JERMI 35 - Tupuri Bible

Jar ni Rekab wo

¹ Wããre maga Manwur wããn ne Jermi ti kal mani Yehoyakim je ni Josiyas waŋ Judan doo kay nono ga :

² See, wo liŋ ni jar ni Rekab wo day ni ndo wãã wããre ne hara. Hoo ra, wo de ɓaara ɓil tiŋ mani Manwur ɓil tiŋ maapo boŋ day ni ndo hã yii ne hara ma joge.

³ Ndi raw hoo Yaasaniya je ni Jermi je ni Habatsiyan wo de hẽẽre ɓen wo de weere ɓen wo ɓuy, de jar ma liŋ ni jar ni Rekabn wo ɓuy.

⁴ Ndi raw woge de ɓaara ɓil tiŋ mani Manwurn tiŋma mani jar ni Hanan je ni Yigdaliyahu je Baan ɓiŋ tiŋ mani minisdirn, ciŋ ti tiŋ mani Maaseyahu je ni Salum je gor jag tiŋ no.

⁵ Ndi kal laa daŋre wo go de bagge de yii wo de weere hããre wo ne jar mani Rekabn wo pele day ndi riŋ ra ga : Jo we yii!

⁶ Ama saara kal ferge gana : Wùr bay jo yii wa werga pan wùr Yonadab je ni Rekab hay fer jag ɓe ne wùr ga : Nday de weere ɓay wo nday jo ge yii gà hase.

⁷ Nday bor ge tiŋ wo gà nday joʼ ge mbèere mopo ge gà nday peɗ ge tlalum gà day nday joŋ ge de mopo gà. Nday bag ge ti ɓay diŋ mburyug wo nen tenen ɓayn wo ɓuy nen maga nday mo joŋ wo wolaŋ ti sir maga nday le de pudgi ni pudgi mono.

⁸ Wùr hoo sug ti fen maga pan wùr Yonadab je ni Rekabn hay wããn ne wùr mo ɓuy no, wùri, naare wùr wo, weere wùr wo de mayre wùr wo, wùr bay jo yii wa, nen tenen wùrn ɓuy.

⁹ Wùr bay bor tiŋ naw wa lay, wùr bay de pay tlalum wo, payre noga sir po de joʼ mopo ɓil wa.

¹⁰ Wùr naa nà ɓil mburyug wo, wùr hoo sugi, wùr joŋ diŋ fen maga Yonadab pan wùrn hay fern ne wùr mono.

¹¹ De maga Nebukadnesar waŋ Babilon ur le dur sirn lam no, wùr day ga : Naa see wo go Jerusalem, naa daŋ go doo soode mani jar Kalden wo de soode ma Sirin wo. Diŋ doo kay no so ga wùr wara de tiŋ ɓi leege Jerusalem lam mono.

¹² Mo so no Manwur raw wãã wããre ne Jermi doo kay nono ga :

¹³ Manwur Pantway, Baa ma Israyeln wãã ga : See, wo riŋ jar Juda wo de jar maga wo de tiŋ Jerusalem wo ga : Nday bay bà de laa mopo see ɓayn ni wa yawla? Nday bay bà ma yãã jag ɓi ti sen wa yawla? Kay diŋ jag Manwuri.

¹⁴ À lag ti jag maga Yonadab je ni Rekabn hay fern ne jar ni ɓe wo ga á mo jo wo yii wa day saara bay jo yii wa, hãã wara. Á hoo wo sug ti jag pan ɓaara, day ndi ma ɓin ndi hay wãã wããre le ne nday, ndi hay wããn le ne nday le hãã de jag toŋ ama nday day yãã jag ɓi gà.

¹⁵ Ndi hay lag jar ndar nen wããre ɓi weere jõõre ɓin wo wo see ɓay, ndi hay laa ra le go de jag toŋ ɓaa ma riŋ nday ga : Wosela ɓuy mo men faage ɓe ma de ɓlaggen go, coo we joŋre ɓayn wo, tay we de baa ma tigriŋ wo ma goŋ rage wa day doo kay nono ni nday lag ge yaŋ ɓil sir maga ndi hay hã ne pããre ɓay wo, ne nday lay mono. Ama nday day coʼ sug gà nday day yãã jag gà.

¹⁶ Kidolgi jar ni Yonadab je ni Rekab lag wo ti jag maga pan ɓaara hay fern ne hara day jar sen wo la laa wo laa jag ɓi gà!

¹⁷ Diŋ wersen Manwuri, Baa Pantway, Baa ma Israyeln wãã so ga : Ko we ndi a ge de re maga ndi hay wããn go ga ndi a de ɓaara mo ɓuy ne sir Juda wo de jar Jerusalem wo ti wer maga ndi hay wãã wããre ne hara, saara day yãã jag gà wer maga ndi hay ɗe ra, saara day yiŋ jag gà mono.

¹⁸ Jermi day riŋ jar ma liŋ ni Rekabn wo ga : Manwur Pantway, Baa ma Israyeln wãã ga : Wer maga nday hoo sug ti jag Yonadab pan ɓay no, wer maga nday see ti jag ɓen wo ɓuy day nday joŋ fen maga á hay fern ne nday mo ɓuy no,

¹⁹ wersen Manwur Pantway, Baa ma Israyeln wãã so ga : Jar ma ti wer mani Yonadab je ni Rekabn joŋ ge wo mbaara wo tum pel ɓi tiʼ i.