JERMI 43 - Tupuri Bible

À raw de Jermi de waŋ Ejipte

¹ De maga Jermi ɓoʼ jag fer wããre Manwuri, Baa ɓaaran go ne jarn wo ɓuy, diŋ wããre se maga Manwuri, Baa ɓaaran hay hãn ne hẽn jag ga á mo a wããge ɓe ne hara go mono,

² Asariya je ni Hosaya no, Yohanan je ni Kareyan wo de jar ma far ti see ɓaara ciŋ wo ɓuy kal wo riŋ Jermi gana : Fen maga ndo wããn diŋ geteʼe. Manwuri, Baa wùrn bay le de ɓoʼ ndo riŋ wùr ga wùr mo wo Ejipte ma lagge wo ni wa wa.

³ Ane jãɗ nen ɓo ne wùr ti nà diŋ Barug je ni Neriya no, nen maga wùr mo laa go ne jar Kalde wo doo, day á mo id wo wùr go noga mo hoo wùr ma rawge wo go de wùr Babilone.

⁴ Yohanan je ni Kareya no, jar kluuri sooden wo de jar ma ɓuyn laa wo laa jag Manwur maga riŋ ra ga á mo lag wo ti sir Juda mo gà.

⁵ Yohanan je ni Kareyan wo de jar kluuri sooden wo ɓuy raw wo hoo jar Juda maga gwaʼ wo, ga hay dus wo wo go yoo wer jar dehãy wo ɓuy day fer wo le ma lagge ti sir Juda mono.

⁶ Á hoo wo werpiirin wo, naare wo, weere kleeren wo, mayre mani waŋn wo de jar maga Nebusaradan waŋ sooden hay men ra see Gedaliya je ni Ahikam je ni Safan mo ɓuy, hoo Jermi je ndar nen wããre Baan wo de Barug je ni Neriyan wo lay.

⁷ Saara kal rawge ti sir Ejipte werga á day wo laa jag Manwur gà. Saara raw wo wo go Tahpanhese.

Nebukadnesar ɓlag ge Ejipte go

⁸ Manwur kal wãã wããre ne Jermi ɓi leege Tahpanhes doo kay nono gana :

⁹ Hoo húulì ma kluuri wo doo ɓo day yoŋ ra wer pãy brig ma jag tiŋ ni Farawoŋ ma Tahpanhesn go de nen jar Juda wo ɓuy.

¹⁰ Ndo riŋ gi ra ga : Manwur Pantway, Baa ma Israyeln wãã ga : Ko we, ndi de ɓoʼ jobo le kiɗ Nebukadnesar waŋ Babilon wejõõ ɓi no. Ndi kaŋ ge paale waŋ ɓen yaŋ go ti húulì se maga ndi hay yoŋ ra mono day se ɓoʼ ge hiigi ɓe yaŋ go ti ɓaara.

¹¹ A a ge yaŋ day ɓum gi sir Ejipte yaŋ : Jar maga wo nen húulí, huu wo go maga wo ma daŋgay, raw ge wo ti daŋgay maga wo ma moslam, moslam kaf ge nen ɓaara go!

¹² Ndi hee ge wùu go ne tiŋ baa ma Ejipten wo : Nebukadnesar roɗ ge ra go day hoo ge sõõren wo yaŋ wo go ti daŋgay. Á laa ge sir Ejipte yaŋ go ti ɓe doo ga je koɗge hee õõbe ɓe ti nono day kal ge wo go la jam jam.

¹³ A hrag ge fodo baa ma Bet-Semes ɓil sir Ejipten wo go day hee ge wùu go ne tiŋ baa ma Ejipten wo.