JERMI 6 - Tupuri Bible

À ɓug gi Jerusalem go

¹ Nday jar ni Benjame no, daŋ we go, men we Jerusalem go! Wo we ʼwad cõõ wo Tekowa, coʼ we drapo wo Bet-Hakerem! Werga, re le de age nen ɓaŋ gloŋhwede, diŋ re ma kluu maga caa jare.

² Ndi ɓlag ge may ma Siyoŋ ma de woore ma sag seen go!

³ Jar koɗ horog wo go de seege ne hẽn ti de horog ɓaaran wo, á cor wo tiŋ ɓaaran wo go de cir ti ɓe cwẽẽ ɓuy day wosela ɓuy re mbe doo ga ɓil ɓe da nono.

⁴ Maŋ we põõ le ne hẽn ti! Pud we go ciŋ! Naa mo wo go ni de cege! Sen nà re mayse see naa no mo pa so la, wur go de daŋ naa yaw, wur go de coŋ naa bay dayge ni.

⁵ Naa hoo go ciŋ, naa wo mbe de suŋ ni nono! Naa ɓlag tiŋ ɓe ma de wooren wo go!

⁶ Manwur Pantway wãã ga : Car we koore, horge we a le sir ma laa gǔu ciŋ ma dur Jerusalem! Á diŋ ɓi leege maga à nen joŋ bon ɓe, ɓil ɓe ni diŋ joŋ ge bon kããra boŋ tuu.

⁷ Doo gutug maga law bii nono, se law debaycõõre ɓen nà doosen no lay. À laa wo ni nà diŋ re joŋge bon kããran wo de frumgi fẽẽre jar go boŋ tuu. Nen ko mbe ceɓ nà diŋ roo wo de lawge tuu.

⁸ Jerusalem, maŋ mopo see ɓon ni nen maga ndi mo caa see ɓi go de ɓo day ndi mo kol mo go diŋ tabuli noga diŋ sir maga jobo laa tiŋ ni gà so wa ɗala!

⁹ Manwur Pantway wãã ga : A hãã ge jar Jerusalem maga gwaʼ ge wo yaŋ go doo tlalum nono. Fer mbo her doo yoo ɓaara doo je kiɗ blam tlalum her doo yoo jag doo ɓen wo nono.

¹⁰ Ndi mo fer wããre bà nà ne wose mo so la? Ndi mo baa je sedewa nà diŋ wose maga à coʼ sug ɓe yaŋ mo so la? Koɗa sug ɓaara dweɗ go, á kãã wo ma lagge eŋ coʼ sug mopo gà so. Koɗa wããre mani Manwurn kol go nen ɓaara diŋ fen foo, á bay de cõõre jag ɓaara meʼ wa so hase.

¹¹ Ɓil ɓi go de bagge de sõõge ɓil mani Manwur no day ndi gay go doo ɗawge ɓe. Sam pũri ɓe go de weklee ma ti faage no, go de weere jõõre ma de taygen wo lay. Werga, à hoo ge je twarn wo go de wãy ɓe, à hoo ge je de gargen wo de je ma de tããbe koyãɓ no.

¹² De maga ndi maŋ ge doo ɓi we ciŋ see jar ma ɓil sirn wo no, tiŋ ɓaaran wo, payren wo de naare ɓaaran kol ge wo yaŋ go ma jar tigriŋ wo. Kay diŋ jag Manwuri.

¹³ Werga tĩĩ le ti ma klee ma yoo ɓaara no hãã leʼ go ti ma kluu no, wosela ɓuy kiɗ nà jag see ɓe. Tĩĩ le ti je ndar nen wããre Baa gon hãã leʼ go ti je siɗ jag no, saara ɓuy diŋ jar car geteʼ wo.

¹⁴ A saɗ wo wããge mani jar ɓin wo de el gà kal wo ga jam yaŋ, jam yaŋ ni paga jam bay wa hase.

¹⁵ Sõõre hay nen joŋ rage ti fẽẽre horge see maga saara joŋ ra mono ama sõõre ma meʼ draʼ bay joŋ rage wa, fen po bay hoo ti ne hara wa. Diŋ wersen so ga á leɗ ge wo go de jar leɗgen wo, day ɓaʼ ge wo yaŋ ti wur maga ndi ur gi le de ɓaara mono. Manwur wãã nono.

¹⁶ Manwur wãã ga : Od we ti faage wo deŋ deŋ ni nday ko we nene, wiɗ we jag jar ti faage ma ɓaaɓaan wo gana : Faage ma de eln nà genla? Day ni nday see ti ɓe maga maysee ɓay mo daʼ wo iggi. Ama saara kal ferge ga : Wùr see ge ni gà.

¹⁷ Ndi hay lag jar gor ngel wo ne nday day ndi wii we ga : Lag we eŋ ma coʼ sug roo cõõ no! Ama saara kal ferge ga : Wùr day lagge eŋ coʼ sug gà.

¹⁸ Diŋ wersen laa we so, nday jar dehãy no! Day ndo tayge jar Israyel no, ko fen maga le de joŋge ni ɓaara mono!

¹⁹ Tamsiri, laa so! Ko so ga le de age de re ne jar sen wo ti nà diŋ ndi, diŋ wer fen maga saara da ne. Werga, á lag wo eŋ coʼ sug wããre ɓin wo gà day saara ɓoʼ foo jag liŋgi ɓin go.

²⁰ Ndi bà mbi nà de sãy trusa maga a le ti sir Saba noga de sãy fíi fõõre no maga a le ti sir ma hãã ti pa yawla? Siɗgi jag ɓay maga à roɗ mo ɓaaran go ɓuy bay wo fruy ndi wa, siɗgi jag ɓayn bay wo de cõõre jag ɓi wa.

²¹ Diŋ wersen Manwur wãã ga : Ndi, ndi laa húulì ma mbar ɓaale jar ne jar sen wo la pele nen maga pããrebe de weere, jar leege de barge mo cor wo ɗugul ne kããra ti ni day saara taw ge go ni ɓuy.

²² Manwur wãã ga : Ko we ga jar po yaŋ wo le age le ti sir ma nen ɓaŋ gloŋhwede no, wer jar po ma ngaɓa wo le go de pũygi ti jag sir tawge.

²³ Á wo go de kaŋ waa ti toŋ, wo go de ndar manjawre ciŋ kay kay. Á wo diŋ jar ma de huni, bay wo ko decoo jar wa. A sam wo doo maarog nono, wo de ɗidgi ti piiri wo wo go de cirgi mblaʼ mblaʼ ma dur moge, ndo may ma Siyoŋ no!

²⁴ Wùr hay laa re no, day doo wùr lab wo go, hẽẽne caa wùr go, see wùr leɗ wo wùr go cege doo wãy maga de biŋgi nono.

²⁵ Laa we go ɓil pay wo wa, maŋ we blam faage wo wa werga je heen go de oole de moslam ɓen ni, hẽẽnen go ti ngel ɓuy!

²⁶ Ndo may mani jar ɓin wo no, saʼ bugu yoo ɓo doo mblaaga nono day blul go nen sããge. Law doo ga ndo law ti húulì wel maga wer man ɓe boŋ nono, ra mbo go twore ra werga je ɓlag jarn le de age naa ndo ti gǔu.

²⁷ Ndi hay kaŋ ndo doo je maga lam jar mani ɓin wo Doo kor ma de egre kiŋkiŋ nono, nen maga ndo mo daʼ wer go ne hara day ndo mo lam faage ɓaara no.

²⁸ Á wo ɓuy diŋ jar maga ti ɓaara daŋ go doo graŋ, wo diŋ jar lag cogobe, wo graŋ doo boo dob wo de boo nono. Á wo go ɓuy de glubgi.

²⁹ À fid wùu mbe twore fidi, kudn jii mbe go de ele, à gay mbe ga sir ma nen ɓen mo ray go ama sir ma nen ɓen laa go rayge gà.

³⁰ À ɗe ra ga boo solay ma de mbuɗ foo werga Manwur hay mbuɗ foo ɓaara go.