JERMI 37 - Tupuri Bible

Jermi ti daŋgay

¹ Waŋ po, diŋ Sedesiyas je ni Josiyas kol ti ngel Koniyahu je ni Yehoyakim no. Nebukadnesar raw hayge ɓe waŋ ti sir Juda.

² Hayba se noga weere jõõre ɓen wo, ko jar ma ɓil sirn wo saara bay laa wããre maga Manwur hay ferge ɓe ne hara nen doo Jermi je ndar nen wããre Baa gon mo wa ɓuy.

³ Waŋ Sedesiyas raw laa Yehukal je ni Selemiyan wo de Sofoni je ni je siɗ jag Maaseyan wo wo see Jermi je ndar nen wããre Baan ma riŋgi ɓe ga : Tos Manwuri Baa wùrn ti wùr ɗala.

⁴ De sen ni Jermi hay nà wo le, fer le, caw yoo jar no. Á á hay bay de bagge ɓe ti daŋgay wa ɗa.

⁵ Soode mani Farawoŋ laa wo le go Ejipte. Jar Kalde maga hay wo de kaŋge jag Jerusalem de cir ti ɓe go laa wo re sen mokay kal wo maŋ ɓil go see Jerusalem.

⁶ Mo so no Manwur raw wãã wããre ne Jermi je ndar nen wããre Baan doo kay nono ga :

⁷ Manwuri, Baa ma Israyeln wãã so ga : Nday wo ge riŋ waŋ Juda maga laa nday le see ɓi ma wii jag ɓi ga : Ko ga soode mani Farawoŋ maga hay laa wo le caa war ɓo fer wo we ɓil sir ɓaara Ejipte.

⁸ Jar Kalde fer ge wo yaŋ le day leʼ ge wo ɓi leegen la yaŋ, á yãã ge wo ne day hee ge wo wùu go ne hẽne.

⁹ Manwur wãã ga : Jãɗ we see ɓay de wãɗge ga jar Kalde maŋ ge wo ɓil yaŋ wo go see ɓay hãã nà wa, werga á raw ge wo gà.

¹⁰ Nday mo taw bà soode mani jar Kalde maga wo de dur nday wo go ɓuy yaw, day jar mo gwaʼ bà ɓog yoo ɓaara go de car wããge see ɓuy yaw, á hoo ge wo ɓaara yaŋ le tiŋma ni ɓaara day a ge mbaara go roɗ ɓi leegen la de wùu.

¹¹ De maga soode mani jar Kalden maŋ wo ɓil wo go see Jerusalem doo soode mani Farawoŋn wo mono,

¹² Jermi raw ga se kal go, se men Jerusalem go ma woge ti sir Benjame werga à wo de ɓes fẽẽre wo ne jar ni day se wo yãã ne mani sen lay.

¹³ De maga á wo dayge ti jag faage maga raw wo ti sir Benjame mono, je wããre jar gor ngel maga à ɗen ga Yiriya je ni Selemiya je ni Hananiyan hay ni, se raw baa Jermi je ndar nen wããre Baa go no day ga : Ndo kol go nà wer jar Kalde wo!

¹⁴ Jermi raw ferge ga : Sen diŋ geteʼe! Ndi bay go kol ge wer jar Kalde wo wa. Ama Yiriya laa laage ɓe gà kal bagge ɓe, raw de ɓe ne minisdirn wo.

¹⁵ Ɓil minisdirn sõõ wo ne Jermi ti, saara raw mbarge ɓe, kal wo ɓoʼge ɓe ti daŋgay liŋ ni Jonataŋ je yerge no werga á hay koln wo diŋ tiŋ daŋgay.

¹⁶ Doo kay nono à kal ɓoʼ Jermi wo ɓil tiŋ ma de tuun ɓil tiŋ ma hwede no, se ig wo ni wolaŋ debaŋ.

¹⁷ Waŋ raw ɓoʼ jobo kiɗgi ɓe day wii jag ɓe go freŋ liŋ ni ɓe ga : Manwur yaŋ de fer wããre yawla? Jermi kal ferge ga : Ãã, yaŋ mbe. Se day wãã ni pa ga : À hã ge ndo go ne waŋ Babilon ɓi coo doo.

¹⁸ Jermi day riŋ waŋ Sedesiyas pa ga : Ndi hay joŋ see ɓo, see weere jõõre ɓon wo noga see jarn wo nà diŋ ɓlagge mayse ga nday ɓoʼ me ti daŋgay la?

¹⁹ Jar ndar nen wããre ne nday ga hay wo wãɗge ga waŋ Babilon a ge dur nday gà lay, dur sir gà lay wo gen yawla?

²⁰ Patala ndi kem ndo kamge waŋ, je wãã re ɓi no, coʼ sugi, day daga kamkam ɓin mo co jag ɓo. Fer ndi wo ɓi tiŋ daŋgay liŋ ni Jonataŋ je yergen maga ndi mo huu wo go ni wa so.

²¹ Waŋ Sedesiyas raw riŋgi ga à mo ko ngar Jermi go ɓi feele tiŋ daŋgay no, à mo hã hoole pẽẽ ma ti faage ga jar joŋge ɓe joŋn wo ne hẽn boŋ nen naw tum hãã hoole pẽẽ ma ɓi leege wo go tawge ɗa. Jermi raw kolge mbe go caw ɓi feele tiŋ daŋgayn so.