JERMI 42 - Tupuri Bible

Jar Jwif da wo rawge Ejipte

¹ Waŋre sooden wo ɓuy, Yohanan je ni Kareya no, Yesaniya je ni Hosayan wo de jarn ɓuy, tĩĩ ti ma kleen hãã go ti ma kluu raw wo yaʼge le,

² day riŋ wo Jermi je ndar nen wããre Baa gon ga : Daga joŋge kamkam wùrn mo coo jag ɓo. Tos Manwuri, Baa ɓon ti wùri, ti te maga gwaʼ wo mono. Werga wùr hay ngaɓa day wùr gwaʼ go mbage, doo maga nen ɓo de koge ɓe nono.

³ Daga Manwuri, Baa ɓon mo naa nen fen maga wùr nen seege ti ɓe go ne wùr nen maga wùr mo joŋ ne.

⁴ Jermi je ndar nen wããre Baa gon raw riŋ rage ga : Ndi laa we. Ko we ga ndi tos ge Manwuri, Baa ɓayn yaŋ doo maga nday wããn nono. Ndi naa ge nen wããre maga Manwur fern ge go ne nday ɓuy, ndi yoŋ ge mopo go ne nday gà hase.

⁵ Saara kal riŋ Jermi ga : Daga Manwur mo hay diŋ je sedewa ma cwãy ma de deele no, mo joŋ wùr de mopo, hayga wùr lag we ti jag wããre maga Manwuri, Baa ɓon wããn ge le ne ndo jag ne wùr gà mono.

⁶ A mo hay bà diŋ ma de ele noga de ɓlagge, wùr yãã ge jag Manwuri, Baa wùr maga wùr de see wùr tuu wùr ɓoʼ ndo wo see ɓe yaŋ mbe. Doo kay no so no wùr joŋ ge yaŋ de fruygi ti maga wùr yãã jag Manwuri, Baa wùrn mono.

⁷ Naw wo maŋge hwal mono, Manwur raw wãã wããre ne Jermi.

⁸ Jermi raw ɗe Yohanan je ni Kareyan wo le de jar kluuri soode maga hay wo see ɓe mo ɓuy de jar ma ɓuyn wo, tĩĩ le ti ma kleen hãã go ti ma kluu no.

⁹ Se day riŋ ra ga : Manwuri, Baa ma Israyel maga nday hay ɓoʼ ndi wo see ɓe maga ndi mo wo kamge ɓe ne nday wãã so ga :

¹⁰ Hayga nday lag mbay we de tiŋ ɓil sirn la no, ndi gẽẽ ge nday yaŋ ciŋ ɓil ɓe la ni, ndi taw nday ge go gà. Ndi tõɗ ge wer ɓay yaŋ gesiŋ, ndi ndar nday ge go gà werga ndi fer ɗig ɓlagge maga ndi hay joŋ nday de ɓe mono.

¹¹ Joŋ we hẽẽne doo waŋ Babilon maga nday go de hẽẽne doo ɓe mo wa, joŋ we hẽẽne doo ɓe wa werga ndi yaŋ see ɓay ma yãã weege go, ma yãã nday le go doo ɓe. Kay diŋ jag Manwuri.

¹² Ndi joŋ ge ɓil de el yaŋ ti ɓay, se ko ge decoo ɓay yaŋ day fer ge nday yaŋ lagge ti sir ɓay no.

¹³ Ama, hayga nday wãã we ga nday lag ɓil sirn la gà hayga nday laa jag Manwuri, Baa ɓayn we gà

¹⁴ day nday wãã we ga nday, nday raw ge ti sir Ejipte, nday ko ge durgi gà so, nday laa ge roo cõõ wo ni gà hoole pẽẽ ge wo ti ɓay ni gà so day nday wo ge go lagge de tiŋ ni no,

¹⁵ laa we wããre Manwuri mokay so no nday jar Juda maga gwaʼ mono. Manwur Pantway, Baa ma Israyeln wãã ga : Hayga nday ɗig we ga nday raw Ejipte day nday raw wo go ni ma lagge wo go ni no,

¹⁶ moslam maga nday joŋ hẽẽne doo ɓe daʼ ge nday yaŋ wo go ɓil sir Ejipte ni, koŋne maga nday hãy see ɓay go doo ɗiggi ɓe tõõ ge nday yaŋ wo Ejipte ni day nday huɗ gi wo go nà ni.

¹⁷ Jar maga ɗig gi wo ga saara raw Ejipte ma lagge wo go ni mo ɓuy no, moslam, koŋne wo de bulfũŋ taw ge wo ra go. Jobo gwaʼ ge boŋ yoo ɓaara tenen gà lay, je maga yãã ge go jag re maga ndi a ge de ɓe ne hara ti joŋ ge boŋ gà.

¹⁸ Werga Manwur Pantway, Baa ma Israyel wãã ga : Doo maga bagge põõ ɓin wo de ɓil sõõge ɓin hay joŋ jar Jerusalem wo go de gùr nono, sõõge ɓil ɓin joŋ ge nday go de gùr lay hayga nday raw we Ejipte no. Nday kol ge diŋ fen faɗge, fen lawge, fen feg ti, fen mbuɗ fuy day nday ko ge ngeln mo taʼ la gà so hase.

¹⁹ Nday jar Juda maga gwaʼ mono, Manwur wããn ne nday! Wo we Ejipte wa! Laan we go de ele ndi kam nday wara kamge.

²⁰ Nday jãɗ see ɓay de see ɓay werga nday hay ɓoʼ ndi wo see Manwuri, Baa ɓayn ga ndi mo tos Manwuri, Baa ɓayn ti ɓay day ni nday joŋ fen maga Manwuri, Baa ɓayn wããn ge mo ɓuy yaŋ. Nday ga naa mbe nen ɓe go ne nday ni nday joŋn yaŋ.

²¹ Ndi naa nen ɓe we go ne nday ama nday laa laa jag Manwuri, Baa ɓayn gà lay, laa fen maga á hay hãn le me jag ga ndi mo wããn ne nday mo gà lay.

²² Kon we go de el patala so, moslam, koŋne wo de bulfũŋ taw ge wo nday wo go ti ngel maga nday da ga nday raw wo go lagge ni mono.