JERMI 36 - Tupuri Bible

Yehoyakim roɗ kefder mani Jermin go

¹ Nen kiŋgi ma de naa maga Yehoyakim je ni Josiyas, waŋ Judan ti waŋ mono, Manwur kal wãã wããre ne Jermi doo kay nono ga :

² Maŋ kefder ma de kaage no, ni ndo yer wããre maga ndi hay wãɗ ra ne ndo ti Israyele, ti Juda wo de jar dehãyn wo mo ɓuy ɓil ɓe mono, tĩĩ le ti wur maga ndi hay wãã wããre le ne ndo ti kal mani Josiyasn mono hãã go wara.

³ Tiga tiŋ mani Judan coʼ sug re maga ndi de ɗiggi ɓe ga ndi joŋ ra de ɓe yaŋ day wosela ɓuy yoo ɓaara men faage ɓe ma de ɓlaggen yaŋ go layblaʼ no, ni ndi fug ɓil yaŋ go ne hara ti debaycõõre ɓaaran wo de ɓlagge ɓaara no.

⁴ Jermi raw ɗe Barug je ni Neriyan le, Jermi wãã de jag ne Barugi day Barug raw yer wããre maga Manwur hay wãɗ ra ne Jermi mo ɓuy go ɓil kefder ma de kaage.

⁵ Blam sen Jermi raw riŋ Barug ga : Ndi ɓin ndi de diggi, ndi kãã ma wo ge ɓil tiŋ mani Manwurn gà.

⁶ Ndo de see ɓo tuu, ndo wo ge kee wããre mani Manwur maga ndi hay wãã ra day ndo yer ra go ɓil kefder go pel jar wo ɓil tiŋ mani Manwur ti wur hẽẽge bii no. Ndo kee ge ra go pel jar Juda maga a wo le ɓi leege ɓaara wo mo lay no.

⁷ Tiga joŋge kamkam ɓaaran day Manwur yaŋ noga wosela ɓuy yoo ɓaara men faage ɓe ma de ɓlagge yaŋ go layblaʼ no. Werga, bagge põõn kluu, diŋ sõõge ɓil maga Manwur de sõõge ɓe ne jarn ti mono.

⁸ Barug je ni Neriyan raw joŋge doo maga Jermi je ndar nen wããre Baan hay fern ne hẽn no ɓuy no se raw kee wããre Manwur ma ɓil kefdern go ɓil tiŋ mani Manwur no.

⁹ Nen kiŋgi ma de dwee maga Yehoyakim je ni Josiyasn, waŋ Judan ti waŋ mono, à raw ʼwaa ɓay hẽẽge bii pel Manwur nen few ma de kaawaʼn go ne jar Jerusalem wo ɓuy de jar maga a wo le ɓil sir Juda go Jerusalem mono.

¹⁰ Barug raw kee wããre ma ɓil kefder mani Jermi wo go ɓil tiŋ mani Manwurn go pel jarn ɓuy. Á hay nà tiŋma ni Gemariya je ni Safan je yergen, ɓil feele ma nen ciŋn ti jag faage tiŋ mani Manwur ma defay no.

¹¹ Mise je ni Gemariya je ni Safan kal laa wããre Manwur ma de yerge ɓil kefdern wo go de sug ɓe ɓuy,

¹² se raw rawge wo liŋ ni waŋ tiŋma ni je yerge no. Minisdirn wo ɓuy, Elisama je yerge no, Delaya je ni Semaya no, Elnatan je ni Akbor no, Gemariya je ni Safan no, Sedesiyas je ni Hananiyan wo de minisdir ma lan wo ɓuy hay wo de tay ti ni.

¹³ Mise raw fer wããre maga se hay laa ra le de maga Barug hay kee kefdern go pel jarn mo ɓuy go ne hara ɓuy.

¹⁴ Mo so no minisdirn wo ɓuy raw wo ɓoʼ Yehudi je ni Netaniya je ni Selemiya je ni Kusin wo see Barug ma riŋgi ɓe ga : Maŋ kefder ma de kaage maga ndo hay keen go pel ngaɓan le doo ɓo ni ndo a le! Barug je ni Neriyan raw maŋ kefder ma de kaagen le doo ɓe, kal woge see ɓaara.

¹⁵ Saara kal riŋgi ɓe ga : Hay gesiŋ day kee ne, wùr laan de sug wùr lay. Barug raw keege ɓe saara laan de sug ɓaara.

¹⁶ De maga á laa wo wããre sen wo go de sug ɓaara mono, saara raw ko kããre ngil ngil doo hẽẽne day wii wo Barug ga : Wùr naa ge nen wããre sen wo yaŋ go ɓuy ne waŋ.

¹⁷ Saara kal wii jag Barug so ga : Ndo joŋ nà joŋge maga ndo yer wããre ma jag ɓen go mo la, wããn ne wùr ɗala?

¹⁸ Barug raw ferge ne hara ga : Á hay wããn ra go jag ciŋ kloŋ ne ndi de jag ɓe day ndi hay go yer rage ɓil kefdern la de bii ma yerge no.

¹⁹ Minisdirn raw wo riŋ Barug ga : See, nday de Jermi yoŋ we go nen maga jobo mo ko ngel maga nday ni mo wa hase.

²⁰ Minisdirn raw wo woge ɓi feele mani waŋ no, men wo kefdern le go de ɓoʼge tiŋma ni Elisama je yerge no, day saara kal naa nen wããre ma ɓil ɓen wo go ɓuy ne waŋ.

²¹ Waŋ raw ɓoʼ Jehudi maŋ kefder ma de kaage no. Jehudi raw maŋge ɓe le tiŋma ni Elisama je yerge no day se kal keege ɓe go pel waŋ wo de minisdir maga hay wo ni mo ɓuy.

²² Waŋ hay de hayle nà ɓil tiŋ ɓe ma caa yaale no, nen few ma de kaawaʼ no day wùu hay de ngalge pel ɓe kaʼa.

²³ De maga Yehudi kee budgi kefdern go swaʼ noga naa mono, waŋ caa sen go tuu de mocẽẽti mani je yerge no day laa go nen wùu maga hay de ngalge pel ɓe mono hãã kefder ma de kaage taw roɗge go ti wùu ɓuy.

²⁴ A nà doo kay no so ga waŋ wo de weere jõõre ɓe maga laa wo wããre sen wo mo ɓuy joŋ wo hẽẽne gà ngrag wo õõbe ma ti ɓaaran wo go gà lay mono.

²⁵ Bà mbe de maga Elnatan, Delaya wo de Gemariya kem wo mbaara waŋ kamge ga á mo roɗ kefder ma de kaagen go wa mo ɓuy no, se day yãã jag ɓaara gà.

²⁶ Waŋ raw riŋ Yerahmeel je ni waŋ no, Seraya je ni Asriyeln wo de Selemiya je ni Abdeeln wo ga á mo wo wo hoo Barug je yergen wo le de Jermi je ndar nen wããre Baa no, ama Manwur raw yoŋ rage go.

Re maga caa Yehoyakim mono

²⁷ Blam maga waŋ roɗ kefder ma de kaage maga Barug hay yer wããre maga Jermi hay wãɗ ne hẽn de jag ɓe wo ni go mono, Manwur kal wãã wããre ne Jermi doo kay nono ga :

²⁸ Maŋ kefder ma de kaage ma tigriŋ ni ndo fer yer wããre maga hay wo ɓil kefder ma de kaage ma taŋgu ga Yehoyakim waŋ Juda roɗn go wo ni ɓuy.

²⁹ Ndo wãã ge ti Yehoyakim waŋ Juda ga : Manwur wãã so ga : Roɗ kefder ma de kaagen go nà diŋ ndo. Ndo day ga : Wer mayse ga ndo yer wããre wo ni ga waŋ Babilon a ge yaŋ le kidolgi, á ɓlag ge sirn go day yee ge nen jar téebeere wo go de horog wo la?

³⁰ Diŋ wersen Manwur wãã ti Yehoyakim waŋ Juda so ga : Je ni ɓe po boŋ hay ge ti paale waŋ mani Dafidn gà so hase, húulí Yehoyakim joŋ ge yaŋ go tiʼ nen ceg de ceg lay, go nen ceere tiʼ de suŋ lay.

³¹ Ndi ur gi yaŋ le de ɓaara de jar ni ɓe wo de weere jõõre ɓen wo wer debaycõõre ɓaaran wo. Ndi a ge yaŋ de re maga ndi hay siin ne hara day saara kaŋ ti ti ɓe gà mo ɓuy ne hara ti, ne jar ma ɓi leege Jerusalem wo de jar ma ti sir Judan wo ti.

³² Jermi raw maŋ kefder ma de kaage ma tigriŋ, kal hãge ɓe ne Barug je ni Neriya, je yerge no. Barug raw yer wããre maga hay wo ɓil kefder maga Yehoyakim waŋ Juda hay roɗn go wo ɓuy ɓil ɓe, Jermi de wãɗge ɓe ne hẽn de jage. Á a laa te wããre ma de maŋ sen wo ni ngaɓa tigriŋ pa.