JERMI 33 - Tupuri Bible

Baa ga se woo jar ɓen wo yaŋ

¹ Manwur kal wãã wããre ne Jermi ma de ɓog pa de maga se hay de diggi ɓi feele tiŋ daŋgay mono ga :

² Manwur maga joŋ fẽẽren wo, Manwur maga hay ʼwũy ra day lag ra go ti ngel ɓaara, se maga ɗúu ɓe ga Manwur wãã ga :

³ Tos ndi ni ndi yiŋ jag yaŋ ne ndo, ndi sii gi fẽẽre ma kluuri wo de fẽẽre ma de yoŋre ga ndo hay bay de daʼ wer ɓaara wa wo yaŋ ne ndo.

⁴ Werga Manwuri, Baa ma Israyeln wãã ti tiŋ ma ɓi leegen wo la de tiŋ mani waŋ Juda maga à mbug gi ra go de horge a le sir ne hara ɓaale wo de moslam doo kay nono ga :

⁵ De maga à wo ge dur jar Kalde wo mono, sen joŋ ge nà ma bag ɓil tiŋ sen wo go de húulí jar maga ndi taw ge ra go nen bagge põõ ɓin wo de ɓil sõõge ɓin mono. Ndi yoŋ ge see ɓi go ne ɓi leegen la wer hãyhãy ɓaaran wo.

⁶ Ane ndi fer ge yaŋ go rug wããge ɓe no, ndi hã jam yaŋ ne hẽne. Ndi pẽẽ ge ra yaŋ go day ndi hã ge jam ma cwãyn yaŋ ne hara doo maga ɓil da nono.

⁷ Ndi fer ge yaŋ le de jar Juda wo de jar Israyel ma ti daŋgayn wo le day ndi fer yaŋ go lag rage ti sir ɓaara doo ma ti wurpon wo le nono.

⁸ Ndi fãã ge debaycõõre ɓaara maga á joŋn wo see ɓi yaŋ go ɓuy. Ndi fug gi ɓil yaŋ go ne hara ti debaycõõre ɓaara maga á joŋn wo see ɓi mo ɓuy, de ti ngel graŋ maga á joŋn wo see ɓi ɓuy no.

⁹ Ɓi leegen la joŋ ge yaŋ diŋ fen fruy ɓil ɓi, diŋ fen kee ndi, fen woore ɓi yoo wer jar ma ti tamsir wo ɓuy maga laa ge wo wããre de el maga ndi joŋn ge see ɓaara mo ɓuy no. Wer jar sen la yee wo yaŋ go, daɗ ge wo yaŋ doo fruygi wo de twore maga ndi hãn ge hara mono.

¹⁰ Manwur wãã ga : Ti ngel sen lam maga nday wãɗ ti ɓe ga á go diŋ tabuli, je táabay noga này po bay wo ni wa mono, à laage siŋ yaŋ ɓi leege ma ti sir Judan wo, ti faage ma ɓi leege Jerusalemn wo pa,

¹¹ diŋ siŋ few wo de siŋ fruygi, siŋ ma jag je ma de yãã wãyn wo de ma jag may maga go de yããge mono. Á a laa ge siŋ yaŋ pa, jag jar maga wãɗ wo ga togoɗ we Manwur Pantway no werga ɓil Manwur de ele, werga koge decoo jar ɓen mbe wo tum mono. Á a laa ge siŋ yaŋ jag jar maga siɗ wo siigi jag ma joŋ suseʼ ɓil tiŋ mani Manwurn mono. Werga, ndi fer jar maga wo wo go ti daŋgay wo yaŋ le ɓil sirn la, day ndi lag ge ra yaŋ go doo ma ti wurpon nono. Wããn diŋ Manwuri.

¹² Manwur Pantway wããn ga : Ti ngel se maga go diŋ tabul lam wo de ɓi leege ma ti ɓen wo ɓuy mono, à daʼ ge kaw horog jar koɗge wo yaŋ ni ma bag ti horog ɓaara wo iggi ni.

¹³ Ɓi leege ma ti húulìn wo, ɓi leege ma ɓil Sefelan wo ɓi leege ma ɓi Negefn wo, ɓil sir Benjame, ti sir ma ti Jerusalem go kara de ɓi leege ma ti sir Judan wo mono fǐirin fer wo yaŋ nen doo je maga kee ra mo pa no. Wããn diŋ Manwuri.

¹⁴ Ko we, wur yaŋ wo le age day ndi bag ge jag wããre ma de el maga ndi hay wããn ti tiŋ mani Israyel wo de tiŋ mani Juda yaŋ go. Kay diŋ jag Manwuri.

¹⁵ De naw sen wo ni, ti wur sen wo ni mono, ndi tĩĩ gi mbèere keɗed (maga diŋ jobo) yaŋ ne Dafidi. Á joŋ ge fen ma ti faage ɓen wo de keɗed yaŋ ɓil sir no.

¹⁶ Ti wur sen wo mono, à yãã Juda yaŋ go, jar Jerusalem lag ge wo yaŋ go de yõõ ti ti ngel lagge ɓaara, day ɗúu maga à kaŋn ge ne Jerusalem diŋ ga : Manwur diŋ keɗed wùr no.

¹⁷ Werga, Manwur wãã ga : Je ma coo Dafid ga hay ge ti paale waŋ mani Israyel bas ge gà.

¹⁸ Jar coo jar Lefid jar siɗ jagn joŋ siigi jag maga à roɗ mo ɓen go ɓuy, roɗ fen fõõre ma wer siigi jagn wo mono, jar sen bas ge wo pel ɓi gà.

¹⁹ Manwur kal wãã wããre ne Jermi doo kay nono ga :

²⁰ Manwur wãã ga : Hayga nday kãã yaŋ ma blaw tayge jag ma ti holaŋ wùr de ngel ceg wo de ngel suŋ go, kol go maga saara joŋ ceg noga suŋgu ti wur ɓaara gà so no,

²¹ ni tayge jag ɓin blaw yaŋ go lay : Blaw go de Dafid wejõõ ɓi no nen maga se daʼ mbarga ma kolge waŋ ti ngel ɓe gà blaw go de jar Lefid jar siɗ jagn maga wo de ma joŋ peele ne ndi mo lay.

²² Doo maga jobo kãã ma kee fẽẽre ma nen ngel ma ciŋ wo de duguɗgi ma jag maarog gà no mono, ndi tes ge wer mani Dafid wejõõ ɓin wo yaŋ de jar Lefid ma joŋ peele ne ndin wo yaŋ doosen no lay.

²³ Manwur raw wãã wããre ne Jermi doo kay nono ga :

²⁴ Ndo yaŋ mbo ko fen maga jarn wo de wããge ɓe mo yawla? A wãɗ wo ga : Ɓĩĩni ma ɓog maga Manwur hay hoo ra go ɓe mono, á tob ra we go. Doo kay no so no saara mbuɗ foo jar ɓin wo, ko wo ra doo ga á bay wo go diŋ wer jar po taʼ wa so nono.

²⁵ Manwur wãã so ga : Hayga ndi mo hay tay jag we de ngel ceg wo de ngel suŋ gà hayga ndi de ɓod jag liŋgi we go ne ngel ma ciŋ wo de tamsir gà no,

²⁶ ndi hay de tob wer mani Jakobn wo yaŋ go de wer mani Dafid wejõõ ɓin lay ndi hay de hoo jar po ti wer mani Dafid maga á mo lag wo wãã wããre jar ma ti wer mani Abraham, Isag wo de Jakobn gà lay. Werga, ndi fer ge jar ɓaara ma ti daŋgayn wo yaŋ le day ndi ko ge decoo ɓaara yaŋ.