JERMI 4 - Tupuri Bible

¹ Israyele, hayga ndo fer we le, hayga ndo fer we le see ɓi no! Hayga ndo lag fẽẽre horge seen wo wo go day ndo yee nen ɓaara we go pel ɓi, hayga ndo bay daw see ɓo wa so hase,

² hayga ndo haʼ we ga Manwur yaŋ tenen diŋ ti cwãy, ti ngel ɓe day ti faage ɓe lay no, jar dehãy wãã ge wo yaŋ ti see ɓaara ga saara de bosaʼ Manwur ti, day saara kee see ɓaara yaŋ diŋ wer ɓe. Kay diŋ jag Manwuri.

³ Werga, Manwur wãã ne jar Juda wo de jar Jerusalem wo ga : Par we diŋ pay ma defay, joʼ we yoo ɗewseŋ wa so.

⁴ Caa we ɓĩĩni ɓay go wer Manwuri, coo we jiili ɓay wo nen maga bagge põõ ɓin mo doʼ nday go doo wùu nono day giŋ go nen maga jobo iin go gà so wer hun ma nen joŋre ɓayn wo gà wa.

Reen a ge le nen gloŋhwede

⁵ ʼWaa we ɓay sen go ti sir Juda, wo we ʼwadge ɓe ɓi leege Jerusalem! Wããn we go! ʼWad we cõõ ɓil sir no! Ngar we jag go jag ciŋ kloŋ day wãɗ we ga : Tay we le, naa see wo go ɓi leege ma de egren wo!

⁶ Maŋ we drapon wo ciŋ nen ti Siyoŋ, daŋ we, lag we ti faage wa! Werga, ndi a ge yaŋ le de reen le nen ɓaŋ gloŋhwede, diŋ re ma kluu ma caa jare.

⁷ Mingirn le go de men yoo lir ɓe no, je taw wer jarn le go ti seele. Á le go de men ngel hayle ɓe no, ma kaŋ lawge ne sirn ti. Ɓi leege ɓon ɓlag ge wo go, jobo joŋ ge ɓil ɓaara gà hase.

⁸ Diŋ wersen saɗ we bugu yoo ɓay doo mblaaga nono, ra we, day law we see ɓay. Werga, bagge põõ ma de hãã mani Manwurn bay go de tawge ti naa wa.

⁹ Kay diŋ jag Manwuri : Ti wur sen mono, waŋ wo de minisdir ɓen hoo ge wo egre yaŋ go, jar siɗ jagn car ge wo jiili yaŋ go, jar ndar nen wããre Baan ngris gi wo yaŋ.

¹⁰ Ndi day ga : Hi!, Waŋkluu Manwuri! Ndo sãʼ jar sen la wo de jar Jerusalem wo go de maga ndo wãã ne hara ga á joŋ ge wo yaŋ jam tiʼ mono, day bà mono moslam go de taw wùri!

¹¹ Ti wur sen ni à riŋ gi jar sen la wo de jar Jerusalem wo yaŋ ga : Leege ma de tuu le de fidgi le nen ti puuli ti faage jar ni may mani jar ɓin wo, bay diŋ leege ma faʼ coore noga ma hoo hoole ɓen go wa.

¹² Á diŋ leege ma de egre debaŋ maga ur le ni hãã a go see ɓi la. Patala ndi bag jag re ɓin wo go see ɓaara so.

¹³ Kon we le de naa sãy doo swaare wo mo tiʼ no! Pus durgi ɓen wo doo degurleege nono, piiri ɓen ɗee wo de daŋ ʼwǔr wo. Wùr taw we go, werga à frum wùr go!

¹⁴ Jerusalem, yog ɓlagge ma jiili ɓon go nen maga ndo mo yãã go jag reen so! Ndo ɗaw ge ɗiggi ma bay blam wo mbaara ɓil ɓo kay nà hãã hun mo la?

¹⁵ Werga, à le de ngar jag le Daŋ, à le de ʼwad ɓay le ti húulì ma Efrayimn wo ti re ma caa jar no.

¹⁶ Fer we ɗig ti wer jar wo ti re seno, naa we nen ɓe go ne jar Jerusalem wo gana : Jar ɓug ngel ma ti sir ma hãã wo le de seege, á wo de ʼwad war ti jar ma ti sir Judan wo.

¹⁷ A cir wo ti Jerusalem go doo jar maga wo de gor ti pay nono werga á joŋ ti graŋ go see ɓi. Kay diŋ jag Manwuri.

¹⁸ Mono diŋ poɗge ɓo ti seele ɓon wo de joŋre ɓon wo, diŋ fen maga debaycõõre ɓon daʼ le ne ndo mono. Kidolgi á diŋ fen maga hã pũũri ne ndo, á cog ndo wo go ɓil tem tem.

Jermi leʼ cege go doo re maga caa jar ɓen wo

¹⁹ Ɓiiri ɓi! Ɓiiri ɓi! Jag jiili ɓi leʼ wùu go ɓuy! Jiili ɓi ndar ndi, ndi kãã ma hayge baʼ gà. Maysee ɓi de laa sug roo cõõn wo de war durgi no.

²⁰ À laa nà diŋ sug re ma caa jar mbe pa, mbe pa werga sirn go de ɓlagge ɓuy. Doo no kay tuu kola tiŋ ɓi ma de bagge mbaara go de ɓlagge tuu, duuli ɓin yee mbaara nen go jag taʼ boŋ tuu.

²¹ Nen ɓi taw ko drapon go nà hã hunla? Sug ɓi men laa laa roo cõõn go nà hãã hunla?

²² Cwãy, jar mani ɓin wo go de loɗge, á bay wo de ko ndi wa. Á wo diŋ weere ma bay ko re wo, wo bay ti. Á wo de ɗeŋ diŋ ti joŋge ɓlagge tawa, ama saara bay de ko joŋ de el wa.

²³ Ndi ko tamsiri, kola se go busum-busum lay, go ɓil koɗ lay. Ndi ko nen wo ciŋ, mopo bay sagge meʼ draʼ wa so hase.

²⁴ Ndi ko húulì wo, kola saara go de mbuggi day ngel ma de farge ciŋ wo go de semayge ɓuy lay.

²⁵ Ndi ko nene, je táabay bay jẽd caw wa so, dweere ma ciŋ daŋ wo we de deere ɓuy lay.

²⁶ Ndi ko nene, kola húulì Karmel go diŋ puuli, ɓi leege ma ti ɓen wo ɓuy yee wo nen go pel Manwuri, wer bagge põõ ɓe ma de hãã no.

²⁷ Werga Manwur wãã ga : Sirn ɓuy kol ge yaŋ go nen lawge ane, ndi ɓlagn ge go has ɓuy gà.

²⁸ Diŋ wersen so ga sirn go ɓuy ti roo day ngel ma ciŋ go de ɓoʼ suŋgu tigiɗ lay mono. Werga ndi hay wããn go, ɗiggi ɓi nà doosen nono, ndi fer ge go jwag jag ɓi gà ndi fer ge blam ti sen gà.

²⁹ Ɓi leegen ɓuy daŋ wo de ɗeere doo war ma jag jar piirin wo de jar waan wo. À lag yoo lir wo, à ɗid go ti húulì wo. Ɓi leegen ɓuy go de gwaʼge de koɗe, jobo bay de tiŋ ni wa so hase.

³⁰ Ndo maga a frum ndo go mono, ndo joŋ ge bà nà may la? Ndo hee ge õõbe ma de sẽẽ ti yaw, ndo biŋ gi fẽẽre woore ma de joŋge de boo biŋni wo see yaw noga ndo klir gi fẽẽre woore wo nen ɓo yawla? Ndo joŋ ge see ɓo de woore nà de koɗ koɗe. Ndeere ɓon wo de mbuɗ foo ɓo, á da wo taw ndo go.

³¹ Werga ndi de laa roo po doo roo wãy maga ɓil de leʼge ɓe ma biŋgi nono, doo roo ndumgi wãy ma jag degawna nono. A nà diŋ gẽẽge may ma Siyoŋ no. Á de ndumgi, á de waɗ doo ɓe wo day wãã ga : Re caa ndi go ɗala! Maysee ɓi go de gayge doo mbarge jar id húulín wo.