WÃÃRE MA DE CÕÕRE MAGA JAŊ YER NE MONO 10 - Tupuri Bible

Yeso ngaɓ wããre jagjõõ de sããre wo de je wer ɓaara no

¹ Kidolgi ndi riŋ nday, wosela maga day we kalge jag glaŋ sããren wo gà ama raw kalge we le go ti ywaale ti ngel tigriŋ no, je sen mo caw, diŋ je freŋ, diŋ je leɗ faage lay.

² Ama je maga kal ɓen diŋ jag glaŋ, diŋ je koɗ sããren wo.

³ Je gor jag glaŋ raw bul jag glaŋ go ne hẽne, sããren laa wo gẽẽge ɓe lay. Sããre ɓen wo ɓuy se ɗe ra go de ɗúu de ɗúu, day á raw laa rage le go siigi.

⁴ Á laa ra we le go ɓuy so no, á raw kalge pel ɓaara, sããren raw wo maŋ blam ɓe lay, werga sããren wo de ko gẽẽge ɓe.

⁵ Ama á day wo maŋ blam je waare gà ɗee wo go doo ɓe hãã, wer maga á bay wo de laa gẽẽge ɓe wa mono.

⁶ Yeso wãã jagjõõ sen ne hara doosen no, ama á laa wo laa wer wããre sen gà.

Yeso diŋ je koɗ sããre de ele

⁷ Yeso raw wããge tigriŋ pa ga : Kidolgi ndi riŋ nday, ndi diŋ jag glaŋ sããren wo.

⁸ Jar maga a wo go taŋgu ɓi mo ɓuy, wo diŋ jar freŋ, jar leɗ faage wo, ama sããren laa wo laa gẽẽge ɓaara gà.

⁹ Ndi diŋ jag glaŋ. Wosela maga kal we ti ɓi no, daʼ ge pẽẽge, á kãã ma kalge tiŋma, fer kalge le go pa, day wo ge daʼ rege ɓe no.

¹⁰ Je freŋ a ɓen sagsag ma bagge freŋ, ma ʼwar ge, ma ɓlagge go. Ma ɓi, ndi a ɓin ga jar téebeere mo hay wo sug sugi, mo daʼ wo see ɓaara debaŋ debaŋ.

¹¹ Ndi diŋ je koɗ sããre ma de ele, je koɗ sããre ma de el hã ɓil ɓe go wer sããre ɓen wo no.

¹² Je maga joŋ joŋre ma ɓen diŋ ti solay, ga bay diŋ je sããren wo wa, sããren bay wo diŋ ɓe wa lay mokay, á ko way-baa we le age mokay, á raw men rage go, raw daŋ ge de ɗee, hãã way-baa bag sããren wo, dus ra ɓil go lay.

¹³ Á daŋ de ɗee wer maga á diŋ je joŋ joŋre ti solay koɗe, day ɗig ti ti sããren wo gà.

^14-15 Ndi diŋ je koɗ sããren wo de ele. Doo ga Pan ɓi de ko ndin no, day ndi de ko Pan ɓi lay, ndi de ko sããre ɓin doosen no degaʼ lay, sããre ɓin wo de ko mege lay, ndi hã ɓil ɓi go wer sããre ɓin wo.

¹⁶ Sããre ɓi ma tigriŋ yaŋ wo go, sen bay wo le de laage ɓi glaŋ sen la wa ɗa, sen wo mokay, say ndi a de ɓaara se kẽẽ, mo a wo laa gẽẽge ɓi, mo tayge wo go diŋ horog po boŋ tiʼ i, je koɗ rage joŋ boŋ lay.

¹⁷ Pan ɓi da me wer maga ndi hã ɓil ɓi go, day ndi ferge yãã see ɓi tigriŋ pa mono.

¹⁸ Jobo yãã ne go doo ɓi gà ama ndi hãn go diŋ de ɓil ɓi. Ndi de kããge ma hãge ɓe go, ndi de kããge ma fer ge yããge ɓe pa. Mokay diŋ fen maga Pan ɓi riŋ me ga ndi mo joŋ ne mono.

¹⁹ Jar Jwif raw wo caa ɓil ɓog tigriŋ pa, wer wããre se no.

²⁰ Jar po wo yoo ɓaara debaŋ raw wo wããge ga : Á de sõõ ti. Á de loɗge. Nday coʼ sug wããre ɓen le la.

²¹ Jar ma la raw wo wããge ga : Je ma de sõõ ti wãã wããre doosen no kay gà wosela ma de sõõ ti kãã ma bul nen jar rẽwre wo go gà.

Jar Jwif tob wo Yeso go

²² De ancoo mono à hay joŋ few Tiŋ Baan Jerusalem.

²³ Yeso raw woge, kal age wer taale mani Salomoŋ ɓi Tiŋ Baa no.

²⁴ Jar Jwif raw wo tay ti le see ɓe, á raw wo riŋgi ɓe ga : Ɓa ndo ɓoʼ wer see ɓo go ne wùr hun ga wùr mbe ti faare ti ɓo tum mo ɓa? Hayga ndo yaŋ diŋ Mesi, ni ndo sii ne go ne wùr poɗage.

²⁵ Yeso raw riŋ rage ga : Ndi go de siigi ɓe ne nday, nday laa yãã wããre ɓin gà. Joŋre ɓi maga ndi joŋ ra ti ɗúu Pan ɓi mo deŋ, wo go de joŋ sedewa ti ɓi.

²⁶ Ama nday bay yãã wããre ɓi wa, werga nday bay diŋ te sããre ɓin wo wa mono.

²⁷ Sããre ɓin laa wo gẽẽge ɓi, ndi de ko rage, sããren see wo wer ɓi lay.

²⁸ Ndi kol ra go tenen tum tiʼ i, á huɗ wo go gà so hase, jobo yãã ra go doo ɓi de waŋ gà lay.

²⁹ Pan ɓi diŋ je maga hã sããren wo le me, á de egre daŋ jar ɓuy. Jobo kãã ma yãã mopo go doo Pan ɓi de waŋ gà lay.

³⁰ Pããben lay, ndi lay, wùr diŋ sen boŋ.

³¹ Jar Jwif raw wo hoo weere húulì ma ɓoɗge ɓe tigriŋ pa.

³² Blam sen Yeso raw riŋ rage ga : Ndi joŋ joŋre ma de el de egre Pan ɓi we nen ɓay debaŋ, day diŋ wer joŋre ma hon ga nday da ga nday ʼwar me go de ɓoɗ ge de húulì pa la?

³³ Jar Jwif raw wo riŋgi ɓe ga : joŋre ma de el maga ndo joŋ ra, wùr da ii mo ge go diŋ wersen gà ama diŋ werga ndo de mbuɗ foo Baa. Ndo diŋ je tabay, day ndo raw joŋ see ɓo doo Baa no maʼ lay mono.

³⁴ Yeso raw riŋ rage ga : Á go de yerge ɓil jag liŋgi ga : Nday diŋ Baa wo.

³⁵ Naa de koge ga á kãã ma naa wããre maga Baa wãã ne go gà. Baa ɗe jar maga se de wãã re ne hara ga Baa wo.

³⁶ Ama ma ɓi, Baa maŋ me go, raw ɓoʼ me le ti tamsir la so lay, day nday fer wãã ge ga ndi de mbuɗ foo Baa wer maga ndi wãã ga ndi diŋ Wel Baa mokay wãã ge pa la?

³⁷ Hayga ndi joŋ we diŋ joŋre Pan ɓi gà no, ni nday yãã we re ɓin wa.

³⁸ Ama hayga ndi joŋ we diŋ joŋre sen wo, ko nday yãã mbay wããre ɓin we gà de sen ɓuy layblaʼ, yãã mbay wããre joŋre ɓin wo tõʼ õ, nen maga nday mo ko ge wo wurpo ɓaale boŋ wo go de ma pel tum ga Pããben diŋ ndi tuu, ndi diŋ Pããben tuu lay.

³⁹ Á raw wo kiɗgi ɓe ga saara baan tigriŋ pa, á raw daŋ rage go.

⁴⁰ Yeso raw wo go faale pyew Jurdẽẽ ɓaŋla tigriŋ pa, ti ngel maga Jaŋ hay tĩĩ wer joŋ batem jar ni mono, á raw hayge wo go ni.

⁴¹ Jar raw wo age see ɓe ngaɓa debaŋ, raw wo riŋ gi ga : Jaŋ bay de joŋ fẽẽre mbuɗgi po wa hase, ama wããre maga á wããn ti bloo sen mokay ɓuy diŋ cwãy.

⁴² De sen ni, jar debaŋ raw wo yãã wããre Yeso.