bagge ɓe.