JERMI 5 - Tupuri Bible

Je ma keɗed bay Jerusalem boŋ wa

¹ Wo we raŋge ti faage ma Jerusalemn wo, ko we nene, wiɗ we jag jare, kiɗ we ti ngel tay ti ɓen wo. Hayga nday daʼ jobo we ni boŋ day je se boŋn yaŋ joŋ fen ma ti faage ɓe noga kiɗ diŋ ga se mo joŋ diŋ fen ma de deele no, ni ndi fug gi mbi ɓil yaŋ go ne Jerusalem ti.

² Bà mbe de maga á wãɗ wo ga : Manwur yaŋ mbe tenen mo ɓuy no, á haʼ wo nà ti geteʼe.

³ Manwuri, nen ɓo da koge nà diŋ mo ma de deelen gà yawla? Ndo hay ɓum ra, day see ɓaara bay cee rage wa, ndo hay haɓ ra go day saara laa ko mopo see ɓaaran ni gà. A joŋ wo ti ɓaara go graŋ de daŋ húulì day laa wo dayge cooge gà.

⁴ Ndi hay waa gana : Á wo diŋ jar coo de koɗ koɗe, á joŋ wo fẽẽre wo mbaara hãy tuu wer maga a bay wo de ko faage mani Manwurn wa, bay wo de ko fen maga Baa ɓaaran dan mo wa.

⁵ Ɗawa ɓen ndi wo ge see jar kluurin wo day ndi fer ge wããre ne hara werga á wo de ko faage mani Manwur no, wo de ko fen maga Baa ɓaaran dan mono. Ama paga saara ɓuy wo go de ɓoʼ jug ma soole ɓaara no, wo go de pog dala ma ɓaale ɓaaran lay.

⁶ Diŋ wersen so ga mingir ma yooway go de bag rage, way-baa ma ti mbásgan de lor rage day bel go deŋ beg rage jag feele ɓaaran wo mono. Jar maga laa ge wo go mo ɓuy à lor ge ra go werga ti graŋ ɓaaran raw debaŋ, day de bay ɗawge see ɓaaran yaʼ wer ciŋ debaŋ lay.

⁷ Ndi fug mbi ɓil go ne ndo ti ti sen mokay yawla? Weere ɓon tob wo ndi go day saara raw haʼge diŋ de fen maga sen bay diŋ Baa wa mono. Ndi hay wùu ra go day saara yaʼ joŋ figliw, á far wo go ne kããra ti farge jag tiŋ ni mangawlaŋ no.

⁸ Á wo diŋ bloore piiri maga wo go ga tiʼ i, day wo de re hõõ de ele wosela ɓuy yoo ɓaara ra hĩh hĩh wer wãy kan ɓe.

⁹ Day ndi ur gi de ɓaara ti re fẽẽre sen wo noga ndi saʼ ge hee see ɓi go de wer jar ma doosen no kayn wo gà mbe yawla? Kay diŋ jag Manwuri.

¹⁰ Ɗii we ti kor ɓen wo, ɓlagn we go ane, taw we ra go ɓuy wa. Poʼ we jag doo ɓen wo go werga á bay wo diŋ ma Manwur wa!

¹¹ Werga tiŋ mani Israyeln wo de tiŋ mani Judan re wo ti ɓi go nà rege. Kay diŋ jag Manwuri.

¹² A jãɗ wo Manwuri day wãɗ wo ga : A bay wa! Re ma caa jarn a ge ne wùr ti gà wùr ko ge moslam noga koŋne po ge gà.

¹³ Jar ndar nen wããre Baa gon wo diŋ jar car geteʼe, jobo bay wãã wããre ne hara jag wa. Daga re maga á wãã wo ti ɓe mo fer ne hara ti toga.

¹⁴ Diŋ wersen so Manwuri, Baa Pantway wãã ga : Wer maga nday wãã doo kay nono, ko we ga ndi hee wããre ɓin ne ndo jag doo wùu nono, day jar sen wo la joŋ ge wo yaŋ diŋ koo maga wùu sen la roɗn ge go mono.

¹⁵ Ko we, ndi day hoo wer jar po ma hãã wo le ne nday jar mani Israyeln ti. Kay diŋ jag Manwuri. Á diŋ wer jar ma de egre wo, diŋ wer jar maga wo mbaara le tiʼ hãã ɓaa tuu, diŋ wer jar maga ndo bay laa jag ɓaara wa lay day ndo laa wer fen maga á wããn wo mo gà lay.

¹⁶ Hulwaa ɓaaran doo tuu húulí maga go de hãʼ jag kaʼ nono, á wo ɓuy diŋ jar ma de egre jag durgi wo.

¹⁷ A re ge wo mo ɓo maga ndo ween ge wo go de hoole ɓo no. A re ge wo weere ɓon wo go de mayre ɓon wo, re ge wo fǐiri ɓon wo go de deere ɓon wo, re ge wo tlalum ɓon wo go de koo hõõ ɓon wo. A njegad ge ɓi leege ɓo ma de egre maga ndo de kaŋ ɗiggi ti ɓaara wo yaŋ go de moslam.

¹⁸ Ane, bà ti wur sen wo ni draʼ ndi taw ge nday ge go ɓuy gà Kay diŋ jag Manwuri.

¹⁹ Day hayga nday wãã we ga : Wer mayse ga Manwuri, Baa wùr joŋ wùr de fẽẽre sen wo ɓuy no la no, ni ndo yiŋ jag ne hara ga : Wer maga nday tob me go day nday raw joŋ peele ne baa ma waare wo ɓil sir ɓayn la mono, nday joŋ ge peele yaŋ ne waare wo wo go ti sir maga bay diŋ sir ɓay wa lay.

Jar Israyel bay wo de ti ngel wa

²⁰ Sii we mo ma kay ne tiŋ mani Jakob no, wããn we ti sir Juda maga á mo laan wo!

²¹ Laan we mo ma kay no, nday bay ti se maga re bay cee nday meʼ wa has mono. Nen mbe ti ɓaara, ane saara bay koge wa, sug mbe ti ɓaara, ane saara bay laage wa.

²² Nday joŋ ge bà hẽẽne doo ɓi gà so yawla? Kay diŋ jag Manwuri. Nday daɗ ge bà pel ɓi gà so yawla? Ndi maga laa duguɗgi ne maarog jag diŋ haagu, diŋ dam ma tum ne hẽn jag nen maga á mo cegaɗn go wa mono. Kaŋngaw ɓen horge wo ciŋ, ama saara bay de egre ma cegaɗge ɓe le go wa, á sam wo le ama saara cegaɗn go gà.

²³ Ama jar sen wo la wo diŋ jar maga ɗig wo re gà ti ɓaara graŋ. Á ndar wo see ɓaara go day raw wo jag ɓaara.

²⁴ A bay wo le ɗiggi ɓil ɓaara meʼ draʼ ga : Naa joŋ hẽẽne doo Manwuri, Baa naa maga ra baa ne naa ti wur ɓe mono, ra baa ma jag tobn wo de ma ancoon wo ne naa mo wa bay wo ɗiggi ga saara mo joŋ hẽẽne doo je maga hãã wur weege fẽẽre wo ne hara mo wa.

²⁵ Joŋ ga fẽẽre sen mo joŋ wo ti wur ɓaara wa so nà diŋ debaycõõre ɓayn wo, haw nen de el sen wo wo go nà diŋ ɓlagge ɓayn wo.

²⁶ Werga jar ma de ɓlagge yaŋ yoo jar ɓin wo. A beg wo jar doo je maga de ɓoʼ bày nono, á cir wo bay day horge wo ti ɓaara diŋ jar téebeere wo.

²⁷ Tiŋ ɓaaran wo go de bagge de fẽẽre freŋ wo doo ngel maga à caa nen weere dweere wo ni nono. Á kol wo de egre, de horog nà doo kay nono.

²⁸ A goɓ wo go, see ɓaara go ledlede. Á raw wo wùu joŋge ɓlagge no. A bay wo kay ti wel holgen wa day saara mbe tum de horoge. A bay wo hoo sug ti re mani jar coon wo wa.

²⁹ Doo kay nono, ndi ur mbi yaŋ de ɓaara ti fẽẽre sen wo mo deŋ gà mbi yawla? Kay diŋ jag Manwuri. Ndi saʼ ge hee see ɓi yaŋ go de wer jar ma doosen no kay wo gà mbe yawla?

³⁰ Fen horge see wo de fen yeɗe yaŋ wo ɓil sir ni.

³¹ Jar ndar nen wããre Baan car wo diŋ geteʼe, jar siɗ jagn wo go de kol rage wer ɓaara day jar mani ɓin da wo nà ga á mo hay doosen no so no. Nday bà de ma joŋ mayse ma kay sir ɓayn wo wurpo lay so la?