JERMI 9 - Tupuri Bible

¹ Á de hã tiŋ jar raŋge wo we wo ne ndi ti puuli no, ndi de men jar mani ɓin wo go, ndi de maŋ ɓil wo go hãã see ɓaara. Werga á wo ɓuy diŋ jar joŋ figliw, wo diŋ tayge jar lag cogob wo.

² Trum ɓaara go de fidgi tiʼ doo toŋwaa ma de mbeɗge nono, ma car geteʼe. Á kol wo de egre ɓil sirn nà bay diŋ wer de deele ɓaara wa, ama werga á yaɗ wo de ɓlaggen de pel de pele, day bay wo de ko ndi wa. Kay diŋ jag Manwuri.

³ Daga wosela ɓuy mo koɗ see ɓe see bar ɓe day jobo mo kaŋ ɗiggi ɓe ti hẽẽre ɓe wo wa. Werga hẽnbe ɓuy diŋ je hãyhãy ma maŋ ɓaale hẽn ɓe, day barge ma honla ɓuy diŋ je re ti bar ɓe.

⁴ A jãɗ wo kããra jãɗge sagsage, bay wo wãɗ cwãy wa. A had wo jag ɓaara go ma car geteʼ no, á gay wo coo see ɓaara de joŋge fẽẽre maga bay wo ti faage ɓe wa wo.

⁵ Ngel hayle ɓo yoo jar jãɗ seen wo day saara day ko mege gà mbe reʼe. Kay diŋ jag Manwuri.

⁶ Diŋ wersen Manwur Pantway wãã ga : Ko ga ndi laa ge ra yaŋ ti wùu ma ray sir ma see ɓaaran wo go, ma lam rage werga ngar maga ndi mo joŋ may mani jar mani ɓin wo de ɓe bay nen ɓi wa so.

⁷ Trum ɓaara doo waa ma de nee jag nono, á jãɗ wo jar jãɗge sagsage. A wiɗ wo kããra ga saara go jam ti holaŋ kããra ama, le ɓil ɓaara saara de ɓod rew ne kããra.

⁸ Doo kay nono ndi ur mbi yaŋ de ɓaara ti sen mokay gà mbi yawla? Kay diŋ jag Manwuri. Ndi saʼ ge mbi hee see ɓi go de wer jar ma doosen wo mokay gà mbi yawla?

Wur roo wo de ndumgi no

⁹ Ndi da raage, da ndumgi go jag ciŋ kloŋ wo ciŋ ti húulì wo. Ndi da ʼwaa mbaga jaw wo ti ngel koɗ horog ma ti puulin wo. Werga à roɗ ra go, jobo bay heege ni wa so hase à bay laa roo này po ni wa so. Tĩĩ ti dweere ma ciŋ wo, hãã leʼ go ti nàyre wo, sen ɓuy daŋ wo we.

¹⁰ Ndi kol ge Jerusalem yaŋ go diŋ tabul ma de cor ɗugul ne kẽẽ ti, go diŋ ngel suuli wé wo. Ndi kol ge ɓi leege ma ti sir Judan wo yaŋ go diŋ ngel ma poɗag poɗag bay jar ɓili.

¹¹ Je ma de ko re maga laa wer fẽẽre sen wo nà diŋ wosela? Daga je maga Manwur hay fer jag ɓe ne hẽn mo wããn go so! Wer mayse ga sir yee go day roɗ go doo puuli maga jobo bay heege ni wa has no la?

¹² Manwur wããn go : A nà wer maga á tob wo jag liŋgi ɓi maga ndi hay ɓoʼ ne hara pel go, wer maga á laa wo jag ɓi gà day see wo ti ɓe gà mono.

¹³ A nà diŋ wer maga á maŋ wo diŋ blam ɗiggi ɓaara ma de ɓlagge no, maŋ wo blam Baaln wo doo maga pããre ɓaara hay kaŋ wo nen ɓaara wo ni no mono.

¹⁴ Diŋ wersen Manwur Pantway, Baa ma Israyel wãã ga : Ndi hã ge gur geɓer go ne jar sen wo la ma rege, ndi hã ge bii go ne hara de mopo nene.

¹⁵ Ndi dus gi ra yaŋ wo go yoo wer jar dehãy maga saara noga pããre ɓaara hay bay wo de ko rage wa. Ndi baa ge blam ɓaara yaŋ wo de moslam ni, hãã ndi taw ge ra go ɗa.

¹⁶ Manwur Pantway wãã ga : Ɗig we! Ɗe we naare ma rage wo le day á mo a wo! Wo we le kiɗ naare lele wo day á mo a wo le!

¹⁷ Daga á mo a wo le deparday day mo ʼwad wo siŋ húulí ne naa ti, day mberbe mo leɗ le go nen naa, nen naa mo laa wo mberbe!

¹⁸ Werga à le de laa ndumgi jar le ti Siyoŋ. A nà diŋ re may no la! À frum naa we go! Sõõre go de wuɗ ti ne naa! Naa go ma men sir no werga à ɓlag tiŋ naw naan wo we go!

¹⁹ Naare wo, coʼ we sug wããre Manwur no, day sug ɓay mo laa fen ma jag ɓe no. Had we mayre ɓay wo de ndumgi, had we kããra de siŋ lawge wo!

²⁰ Werga, húulí kal le ti feneder naan wo, se raw yãã tiŋ naw naa ma de wooren wo go. Á caa wer weere ma joŋ hragge ti blam faagen wo we go, taw weere jõõre ma ti ngel waywan wo go lay.

²¹ Wãã ga : Jag Manwur doo kay nono : Húulí jar téebeere leɗ ge wo yaŋ go gesiŋ tiɗ tiɗ ɓil pay wo doo fen rum ngel nono, doo coore maga je weege poʼn gesiŋ lag lagge day je hooge ɓe joŋ gà nono!

Koge re ma ti ngel ɓe no

²² Manwur wãã ga : Daga je ma de ko reen mo kee see ɓe ti koge re ɓen wa, daga je egren mo kee see ɓe ti egre ɓen wa, daga je horogn mo kee see ti horog ɓen wa lay.

²³ Ama je maga da we kee see ɓe mo kee see ɓe ti maga se de ti ngel day se de ko mege, ti maga se de koge ga ndi Manwur ma ko decoo jarn ndi ɓod faare fẽẽre ma ti faage ɓen wo day ndi cag kiida jar ti tamsir la mono. Werga ndi fruy nà diŋ ti fen ma doosen no kay no. Kay diŋ jag Manwuri.

²⁴ Mokay diŋ jag Manwuri : Ko we, naw po a ge wo yaŋ le, day ndi ur gi yaŋ de jar ma de caa bĩĩni maga bay wo de deele wa mono.

²⁵ Ndi ur gi de sir Ejipte, de Juda, de Edom, de jar Amoŋ wo de Mohabe, de jar ma ɓil puuli ga har wo jeŋ piŋ ɓaara mo ɓuy no werga wer jar wo ɓuy bay wo de caa ɓĩĩni wa day jar Israyel wo de see ɓaara bay wo de deele wer caage ɓĩĩnin wa lay.