JERMI 7 - Tupuri Bible

Baa da ga Israyel mo coo wo

¹ Manwur kal wãã wããre ne Jermi doo kay nono ga :

² Wo ooge jag tiŋ mani Manwur no, wo ʼwaa ɓay de wããre ma kay no, day ni ndo wãã ga : Laa we wããre Manwur no, nday ɓuy jar Juda maga nday laa ti jag tiŋ sen wo la ma woge leɗ monɗra pel Manwur mono!

³ Manwur Pantway, Baa ma Israyel wãã ga : Coo we seele ɓayn wo de joŋre ɓayn wo ni ndi men ge nday yaŋ de lagge ti ngel sen mo taʼ la no.

⁴ Kaŋ we ɗiggi ɓay ti wããre ma jãɗ jar maga à wãɗ ga : Mo kaʼ la diŋ tiŋ mani Manwur no, diŋ tiŋ mani Manwur no, diŋ tiŋ mani Manwur non mo wa!

⁵ Hayga nday coo seele ɓayn wo we de joŋre ɓayn wo we kidolgi, hayga nday yaŋ joŋge ti faage ɓe cwãy see kããra.

⁶ Hayga nday bay we joŋ bon waare ma yoo ɓayn wo de wel holgen wo de wãy dewurn wo wa, hayga nday bay go kaa cíi jobo reʼ ti ngel mo taʼ la wa day nday tay we de baa ma tigriŋ ma kaŋ re ne see ɓay ti gà lay no,

⁷ Ni ndi men ge nday yaŋ de lagge ti ngel sen lam no, ɓil sir maga ndi hay hãn go ne pããre ɓay wo ma tum mono.

⁸ Ama nday ma ɓay nday fer kaŋ ɗiggi nà diŋ ti wããre ma jãɗ jar maga kay wo nday ti mopo meʼ gà has mono.

⁹ May pa so la! Nday joŋ freŋ, nday id húulí, nday joŋ figliw, nday hãʼ ti geteʼe, nday roɗ fen fõõre ne Baale, nday tay de baa ma tigriŋ maga nday bay de ko rage wa wo!

¹⁰ Blam ɓe nday raw age lagge pel ɓi ɓil tiŋ se maga à tos ndi ne hẽn ti la day nday kal gana : Wùr yãã we go day sen nà ma joŋ fẽẽre yeɗe sen wo mo deŋ ɓuy no!

¹¹ Nday ko tiŋ se maga à tos ndi ne hẽn ti nen ɓay nà doo jag rum jar leɗ faage wo no yawla? Ndi de see ɓi ndi kon nà doosen no an no, Manwur wãã nono.

¹² Wo we bà wo ti ngel ɓi ma bay ɗag ma Silo maga ndi hay joŋ ngel ra ɗúu ɓin wo ni mono, day ni nday ko we maga ndi hay joŋn nà joŋge wer debaycõõre Israyel jar mani ɓin wo mo ɗala.

¹³ Kay diŋ jag Manwur so : Day patala de maga nday joŋ fẽẽre sen wo go ɓuy so, wer maga ndi hay wãã wããre go ne nday de jag toŋ draʼa, day nday day laage ɓe gà wer maga ndi hay ɗe nday day nday laa dayge yiŋ jag gà mono,

¹⁴ Ndi joŋ ge tiŋ maga à tos ndi ne hẽn ti ga nday de kaŋ ɗiggi ti ɓe, ga diŋ ngel maga ndi hay hãn ne nday de pããre ɓay wo yaŋ doo ga ndi hay joŋ Silo no lay.

¹⁵ Ndi tob ge nday yaŋ wo go see ɓi hãã doo ga ndi hay tob hẽẽre ɓay ma ti wer mani Efrayimn wo wo ɓuy no lay no.

¹⁶ Day ndo ma ɓo Jermi mono, tos ti jar sen wo la wa, bul jag go rage, tosge noga wiigi pel ɓi ti ɓaara wa werga ndi laan ge gà.

¹⁷ Nen ɓo bay ko fẽẽre maga á joŋ wo ra ɓi leege ma ti sir Judan wo noga ti blam faage ma Jerusalemn wo mo wa yawla?

¹⁸ Weere saɗ wo hããre, pããreben ngal wo wùu day naaren cãã wo coo ma joŋ gato de ɓe ne wãywaŋ ma ciŋ no, meɗ yii ma siɗ jag ne baa ma tigriŋ wo, ma car jiili ɓi go.

¹⁹ Á car wo go nà diŋ jiili ɓi yawla? Kay diŋ jag Manwuri. Á joŋ wo nà diŋ see ɓaara toga ma kaŋ sõõre ne see ɓaara ti toga gà yawla?

²⁰ Diŋ wersen Waŋkluu Manwur wãã ga : Ko we ga bagge põõ ɓin, wo de sõõge ɓil ɓin bug gi yaŋ go ne ngel sen la ti, ne jar tabayn wo ti de nàyren wo, go ne kooren wo de fẽẽre maga tĩĩ wo ti sir ti day wùu ɓen joŋ ge mbe kaʼ yããge bay huugi.

²¹ Manwur Pantway, Baa ma Israyeln wãã ga : Tay we siɗgi jag ɓay maga à roɗ fẽẽre ɓaaran wo go ɓuy wo ti siɗgi jag ɓay ma lan wo, ni nday re we này ɓaaran wo go!

²² Werga ndi hay wãã wããre po de pããre ɓay wo noga ndi hay hã jag ne hara ti siigi jag maga à roɗ mo ɓen go ɓuy wo de siigi jag ma lan wo ti wur maga ndi hay laa ra le go ɓi sir Ejipte mo gà hase.

²³ Mokay diŋ jag maga ndi hay fern ne hara mono, ndi ga : Laa we jag ɓi nen maga ndi mo hay diŋ Baa ɓay day nday mo hay diŋ jar ɓi wo see we ti faage ɓi maga ndi wii nday ti ɓaara mo ɓuy nen maga nday mo hay de fruygi.

²⁴ Day saara day laage ɓe gà coʼ wo sug ɓi gà kal wo maŋge diŋ blam ɗiggi ɓaara, diŋ ti fen maga jiili ɓaara ma de ɓlagge riŋ ne hara mono. Á fer wo go blam, bay wo seege pel wa.

²⁵ Hãã le ti wur mani pããre ɓay maga laa wo le go ɓil sir Ejipte mono, ndi hay lag weere jõõre ɓi jar ndar nen wããre ɓin wo wo ɓuy see ɓay, ndi hay lag rage wo tum nen naw see ɓay go de jag toŋ ɓaa.

²⁶ Ama nday day laa jag ɓi gà nday coʼ sug gà. Nday kal deŋ gor ɓay go, raw wo joŋ ɓlagge de daŋ pããre ɓay wo pa yaw.

²⁷ Ndo mo fer bà wããre sen wo mo ɓuy ne hara layblaʼ no, á laa ge wo jag ɓo gà ndo mo ngar baa jag wo ne hara layblaʼ no, á yiŋ gi wo jag ne ndo gà.

²⁸ Doo kay no so no wii ra ga : Lam nà diŋ wer jar maga bay wo laa jag Manwuri, Baa ɓaaran wa, ga bay wo laa mopo see ɓaaran ni wa mo so no. Mo ma de deelen yee nen go, á bay wo lagge ti wããre ɓaaran wa so hase.

Israyel taw ge wo go debaŋ

²⁹ Cẽẽ ti ɓo maga ndo hay bagn go ni ndo laan wo go. See wo ʼwaa lele ciŋ ti tipẽẽge ti húulì wo! Werga Manwur go de mbuɗ foo wer jar maga car wo jiili ɓe go mono, á go de tob rage.

³⁰ Werga jar ni Juda joŋ wo fen ma de ɓlagge nen ɓi. Kay diŋ jag Manwuri! A lag wo fẽẽre yeɗe ɓaaran wo ɓil tiŋ maga à ɗe ɗúu ɓi ne hẽn ti mono ma demge ɓe go.

³¹ Á hay bor wo ngel ma de gẽẽre ma cor sõõre wo Tofed ɓil log ma Ben-Hinom no, ma roɗ weere ɓaara wo de mayre ɓaara wo go tum ni. Sen nà diŋ fen maga ndi hay fer jag ɓi ne hara ti ɓe gà has lay, diŋ fen maga hay a baa ne ndi ti meʼ gà has ɓuy lay.

³² Kay diŋ jag Manwuri : Ko we ga wur yaŋ wo le age day à wãã ge ga Tofed noga log ma Ben Hinom gà so hase ama à wãã ge ga : Por ma húulí no. Á a ter ge jar yaŋ go Tofed doo coo ngele.

³³ Húulí jar sen wo la joŋ ge yaŋ diŋ rege dweere ma ciŋ wo de nàyre ma yoofíi wo, day je niɗ rage joŋ ge gà hase.

³⁴ Ndi ham ge jag siŋ fruygi wo de siŋ fewn wo yaŋ go ɓi leege ma ti sir Judan wo, go blam faage ma ɓi leege Jerusalem wo lay. Ndi caa ge wer siŋ yaŋ go ne je ma de yãã wãy wo de may maga à go de yããge ɓe wo jage werga sirn la ɓlag ge go.