JERMI 8 - Tupuri Bible

¹ Kay diŋ jag Manwuri : Ti wur sen mono, à frug gi hm waŋre ma Judan wo yaŋ le go ɓi tuu ɓaaran wo de hm minisdir ɓen wo, de hm jar siɗ jagn wo, de hm jar ndar nen wããre Baa gon wo, de hm jar Jerusalem wo ɓuy.

² À laa ge ra yaŋ go deŋ nen wuri, nen few wo de fẽẽre ma nen ngel ma ciŋ wo ɓuy, diŋ fẽẽre se maga á hay wo da rage, goŋ wo ra, saʼ wo see ɓaara see ɓaara, kiɗ wo ra day leɗ wo monɗra pel ɓaara mono. Jobo hoo ge ra gà lay, jobo ter ge ra gà lay, á kol ge wo yaŋ go diŋ fen rum ngele.

³ Húulí joŋ ge wursen ɗawa de daŋ tenen nen jar maga gwaʼ ge wo ti wer jar se ma de debaycõõren wo lam no, go ti ngel maga ndi dus gi ra wo go ni mo ɓuy no. Kay diŋ jag Manwur Pantway.

Jar Israyel maʼ wo nen ti go

⁴ Ndo wãã ge ne hara ga Manwur wãã ga : Jobo leʼ yaŋ mbe ga ur go ciŋ gà noga jobo cel mbe yaŋ go ga fer le ti faagen gà so yawla?

⁵ Wer mayse so ga jar se ma Jerusalem wo la joŋ wo ti graŋ go day mbaara tum tum ndar gog no la? A mbaara tum jãɗ see ɓaara, laa wo dayge ferge le gà.

⁶ Ndi mbi tum de coʼ sugi, de laa fen maga á wããn wo mono. A bay wo wãɗge diŋ fen maga á hay wo nen wããge ɓe mo wa. Jobo boŋ bay go ɓod jag ti debaycõõre ɓe noga wãã ga : Ndi hay joŋ nà mayla gà. Á fer mbaara jag ɗee ɓaaran doo piiri maga wo jag jaw nono.

⁷ Sasiya le ciŋ draʼ de ko wur ɓe no, kurkudu, lebregnee wo de ngari wo de kee naw age ɓaaran wo. Ama jar mani ɓin bay wo de ko jag liŋgi mani Manwurn wa.

⁸ Day joŋge joŋge so ga nday kal wããge ga : Wùr diŋ jar ma de ko re, jag liŋgi mani Manwurn doo wùr so la? Kidolgi mo ma yerge ma doo jar yer jag liŋgin kol ra go diŋ je car geteʼe.

⁹ Jar ko reen wo go nen sõõre, á wo go de caa hẽẽne. À de hoo rage werga á mbuɗ wo foo wããre Manwur go. Koge re ɓaaran bà nà diŋ mayse pa so la?

¹⁰ Diŋ wersen so ndi hã ge weere ɓaaran wo ge go ne jar tigriŋ wo. Ndi hã ge payre ɓaaran wo go ne jar maga yãã ge wo sir ɓaaran wo go mono. Werga, tĩĩ le ti ma kleen hãã go ti ma kluu no, saara diŋ jar maga wo go de hã see ɓaara kiɗgi diŋ daʼge, tĩĩ le ti je ndar nen wããre Baa gon hãã leʼ go ti je siɗ jag no, saara ɓuy diŋ jar maga jag ɓaara ɓog ɓoge.

¹¹ A joŋ wo hragge de wããge ma de caa may mani jar ɓin wo, saɗn wo de el gà. A wãɗ wo ga : Jam yaŋ, jam yaŋ day paga jam bay wa hase.

¹² Sõõre hay nen joŋ rage wer fẽẽre horge see maga saara joŋ ra mono, ama sõõre bay joŋ rage meʼ wa, re bay hoo ti ne hara meʼ wa hase. Diŋ wersen á leɗ ge wo yaŋ go gesiŋ de jar maga leɗ wo go mono, ɓaʼ ge wo yaŋ ti wur maga ndi ur gi le de re ɓaara mono. Manwur wãã nono.

¹³ Kay diŋ jag Manwuri : Ndi yee ge nen ɓaara go, à daʼ ge leʼge tlalum po ɓil pay po gà so hase, à ko ge leʼge hõõ po ciŋ kaʼ gà so has lay sug kooren hig gi wo go. Ndi hã ge ra go ne jar hãã ragen wo doo.

¹⁴ Wer mayse ga naa mbe de lagge gesiŋ lag la? Tay we le, naa raw wo go ɓi leege ma de egren wo, naa wo huɗgi wo go ni! Werga, Manwuri, Baa naan go de taw naa, hã bii go ne naa de mopo nene wer maga naa de ma joŋ ɓlagge see Manwuri mono.

¹⁵ Naa de gorge diŋ jam no, ama mopo ma de el meʼ bay joŋge wa hase! Naa de gor pẽẽge, ama war mbe de rage tum!

¹⁶ À laa bũygi piiri ɓen wo le nen Daŋ. De maga à laa roo piiri ɓe ma de galgen wo mono, tamsir daɗ go ɓuy. Á wo le de seege, á re wo sirn go de fẽẽre ma ɓil ɓen wo ɓuy, ɓi leegen go de jar ma ɓil ɓen wo ɓuy lay.

¹⁷ Werga, ndi, ndi laa cwe wo de bondro wo ne nday yoo, day saŋgu ma pẽẽ jar go jag nee ɓaara bay wa. Á lor ge wo nday yaŋ. Kay diŋ jag Manwuri!

Jermi law ti jar ɓen wo

¹⁸ Ceege ɓin de raw ti ɓi, ngar maga ndi mo joŋ no kay bay nen ɓi wa.

¹⁹ May mani, jar ɓin le de rage le ɓil sir ma hãã. Manwur yaŋ mbe ti Siyoŋ ni pa yawla? Waŋ ɓaaran mbe nà yoo ɓaara ni pa yawla? Wer mayse ga á caa wo jiili ɓi go de fodo ɓaaran wo de fẽẽre waare se ma de koɗ koɗn wo la?

²⁰ Wur weegen raw go, ngel ti ceeren taw we go lay, ama naa bay mbe go de yããge wa ɗa pa.

²¹ See ɓi daŋ me go wer wããge ma de caa may mani jar ɓin wo. Suŋgu leʼ go ne ndi ti. Ndi go nen lawge.

²² Mo ma tagge ma woo see bay wo ti sir Galaad wa so yawla? Dogdor po bay wo ni ɓaara wa so yawla? Wer mayse ga wããge mani may mani jar ɓin bay kaŋ nen meʼ wa has mo la?

²³ O! Hayga ti ɓi mo hay we de bii ɓili noga nen ɓi mo de hay wo we law mberbe no, ndi de raa jar húulí mani may mani jar ɓin wo yaŋ de ceg lay de suŋ lay.