JERMI 39 - Tupuri Bible

À yãã Jerusalem go

¹ Ti kiŋgi ma de kaawaʼ maga Sedesiyas waŋ Juda ti waŋ, nen few ma de hwaln mono, Nebukadnesar waŋ Babilon raw age de soode ɓen wo ɓuy kaŋge jag Jerusalem day cir wo ti ɓe go.

² Nen kiŋgi ma de hwal ti boŋ ga Sedesiyas ti waŋ nen few ma de naa ti naw ma de kaawaʼn mono, à raw caa ywaale ti kor ma ɓi leege no.

³ Mo so no minisdir mani waŋ Babilon raw wo le yaʼge day lag wo jag tiŋ ma ti gisiɗgi no, diŋ Nergal-Saretser, Samgar-Nebu, Sarsekim waŋ jar ma de ndar ɓayn wo, Nergal-Saretser waŋ jar ko wer fẽẽre wo de minisdir mani waŋ Babilon ma lan wo ɓuy.

⁴ De maga Sedesiyas waŋ Juda wo de jar durgin wo wo ko rage mokay saara kal daŋge de ɗeere, laa wo go de suŋ ti faage ma ɓil pay sugnee mani waŋ ti holaŋ kor ma ɓogn wo day laa wo wo go ti faage maga kal wo go ɓil Araba mono.

⁵ Ama soode mani jar Kalden hoo wo ɗeere wer ɓaara wo wo baa Sedesiyas wo ɓil ful ma Jerikon wo. Saara raw bagge ɓe, raw wo de ɓe see Nebukadnesar waŋ Babilon wo Ribla ɓil sir Hamade, se raw wãã fen maga se ɗign ti ɓe go ni.

⁶ Waŋ Babilon raw ngaɗ weere mani Sedesiyasn wo go nen ɓe Ribla ni. Waŋ Babilon ngaɗ jar ma tinoo ma Judan wo go lay.

⁷ Blam ɓe se raw ɓer nen Sedesiyas go, mbar geyam boo dob wo ne hẽn ma rawge de ɓe Babilone.

⁸ Jar Kalde raw wo hee wùu go ne tiŋ mani waŋ no, go ne tiŋ mani jar sirn wo. Saara raw mbug kor ma ti Jerusalem wo go.

⁹ Ma jar maga sen gwaʼ wo ɓi leege ni, jar maga hay kol wo go wer waŋ Babilon de te jar maga hay gwaʼ wo de tiŋ ni mono, Nebusaradan, waŋ sooden raw rawge de ɓaara.

¹⁰ Ama jar coo ma yoo jar maga mo ɓaara bay wa mono, Nebusaradan waŋ sooden raw men rage ɓil sir Juda ni day hã payre tlalum wo de payre wo ne hara ti wur sen ni.

¹¹ Nebukadnesar waŋ Babilon hay fer jag ɓe le ne Nebusaradan waŋ sooden wo ti Jermi ga :

¹² Baa ne, day nen ɓo mo hay ti ɓe taʼ, joŋn de ɓlagge po meʼ wa ama joŋn doo maga á wii gi ndo nono.

¹³ Nebusaradan waŋ sooden wo lay, Nebusasban waŋ jar ma de ndar ɓayn wo lay, Negal-Saretser waŋ jar ko wer fẽẽren wo de jar kluuri mani waŋ Babilon,

¹⁴ raw wo baa Jermi le go ɓi feele tiŋ daŋgay no, raw wo hãge ɓe ne Gedaliya je ni Ahikam je ni Safan nen maga á mo wo de ɓe liŋ ni ɓe. Jermi raw gwaʼge yoo jarn ni.

¹⁵ Manwur kal wãã wããre ne Jermi de maga á hay de diggi ɓi feele tiŋ daŋgayn doo kay nono ga :

¹⁶ See wo wãã wããre ne Ebed-Meleg je Etiyopi no day ni ndo riŋn ga : Manwur Pantway, Baa ma Israyeln wãã doo kay nono ga : Ko ga ndi day age de fen maga ndi hay wããn go ne ɓi leegen ti, diŋ fen maga a ge de re ne hara ti bay diŋ fen ma de el see ɓaara wa. Re sen joŋ ge ti naw sen la de nen ɓo.

¹⁷ Ama ti wur sen mono ndi yãã ge ndo yaŋ go. Kay diŋ jag Manwuri. Ndo joŋ ge go ɓi coo doo jar maga ndo de ma joŋ hẽẽne ɓaara mo gà.

¹⁸ Ndi joŋ ge yaŋ ga ndo yãã go jag ɓaara day moslam taw ge ndo go gà. Daʼge ɓon joŋ ge nà diŋ tenen ɓo no werga ndo hay kaŋ ɗiggi ti ɓi mono. Kay diŋ jag Manwuri.