JERMI 38 - Tupuri Bible

À ɓoʼ Jermi go ɓi gutugi

¹ Sefatiya je ni Mataŋ no, Gedaliya je ni Pakhur no, Yukal je ni Selemiyan wo de Pakhur je ni Malkiya raw wo laa wããre maga Jermi hay wãɗge ɓe ne jar wo ɓuy mono. Á hay wãɗge ga :

² Manwur wãã ga : Je maga gwaʼ ge we ɓi leegen la huu gi go doo moslam, doo koŋne noga bulfũŋ. Ama je maga kal ge we go ma hã see ɓe go ne jar Kalde wo no, sen yãã see ɓe yaŋ go, daʼge ɓen diŋ tenen ɓe no day se joŋ ge yaŋ tenene.

³ Manwur wãã ga : Ɓi leegen la kol ge yaŋ go kidolgi nen doo soode mani waŋ Babilon wo day saara yããn ge go.

⁴ Minisdirn raw wo riŋ waŋ ga : Bloo sen go ma ʼwarge! Werga, á woɗ doo jar durgi maga gwaʼ wo ɓi leegen la wo go de jar ma ɓuy de wããre ɓe ma doo kayn wo. Bloo sen la bay kiɗgi diŋ jam jarn wa ama diŋ ga re mo caa ra.

⁵ Waŋ Sedesiyas kal ferge ga : Á go nen doo ɓay, waŋ kãã ma wãã mopo ti ma ɓayn ni gà.

⁶ Saara raw baa Jermi ɓoʼn wo go ɓi gutug mani Malkiyahu je ni waŋ no, diŋ gutug maga hay ɓi feele tiŋ daŋgayn mono. Saara kal cwaa Jermi wo ni de sáale. Bii hay bay wo ɓi gutugn ni wa, hay ni diŋ pããge day Jermi raw yõɓge nen pããge no.

⁷ Ebed-Meleg je Etiyopi je ma de ndar ɓay ma liŋ ni waŋn raw laage ga à ɓoʼ Jermi go ɓi gutugi. Waŋ hay de hayle go ti jag faage maga raw wo ti sir Benjame mono.

⁸ Ebed-Meleg raw men tiŋ waŋ wo go day wo riŋ waŋ doo kay nono ga :

⁹ O waŋ je wãã re ɓi no, jar sen joŋ wo de el ti fen maga á joŋ wo Jermi je ndar nen wããre Baan de maga á ɓoʼn wo go ɓi gutug mo gà. Á huu gi wo go ni werga hoole bay ɓi leege wa so.

¹⁰ Waŋ raw fer jag ɓe ne Ebed-Meleg je Etiyopin ga : Hoo jar wer ɓo la doo swaʼa, wo le go maŋ Jermi je ndar nen wããre Baa gon le go ciŋ ɓi gutug no, go taŋgu maga se bay húulí ɗa mono.

¹¹ Ebed-Meleg raw hoo jar wer ɓe, kal wo liŋ ni waŋ ti ngel ma wer tiŋ ma laa horogn mono. Se raw horge njudgi õõbe wo de õõbe ma de ngragge, kal coŋ rage wo ne Jermi de saale ɓi gutug no.

¹² Ebed-Meleg je Etiyopi day wii Jermi ga : Laa njudgi õõbe sen wo de õõbe se ma de ngraggen wo wer ɓo ti saale no. Jermi raw joŋge doosen nono.

¹³ Saara raw maŋ Jermi le go de saalen wo, maŋn wo le go ɓi gutug no. Jermi raw kolge mbe go caw ɓi feele tiŋ daŋgayn so.

Jermi ndal wo de waŋ

¹⁴ Waŋ Sedesiyas raw ɓoʼ jobo ɗe Jermi je ndar nen wããre Baan le day à raw age de ɓe see ɓe ti jag faage ma de swaʼ maga kal ɓil tiŋ mani Manwurn mono. Waŋ raw riŋ Jermi ga : Ndi wii mopo jag ɓo boŋ, yoŋ mopo go ne ndi wa hase.

¹⁵ Jermi raw ferge ne Sedesiyas ga : Hayga ndi naa nen ɓe we ne ndo no, ndo ʼwar ndi go gà yawla? Ndi mo baa yaŋ bà ne ndo la, ndo day ge laage ɓe gà.

¹⁶ Waŋ Sedesiyas raw haʼge go ne Jermi freŋ ga : Manwur yaŋ tenene, Manwur maga hã tenen ne jar mono! Ndi ʼwar ge ndo go gà ndi hã ge ndo go ne jar maga da wo taw naw ɓo go doo gà lay.

¹⁷ Jermi kal riŋ Sedesiyas so ga : Manwuri, Baa Pantway, Baa ma Israyeln wãã doo kay nono ga : Hayga ndo kal we go caa pel minisdir mani waŋ Babilon wo no, ndo yãã maysee ɓo yaŋ go, à roɗ ge ɓi leegen la go de wùu gà lay day nday de jar ni ɓo nday joŋ ge yaŋ tenen tiʼ i.

¹⁸ Ama hayga ndo kal we go caa pel minisdir mani waŋ Babilon wo gà no, ɓi leegen la kol ge go ɓi coo doo jar Kalde wo, saara hee ge wùu go ne hẽne day ndo, ndo yãã ge go doo ɓaara gà.

¹⁹ Waŋ Sedesiyas kal riŋ Jermi gana : Hẽẽne joŋ ndi doo jar Jwif maga kol wo go wer jar Kalde wo mono, ndi joŋ hẽẽne ga à hã ndi go ne hara ɓi coo doo day saara las ndi ge mono.

²⁰ Jermi raw ferge ga : À hã ge ndo go gà. Laa jag Manwur ti fen maga ndi wããn ne ndo mono, ndo daʼ ge see ɓo yaŋ day ndo yãã ge maysee ɓo yaŋ go.

²¹ Hayga ndo day we go kalge gà no, mokay diŋ wããre maga Manwur naa nen ɓe ne ndi mono :

²² Naare maga gwaʼ wo liŋ ni waŋ Juda mo ɓuy à hoo ge ra wo go ne minisdir mani waŋ Babilon wo day naare sen la wãã ge wo yaŋ ga : Jar maga hay wo jam de ɓo hay joŋ wo loɗge ɓo, Á hay kol wo go wãã re ɓo Day de maga ɓaale ɓo yõɓ go nen pããge so mono, Saara raw maŋ ɓil go ɓuy.

²³ À hoo ge naare ɓon wo de weere ɓon wo wo go ɓuy ne jar Kalde wo day ndo, ndo yãã ge go doo ɓaara gà lay. Doo waŋ Babilon baa ge ndo day se roɗ ge ɓi leegen la go de wùu.

²⁴ Sedesiyas kal riŋ Jermi ga : Jobo mo laa wããre sen wo go meʼ wa hase, jobo ʼwar ndo go gà.

²⁵ Hayga minisdirn laa ge wo we ga ndi hay wãã wããre we de ɓo day hayga á a wo we riŋ ndo ga ndo mo fer fen maga ndo fern ne waŋ noga maga waŋ fern ne ndo, yoŋ mopo ne saara wa ni saara ʼwar ndo go gà no,

²⁶ ni ndo fer ge ne hara ga : Ndi hay joŋ kam kam pel waŋ maga á mo fer ndi wo liŋ ni Jonataŋ maga ndi mo huu wo go ni wa.

²⁷ Minisdirn raw wo age see Jermi ɓuy day wii wo jag ɓe. Se raw fer wããre ne hara doo jag maga waŋ hay wããn nono. Saara kal rawge go bay jage werga wããren hay bay go de dusgi wa.

²⁸ Jermi raw gwaʼge ɓi feele tiŋ daŋgayn ni hãã wo go ti wur maga à yãã Jerusalem go mono. Mokay diŋ faage maga à yãã Jerusalem go de ɓe mono.