JERMI 34 - Tupuri Bible

À ƁLAG JERUSALEM GO Re maga leʼ ne Sedesiyas ti mono

¹ Manwur raw wãã wããre ne Jermi de maga Nebukadnesar waŋ Babilon wo de jar durgi ɓen wo ɓuy, de sir waŋre maga se wãã re ɓaara mo ɓuy, de wer jarn wo ɓuy hay wo dur Jerusalem de ɓi leege ma nen doo ɓen wo gana :

² Manwur wãã ga : See, wo riŋ Sedesiyas waŋ Juda ga : Manwur wãã ga : Ko we ga ndi hã ɓi leegen la go ne waŋ Babilon ɓi coo doo day se roɗn ge yaŋ go de wùu.

³ Ndo ma ɓon mono, ndo yãã ge go doo ɓe gà à baa ge ndo yaŋ de waŋ, à hã ge ndo ge go ne hẽn ɓi coo doo day ndo ko ge waŋ Babilon yaŋ go de nen ɓo. Á wãã ge wããre yaŋ ne ndo de jag ɓe day ndo raw ge wo go Babilone.

⁴ Sedesiyas waŋ Juda no, coʼ sug wããre Manwuri! Manwur wãã ti ɓo ga : À ʼwar ge ndo go de moslam gà.

⁵ Ndo huu gi diŋ húulí jam. Doo maga à roɗ fen fõõre ne pããre ɓo waŋre maga hay joŋ wo le go taŋgu ɓo nono, à roɗn ge yaŋ ne ndo lay day à rage ndo yaŋ de riŋgi ga : Yaya waŋ, yaya waŋ! Wãã wããre sen nà diŋ ndi. Kay diŋ jag Manwuri.

⁶ Jermi fer wããre sen wo ɓuy ne Sedesiyas waŋ Juda ɓi leege Jerusalem.

⁷ Soode mani waŋ Babilon hay wo dur Jerusalem wo de te ɓi leege ma ti sir Juda ma lan wo, hay wo dur Lakis wo de Aseka werga á wo nà diŋ ɓi leege maga hay gwaʼ wo ti sir Juda de egre mono.

Gebeere maga à laa ra day à fer hoo rage mono

⁸ Wããre maga Manwur wãã ne Jermi blam maga waŋ Sedesiyas tay jag de jar Jerusalem wo nen maga à mo naa saale go ne gebeere wo ti mono.

⁹ Tayge jag sen hay nà maga wosela ɓuy mo naa saale go ne gebee ɓe noga maygebe ɓe ti, hayga á yaŋ diŋ je Hebre noga may Hebre no, nen maga jobo mo ɗaw hẽn ɓe je Jwif kay gebee wa so.

¹⁰ Minisdirn wo ɓuy de jar sirn ɓuy maga hay hã wo jag ɓaara ti tayge jag sen mono, raw wo hoo sug ti jag maga à riŋ ga wosela ɓuy mo naa saale go ne gebee ɓe noga maygebe ɓe nen maga á mo hay wo de ɗawge gebeere kay wa so mono. Saara raw hoo sugi, laa wo ra go ti see ɓaara.

¹¹ Ama blam sen saara fer coo ɗiggi, fer wo gebeere wo de mayre gebeere maga saara hay naa saale go ne hara ti wo le, day saara fer wo ra le de waŋ maga á mo hay wo gebeere saara wo de mayre gebeere saara.

¹² Mo so no Manwur kal wãã wããre ne Jermi doo kay nono ga :

¹³ Manwuri, Baa ma Israyeln wãã ga : Ndi hay tay jag le de pããre ɓay wo le ti wur maga ndi laa ra le go ɓil sir Ejipte tiŋ gebee no, day ndi hay riŋ ra ga :

¹⁴ Ti kiŋgi renam mono, wosela ɓuy mo naa saale go ne hẽn ɓe je Hebre maga hay yee see ɓe we go ne hẽn mono. Á joŋ ge peele ne ndo kiŋgi hiiraʼa, blam ɓe ndo naa saale go ne hẽn ti maga á mo men tiŋ ɓo go. Ama pããre ɓay day wo yãã jag ɓi gà day wo coʼ sug ɓi gà.

¹⁵ Nday day fer le wara, nday raw joŋ fen maga sen ti faage ɓe nen ɓi ti maga nday wãã go ga wosela ɓuy mo naa saale go ne kan ɓe ti mono. Nday tay jag go pel ɓi ɓil tiŋ maga à tos ndi ne hẽn ti mono.

¹⁶ Day wara nday fer coo ɗiggi, nday ɓoʼ foo ɗúu ɓi go. Wosela ɓuy yoo ɓay raw fer gebeere ɓe noga mayre gebeere ɓe maga nday hay naa saale go ne hara ti day nday hay men ra go ti see ɓaara wo le. Nday fer ra le de waŋ maga á mo hay wo gebeere ɓay wo de mayre gebeere ɓay wo ra.

¹⁷ Diŋ wersen Manwur wãã so ga : Nday yãã jag ɓi ti wããre maga wosela ɓuy mo naa saale go ne hẽn ɓe, ne kan ɓe ti gà. Ko we, ndi naa saale le go ne moslam, bulfũŋ wo de koŋne ti maga á mo kaŋ wo ne nday ti day ndi kol ge nday yaŋ go diŋ fen caa hẽẽne sir waŋre ma ti tamsir wo la ɓuy. Kay diŋ jag Manwuri.

¹⁸ Ndi taw ge jar maga cegaɗ wo jag tayge jagn go wo go, diŋ jar se maga day wo seege ti faage tayge jag maga saara hay tayn pel ɓi de maga saara caa ɓil này go ɓoge day laa wo go ti holaŋ ɓaara lay mo gà mono.

¹⁹ Minisdir ma Judan wo, minisdir ma Jerusalemn wo, jar ma de ndar ɓay ma wãã wããre horogn wo, jar siɗ jagn wo de jar sirn ɓuy maga hay laa wo go ti holaŋ wedày ma de caa ɓiln mono,

²⁰ ndi hã ge ra go ne jar hee ɓaara wo ɓi coo doo, go ɓi coo doo jar maga bay wo de sãy ɓaara ti wa mono. Húulí ɓaara kol ge yaŋ go diŋ rege dweere ma ciŋ wo de nàyre ma ti tamsir wo.

²¹ Ndi hã ge Sedesiyas waŋ Juda wo de minisdir ɓen wo go ɓi coo doo jar hee ɓaaran wo, go ɓi coo doo jar maga bay wo de sãy ɓaara ti wa, go ɓi coo doo soode mani waŋ Babilon wo, day waŋ Babilon raw ge yaŋ de ɓay were.

²² Ndi fer ge jag ɓi yaŋ ne hara, ndi hoo ge ra yaŋ le ne ɓi leegen la ti, á durn gi wo yaŋ, yããn ge wo yaŋ go day hee ge wo wùu go ne hẽne. Ndi kol ge ɓi leege ma ti sir Judan wo yaŋ go diŋ ngel ma poɗag poɗag bay jar ɓili. Kay diŋ jag Manwuri.